Earcaíocht
Is gnách go n-earcaítear foireann bhuan inmheánach (oifigigh) trí chomórtais oscailte arna n-eagrú ag an Oifig Eorpach um Roghnú Foirne (EPSO) do gach gairm bheatha. Ag an am céanna, earcaítear gníomhairí sealadacha nó gníomhairí ar conradh trí ghlaonna ar iarratais, léirithe spéise nó iarratais a fhaightear gan iarraidh.
Is trí chomórtais oscailte arna n-eagrú ag an Oifig Eorpach um Roghnú Foirne (EPSO) is mó a dhéantar earcaíocht do sheirbhís teanga na Cúirte, Ard-Stiúrthóireacht an Ilteangachais (DGM), cosúil le ranna uile institiúidí an Aontais Eorpaigh. Baineann an prionsabal seo le gach gairm. Cuirtear na comórtais in oiriúint dá sainiúlachtaí sonracha agus bíonn tástálacha de chineálacha éagsúla iontu.
Go heisceachtúil, i gcás nach féidir comórtas oscailte a dhéanamh, féadfar comórtas inmheánach a oscailt.
Cuireann nósanna imeachta roghnúcháin sealadacha foirne le comórtais ar bhealach úsáideach, go háirithe chun freastal ar riachtanais athsholáthair intuartha (saoire mháithreachais, saoire do thuismitheoirí agus saoire teaghlaigh, srl.) agus atá teoranta ó thaobh ama de. Roinneann na hinstitiúidí éagsúla roinnt iarrthóirí agus uirlisí le chéile, a thugann tacaíocht luachmhar chun baill foirne shealadacha a roghnú. Dá bhrí sin, ar “liostaí CAST”, atá á mbainistiú ag EPSO, is féidir iarrthóirí a aimsiú ar féidir foireann a earcú go tapa mar bhaill foirne ar conradh nó mar bhaill foirne shealadacha sna réimsí seo a leanas: aistriúchán dlíthiúil, ceartú cló, fíorú teanga agus seirbhísí rúnaíochta. Is féidir ateangairí a earcú mar ghníomhairí sealadacha freisin. Roghnaítear iarrthóirí as measc ateangairí creidiúnaithe ón liosta coiteann arna roinnt ag an gCoimisiún Eorpach, ag Parlaimint na hEorpa agus ag an gCúirt Bhreithiúnais.
Maidir leis an mbunachar sonraí idirinstitiúideach “EU CV online”, déantar lárú ar na hiarratais a fhaightear mar fhreagra ar ghlao buan ar iarratais nó ar ghlao sonrach ar léiriú spéise, chomh maith le hiarratais a fhaightear gan iarraidh.
> > Naisc úsáideacha:
