Rikors ippreżentat fit-2 ta' Gunju 2009 - Dionisio Galao vs Il-Kumitat tar-Reġjuni
(Kawża F-57/09)
Lingwa tal-kawża: Il-Franċiż
Partijiet
Rikorrenti: Ana Maria Dionisio Galao (Brussell, il-Belġju) (rappreżentanti: S. Orlandi, A. Coolen, J.-N. Louis, u É. Marchal, avukati)
Konvenut: Il-Kumitat tar-Reġjuni
Suġġett u deskrizzjoni tal-kawża
L-annullament tad-deċiżjoni tal-konvenut li tistabbilixxi l-kundizzjonijiet tar-reklutaġġ tar-rikorrenti bħala membru tal-persunal bil-kuntratt taħt l-Artikolu 3b tal-Kondizzjonijiet tal-impjieg, sa fejn tillimita t-tul tal-kuntratt għal 3 xhur, kif ukoll l-annullament ta' żewġ klawżoli addizzjonali għall-kuntratt ta' reklutaġġ tar-rikorrenti bħala membru tal-persunal temporanju, li jemendaw id-data tal-iskadenza tal-imsemmi kuntratt.
Talbiet tar-rikorrenti
jannulla d-deċiżjoni tal-Kumitat tar-Reġjuni tad-19 ta' Diċembru 2008 sa fejn tistabbilixxi l-kundizzjonijiet tar-reklutaġġ tar-rikorrenti bħala membru tal-persunal bil-kuntratt taħt l-Artikolu 3b tal-Kondizzjonijiet tal-impjieg, u b'mod iktar speċifiku, sa fejn tillimita t-tul tal-kuntratt għal 3 xhur;
jannulla d-deċiżjoni tal-Kumitat tar-Reġjuni tat-23 ta' Ottubru 2008 sa fejn temenda, permezz tal-klawżola addizzjonali għall-kuntratt Nru 9, il-kundizzjonijiet tar-reklutaġġ tar-rikorrenti bħala membru tal-persunal temporanju taħt l-Artikolu 8(b) tal-Kondizzjonijiet tal-impjieg u, b'mod iktar speċifiku, sa fejn testendi d-data tal-iskadenza tiegħu sal-31 ta' Diċembru 2008;
jannulla d-deċiżjoni tal-Kumitat tar-Reġjuni tat-22 ta' Settembru 2008 sa fejn temenda, permezz tal-klawżola addizzjonali għall-kuntratt Nru 8, il-kundizzjonijiet tar-reklutaġġ tar-rikorrenti bħala membru tal-persunal temporanju taħt l-Artikolu 8(b) tal-Kondizzjonijiet tal-impjieg u, b'mod iktar speċifiku, sa fejn testendi d-data tal-iskadenza tal-kuntratt billi tipposponiha mit-30 ta' Settembru għall-31 ta' Diċembru 2008;
jikkundanna lill-Kumitat tar-Reġjuni għall-ispejjeż.
____________