Rikors ippreżentat fid-9 ta' Mejju 2008 - Microsoft vs Il-Kummissjoni

(Kawża T-167/08)

Lingwa tal-kawża: L-Ingliż

Partijiet

Rikorrenti: Microsoft Corp. (rappreżentanti: J.-F. Bellis, lawyer, I. Forrester, QC)

Konvenuta: Il-Kummissjoni tal-Komunitajiet Ewropej

Talbiet tar-rikorrenti

tannulla d-Deċiżjoni tal-Kummissjoni Ewropea C(2008) 764 finali, tas-27 ta' Frar 2008, li tistabbilixxi l-ammont definittiv tal-penali perjodiċi imposti fuq Microsoft Corporation bid-Deċiżjoni tal-Kummissjoni C(2005) 4420 finali;

fl-alternattiv, tannulla jew tnaqqas l-ammont tal-penali perjodiċi imposti;

tikkundanna il-Kummissjoni tal-Komunitajiet Ewropej għall-ispejjeż.

Motivi u argumenti prinċipali

Permezz ta' deċiżjoni ta' l-10 ta' Novembru 2005, adottata skond l-Artikolu 24(1) tar-Regolament Nru 1/2003¹, il-Kummissjoni imponiet penali perjodiċi fuq ir-rikorrenti minħabba li naqset milli tikkonforma ruħha ma' l-obbligu, stipulat fl-Artikolu 5(a) tad-Deċiżjoni tal-Kummissjoni 2007/53/KE ta' l-24 ta' Marzu 2004², li tagħmel l-informazzjoni dwar l-interoperabbiltà disponibbli għal kull impriża li għandha interess b'kundizzjonijiet raġonevoli u mhux diskriminatorji. Id-deċiżjoni kkontestata tistabbilixxi l-ammont definittiv tal-penali perjodiċi għall-perijodu bejn il-21 ta' Ġunju 2006 u l-21 ta' Ottubru 2007, inklużi, bħala EUR 899 miljuni. Ir-rikorrenti titlob l-annullament tad-deċiżjoni kkontestata abbażi tal-motivi segwenti :

Il-Kummissjoni żbaljat meta imponiet penali perjodiċi fuq Microsoft sabiex iġġiegħlha tapplika prezzijiet "raġonevoli" mingħajr ma speċifikat minn qabel liema huma l-prezzijiet li hija tikkunsidra bħala "raġonevoli", b'tali mod li Microsoft setgħet tkun taf x'għandha tagħmel sabiex tevita l-impożizzjoni ta' dawn il-penali perjodiċi.

Il-Kummissjoni wettqet żball manifest ta' evalwazzjoni u kisret l-Artikolu 253 KE meta kkonkludiet li rati ppubblikati adottati minn Microsoft ma kinux raġonevoli u kienu jmorru kontra d-Deċiżjoni ta' l-2004 mingħajr ma ħadet in kunsiderazzjoni l-fatti li (i) dawn ir-rati ppubblikati kienu intiżi espressament sabiex jiffaċilitaw in-negozjati bejn Microsoft u detenturi prospettivi ta' liċenzji u (ii) Microsoft, b'konsultazzjoni mal-Kummissjoni, kienet ħolqot mekkaniżmu fejn it-trustee jirrevedi r-rati proposti minn Microsoft jekk ma jintlaħaqx ftehim ma' xi detentur prospettiv ta' liċenzja, mekkaniżmu li huwa virtwalment identiku għall-mekkaniżmu maħluq mill-Kummissjoni stess fil-każ li wassal għad-deċiżjoni NDC Health/IMS Health: Miżuri interim³. Il-Kummissjoni wettqet żball manifest ta' evalwazzjoni wkoll meta (i) naqset milli tagħti l-importanza dovuta lill-fatt li dawn ir-rati ppubblikati kienu stabbiliti minn Microsoft f'livell inqas mir-rati li espert indipendenti kkunsidra bħala raġonevoli (ii) naqset milli tagħti l-importanza dovuta lill-fatt li ebda detentur prospettiv ta' liċenzja ma naqas milli jilħaq ftehim ma' Microsoft u (iii) naqset milli tikkunsidra l-fatt li detenturi ta' liċenzja "li m'għandhiex privattiva" jiksbu wkoll drittijiet sabiex jużaw il-privattivi ta' Microsoft.

Il-Kummissjoni wettqet żball manifest ta' evalwazzjoni meta obbligat lil Microsoft tistabbilixxi li s-sigrieti kummerċjali tagħha kienu innovattivi permezz ta' eżami aktar rigoruż ta' jekk jikkwalifikawx bħala privattiva sabiex tiġġustifika l-impożizzjoni ta' drittijiet għal liċenzja fir-rigward ta' dawn is-sigrieti kummerċjali. Il-Kummissjoni kisret ukoll l-Artikolu 253 KE meta naqset milli tieħu in kunsiderazzjoni diversi argumenti mqajma minn Microsoft fuq il-bażi ta' rapporti mħejjija minn esperti fil-privattivi li kkritikaw l-approwċ tal-Kummissjoni.

Il-Kummissjoni kisret l-Artikolu 233 KE meta naqset milli tieħu l-miżuri neċessarji sabiex tikkonforma ruħha mas-sentenza tas-17 ta' Settembru 2007, Microsoft vs Il-Kummissjoni⁴, safejn il-Kummissjoni bbażat l-evalwazzjoni tagħha fuq rapporti ppreparati mit-trustee abbażi ta' dokumenti miksuba permezz ta' poteri ta' investigazzjoni li l-Qorti tal-Prim'Istanza kkunsidrat illegali.

Il-Kummissjoni ċaħdet lil Microsoft mid-dritt għal smigħ tagħha meta naqset milli tagħti lil Microsoft opportunità sabiex tesprimi l-pożizzjoni tagħha wara t-tmiem tal-perijodu ta' referenza li għalih Microsoft kienet imposta multa, b'tali mod li Microsoft kienet imwaqqfa milli tikkummenta dwar l-aspetti rilevanti kollha tal-każ.

L-ammont tal-penali perjodiċi huwa eċċessiv u sproporzjonat. Fost raġunijiet oħra, il-Kummissjoni naqset milli tieħu in kunsiderazzjoni l-fatt li d-deċiżjoni kkontestata tikkonkludi biss li d-drittijiet allegatament stabbiliti minn Microsoft taħt liċenzja partikolari waħda (il-liċenzja "li m'għandhiex privattiva") ma kinux raġonevoli, u għalhekk ma tikkontestax (i) id-drittijiet allegatament stabbiliti minn Microsoft għad-drittijiet ta' proprjetà intellettwali tagħha kollha inkorporati fl-informazzjoni dwar l-interoperabbiltà li Microsoft hija obbligata tiżvela taħt l-Artikolu 5 tad-Deċiżjoni ta' l-2004 jew (ii) il-kompletezza jew il-preċiżjoni ta' l-informazzjoni dwar l-interoperabbiltà.

____________

¹ - Regolament tal-Kunsill (KE) Nru 1/2003, tas-16 ta' Diċembru 2002, fuq l-implimentazzjoni tar-regoli tal-kompetizzjoni mniżżlin fl-Artikoli 81 u 82 tat-Trattat (Test b'rilevanza għaż-ŻEE) (ĠU 2003, L 1, p. 1).

² - Deċiżjoni tal-Kummissjoni 2007/53/KE, ta' l-24 ta' Marzu 2004, dwar proċedura għall-applikazzjoni ta' l-Artikolu 82 tat-Trattat KE u ta' l-Artikolu 54 tal-Ftehim ŻEE mibdija fil-konfront ta' Microsoft Corporation (Każ COMP/C-3/37.792 - Microsoft) (innotifikata bid-dokument numru C(2004) 900) (ĠU 2007, L 32, p. 23).

³ - Deċiżjoni tal-Kummissjoni 2002/165/KE, tat-3 ta' Lulju 2001, dwar proċedura għall-applikazzjoni ta' l-Artikolu 82 tat-Trattat KE (Każ COMP D3/38.044 - NDC Health/IMS Health: Miżuri interim) (innotifikata bid-dokument numru C(2001) 1695) (ĠU 2002, L 59, p. 18).

⁴ - T-201/04, Microsoft vs Il-Kummissjoni, għadha ma ġietx ippubblikata fil-Ġabra.