Appell ippreżentat fil-11 ta’ Ġunju 2020 mill-Kummissjoni Ewropea mis-sentenza mogħtija mill-Qorti Ġenerali (Is-Seba’ Awla) fit-2 ta’ April 2020 fil-Kawża T-383/17, Hansol Paper vs Il-Kummissjoni
(Kawża C-260/20 P)
Lingwa tal-kawża: l-Ingliż
Partijiet
Appellanti: Il-Kummissjoni Ewropea (rappreżentanti: J.-F. Brakeland, u A. Demeneix, aġenti)
Partijiet oħra fil-proċedura: Hansol Paper Co. Ltd, European Thermal Paper Association (ETPA)
Talbiet
L-appellanti titlob li l-Qorti tal-Ġustizzja jogħġobha:
tannulla s-sentenza kkontestata, tiċħad ir-rikors fl-ewwel istanza u tikkundanna lil Hansol Paper Co. Ltd għall-ispejjeż;
jew, sussidjarjament,
tibgħat il-kawża lura għal eżami mill-ġdid quddiem il-Qorti Ġenerali u tirriżerva l-ispejjeż tal-proċeduri fl-ewwel istanza u tal-appell.
Aggravji u argumenti prinċipali
Fis-sentenza kkontestata, il-Qorti Ġenerali annullat ir-Regolament ta’ Implimentazzjoni tal-Kummissjoni (UE) 2017/763 tat-2 ta’ Mejju 2017 li jimponi dazju antidumping definittiv u jiġbor b’mod definittiv id-dazju provviżorju impost fuq importazzjonijiet ta’ ċerta karta termali ħafifa li toriġina mir-Repubblika tal-Korea 1 , sa fejn jikkonċerna lil Hansol Paper Co. Ltd.
Il-Kummissjoni tinvoka tliet aggravji insostenn tal-appell tagħha.
Il-Kummissjoni tqis li l-Qorti Ġenerali:
żnaturat il-provi u interpretat b’mod żbaljat il-kuntest ġuridiku applikabbli għad-data li l-Kummissjoni hija awtorizzata tibbaża ruħha fuqha sabiex tistabbilixxi l-prezz għall-esportazzjoni skont l-Artikolu 2(9) tar-Regolament bażiku 2 ;
interpretat b’mod żbaljat id-dispożizzjonijiet tal-Artikolu 2(1) u (3) tar-Regolament bażiku sabiex tiddetermina l-valur normali fil-każ ta’ assenza ta’ bejgħ intern; u
interpretat b’mod żbaljat id-dispożizzjonijiet tal-Artikolu 3 tar-Regolament bażiku meta hija ddefinixxiet l-marġni ta’ twaqqigħ tal-prezz fil-każ ta’ esportazzjonijiet lejn l-Unjoni permezz ta’ entitajiet relatati.
____________
1 ĠU 2017, L 114, p. 3.
2 Regolament (UE) 2016/1036 tal-Parlament Ewropew u tal-Kunsill tat-8 ta’ Ġunju 2016 dwar il-protezzjoni kontra l-importazzjonijiet li huma l-oġġett ta’ dumping minn pajjiżi mhux membri tal-Unjoni Ewropea (ĠU 2016, L 176, p. 21).