Rikors ippreżentat fil-25 ta’ Novembru 2013 – Minority SafePack – one million signatures for diversity in Europe et vs Il-Kummissjoni

(Kawża T-646/13)

Lingwa tal-kawża: il-Ġermaniż

Partijiet

Rikorrenti: Bürgerausschuss für die Bürgerinitiative Minority SafePack – one million signatures for diversity in Europe et (rappreżentanti: E. Johansson, J. Lund u C. Lund, avukati)

Konvenuta: Il-Kummissjoni Ewropea

Talbiet

tannulla d-Deċiżjoni tal-Kummissjoni C (2013) 5969 finali, tat-13 ta’ Settembru 2013, innotifikata fis-16 ta’ Settembru 2013;

tikkundanna lill-konvenuta għall-ispejjeż.

Motivi u argumenti prinċipali

Insostenn tar-rikors tagħhom, ir-rikorrenti jinvokaw żewġ motivi.

L-ewwel motiv, ibbażat fuq ksur tal-forom proċedurali sostanzjali

Ir-rikorrenti jsostnu li d-deċiżjoni kkontestata tikser il-forom proċedurali tat-tieni paragrafu tal-Artikolu 296 tat-Trattat FUE u tal-Artikolu 4(3) tar-Regolament (UE) Nru 211/2011 ¹ .

F’dan il-kuntest, ir-rikorrenti josservaw fost l-oħrajn li l-Kummissjoni ma ssemmix kull waħda mill-ħdax-il tema li huma s-suġġett tal-inizjattiva taċ-ċittadini u li, fil-fehma tagħha, ma jaqgħux fil-kuntest tal-kompetenzi tagħha sabiex tippreżenta proposta għal att legali tal-Unjoni għall-applikazzjoni tat-Trattati. Il-Kummissjoni lanqas ma indikat għalfejn dawn it-temi għandhom jaqgħu barra minn dan il-kuntest.

Minbarra dan, ir-rikorrenti jsostnu fil-kuntest ta’ dan il-motiv li l-Kummissjoni ma indikatx ir-raġuni għalfejn ir-Regolament Nru 211/2011 ma jippermettix ir-reġistrazzjoni ta’ parti jew partijiet ta’ inizjattiva taċ-ċittadini proposta.

It-tieni motiv, ibbażat fuq ksur tat-Trattati jew ta’ waħda mid-dispożizzjonijiet legali dwar l-applikazzjoni tagħhom

Ir-rikorrenti jsostnu hawnhekk ksur tal-Artikolu 11 tat-Trattat UE, tal-ewwel paragrafu tal-Artikolu 24 tat-Trattat FUE u tal-Artikolu 4(2) u (3) tar-Regolament Nru 211/2011.

Ir-rikorrenti josservaw, f’dan il-kuntest, li l-ebda waħda mit-temi li fir-rigward tagħhom il-Kummissjoni għandha tiġi mistiedna tagħmel proposta ma taqa’ manifestament barra mill-kuntest tal-kompetenzi tal-Kummissjoni sabiex tagħmel proposti għal att legali tal-Unjoni sabiex jiġu applikati t-Trattati. Minbarra dan, huma jsostnu li anki jekk waħda mit-temi tkun taqa’ barra minn dan il-kuntest, il-Kummissjoni kellha tirreġistra l-inizjattiva taċ-ċittadini proposta, bit-tneħħija tat-temi li fil-fehma tagħha manifestament ma jaqgħux f’dan il-kuntest.

____________

¹ Regolament (UE) Nru 211/2011 tal-Parlament Ewropew u tal-Kunsill, tas-16 ta’ Frar 2011, dwar l-inizjattiva taċ-ċittadini (ĠU L 65, p. 1).