Talba għal deċiżjoni preliminari mressqa mit-Tribunalul Mureş (ir-Rumanija) fit-30 ta’ Marzu 2020 – DG, EH vs SC Gruber Logistics SRL
(Kawża C-152/20)
Lingwa tal-kawża: ir-Rumen
Qorti tar-rinviju
Tribunalul Mureş
Partijiet fil-kawża prinċipali
Rikorrenti: DG, EH
Konvenuta: SC Gruber Logistics SRL
Domandi preliminari
L-Artikolu 8 tar-Regolament (KE) Nru 593/2008 tal-Parlament Ewropew u tal-Kunsill tas-17 ta’ Ġunju 2008 1 għandu jiġi interpretat fis-sens li l-għażla tal-liġi applikabbli għall-kuntratt ta’ xogħol individwali teskludi l-applikazzjoni tal-liġi tal-pajjiż li fih l-impjegat normalment ikun eżerċita l-attività tiegħu jew l-eżistenza tal-għażla tal-liġi applikabbli teskludi l-applikazzjoni tat-tieni sentenza tal-Artikolu 8(l) ta’ dan ir-regolament?
L-Artikolu 8 tar-Regolament Nru 593/2008 għandu jiġi interpretat fis-sens li s-salarju minimu applikabbli fil-pajjiż li fih l-impjegat normalment ikun eżerċita l-attività tiegħu huwa dritt li jaqa’ fil-kamp ta’ applikazzjoni ta’ “dispożizzjonijiet li ma jistgħux jiġu dderogati bi ftehim taħt il-liġi li, fin-nuqqas ta’ għażla, kienet tkun applikabbli skond il-paragrafi 2, 3 u 4 ta’ dan l-Artikolu”, fis-sens tat-tieni sentenza tal-Artikolu 8(1) ta’ dan ir-regolament?
L-Artikolu 3 tar-Regolament Nru 593/2008 għandu jiġi interpretat fis-sens li jipprekludi li l-indikazzjoni fil-kuntratt ta’ xogħol individwali tad-dispożizzjonijiet tal-Codul muncii (il-Kodiċi tax-Xogħol, ir-Rumanija) huwa ekwivalenti għall-għażla tal-liġi Rumena, f’sitwazzjoni fejn huwa magħruf li fir-Rumanija hemm obbligu legali li tiddaħħal din il-klawżola dwar l-għażla fil-kontenut tal-kuntratt ta’ xogħol individwali? Fi kliem ieħor, l-Artikolu 3 tar-Regolament Nru 593/2008 għandu jiġi interpretat fis-sens li jipprekludi regoli u prattiki nazzjonali li jinkludu l-obbligu dwar l-għażla tal-liġi Rumena fil-kontenut tal-kuntratt ta’ xogħol individwali?
____________
1 Regolament (KE) Nru 593/2008 tal-Parlament Ewropew u tal-Kunsill tas-17 ta’ Ġunju 2008 dwar il-liġi applikabbli għall-obbligazzjonijiet kuntrattwali (Ruma I) (ĠU 2008, L 177, p. 6, rettifika fil-ĠU 2009, L 309, p. 87).