Rikors ippreżentat fl-20 ta' April 2010 - GEA Group vs Il-Kummissjoni
(Kawża T-189/10)
Lingwa tal-kawża: il-Ġermaniż
Partijiet
Rikorrenti: GEA Group AG (Bochum, il-Ġermanja) (rappreżentanti: A. Kallmayer, I. du Mont u G. Schiffers, avukati)
Konvenuta: Il-Kummissjoni Ewropea
Talbiet tar-rikorrenti
tannulla l-Artikolu 1 tad-deċiżjoni li temenda sa fejn jimponi multa fuq ir-rikorrenti;
sussidjarjament, tnaqqas il-multa imposta fuq ir-rikorrenti fl-Artikolu 1 tad-deċiżjoni li temenda;
tikkundanna lill-Kummissjoni Ewropea għall-ispejjeż.
Motivi u argumenti prinċipali
Ir-rikorrenti tikkontesta d-Deċiżjoni tal-Kummissjoni C (2010) 727 finali, tat-8 ta' Frar 2010, li temenda, b'mod partikolari sa fejn jirrigwardaha, id-Deċiżjoni C(2009) 8682 finali, tal-11 ta' Novembru 2009, fil-Każ COMP/38589 - Stabbilizzaturi tas-sħana (iktar 'il quddiem, id-"deċiżjoni ta' emenda"). L-emenda tirrigwarda il-punti 31 u 32 tal-Artikolu 2 tad-Deċiżjoni tal-Kummissjoni C(2009) 8682 finali, dwar ir-responsabbiltà in solidum tar-rikorrenti.
Ir-rikorrenti tinvoka ħames motivi insostenn tar-rikors tagħha.
L-ewwel nett, ir-rikorrenti tinvoka l-ksur tad-drittijiet ta' difiża tagħha peress li hija la ma nstemat u lanqas ma ġiet implikata fil-proċedura qabel ma ngħatat id-deċiżjoni. It-tieni nett, hija tinvoka motivazzjoni insuffiċjenti tad-deċiżjoni ta' emenda peress li din hija bbażata biss fuq in-nuqqas ta' teħid inkunsiderazzjoni tal-limitu massimu li għandu jiġi rrispettat stabbilit mill-Artikolu 23(2) tar-Regolament (KE) Nru 1/2003
1 u li hija nieqsa minn motivazzjoni individwali li tikkonċernaha. It-tielet nett, hija tinvoka n-nuqqas ta' bażi legali tad-deċiżjoni ta' emenda li diġà hija
res judicata fir-rigward ta' ċerti destinatarji u hija s-suġġett ta' rikorsi ġudizzjarji. Ir-raba' nett, ir-rikorrenti ssostni li l-emenda tal-multa kontriha hija illeċita. Fl-aħħar, hija tinvoka l-preskrizzjoni peress li d-deċiżjoni ta' emenda ngħatat wara l-iskadenza tat-terminu ta' preskrizzjoni previst fl-Artikolu 25(6) tar-Regolament Nru 1/2003.