Imwieled fl-1959 f’Palermo (l-Italja), Giovanni Pitruzzella ggradwa fid-dritt mill-Università degli Studi di Palermo (l-Università ta’ Palermo, l-Italja) fl-1982. Huwa fi ħdan din l-università li l-attivitajiet tiegħu ta’ riċerkatur wassluh jgħallem hemm id-dritt kostituzzjonali, mill-1983 sal-1986. Huwa wara assuma l‑inkarigu tat-tagħlim tad-dritt kostituzzjonali fl-Università degli Studi di Cagliari (l-Università ta’ Cagliari, l-Italja), fejn għallem kors ta’ dritt pubbliku mill-1986 sal-1997, imbagħad fl-Università degli Studi di Palermo (l-Università ta’ Palermo, l-Italja). Mill-2014 sal-2017, huwa għallem fil-qasam tad-dritt kostituzzjonali u tad-dritt tal-kompetizzjoni fil-Libera Università Internazionale degli Studi Sociali Guido Carli (l-Università Libera Internazzjonali tal-Istudji Soċjali Guido Carli, l-Italja). Huwa awtur ta’ numru ta’ kotba fuq id-dritt pubbliku, fuq id-dritt kostituzzjonali, fuq id-dritt amministrattiv u fuq id-dritt tal-kompetizzjoni.

Giovanni Pitruzzella barra minn hekk żvolġa diversi missjonijiet, matul il-karriera tiegħu, favur istituzzjonijiet pubbliċi. Mill-1993 sal-1996, huwa okkupa l-inkarigu ta’ kunsillier ġuridiku tal-Gvern Taljan, imbagħad dak ta’ president tal-kummissjoni għall-applikazzjoni tal-istatut speċjali tar-Reġjun ta’ Sicilia, mill-1998 sal-2002.

Huwa ġie nnominat membru tal-Commissione di garanzia del diritto di sciopero nei servizi pubblici essenziali (il-Kummissjoni ta’ Garanzija tad-Dritt għall-Azzjoni Industrijali fis-Servizzi Pubbliċi Essenzjali, l‑Italja) fl-2006, u sar president tagħha mill-2009 sal-2011. Fl-istess waqt, huwa okkupa, mill-2008 sal‑2018, il-pożizzjoni ta’ kunsillier ġuridiku fil-Ministeru għas-Saħħa Taljan. Bejn l-2011 u l-2018, huwa ġie nnominat president tal-Autorità garante della concorrenza e del mercato italiana (l-Awtorità Taljana Garanti tal-Kompetizzjoni u tas-Suq).

F’April 2013, Giovanni Pitruzzella ġie nnominat membru tal-Kummissjoni għar-Riformi Istituzzjonali fil-Qasam Ekonomiku-Soċjali. F’Ġunju tal-istess sena, issejjaħ jingħaqad, bħala espert, mal-Kummissjoni għar-Riformi Kostituzzjonali.

Avukat Ġenerali fil-Qorti tal-Ġustizzja mit-8 ta’ Ottubru 2018 sal-14 ta’ Novembru 2023.