Rikors ippreżentat fit-23 ta’ Ottubru 2023 – AF vs Il-Kunsill
(Kawża T-1047/23)
Lingwa tal-kawża: l-Ingliż
Partijiet
Rikorrent: AF (rappreżentant: A. Guillerme, avukat)
Konvenut: Il-Kunsill tal-Unjoni Ewropea
Talbiet
Ir-rikorrenti titlob li l-Qorti Ġenerali jogħġobha:
tannulla d-deċiżjonijiet tal-Awtorità tal-Ħatra tas-Segretarjat Ġenerali tal-Kunsill tas-16 ta’ Diċembru 2022 li timponi twissija skont l-Artikolu 3(1)(b) tal-Anness IX tar-Regolamenti tal-Persunal tal-Unjoni Ewropea lir-rikorrenti wara t-tmiem tal-proċeduri dixxiplinari li ma jinvolvux lill-Bord tad-Dixxiplina;
tannulla d-deċiżjoni tas-Segretarjat Ġenerali tal-Kunsill tas-6 ta’ Frar 2023 li tirrifjuta li tħallas lura l-ispejjeż legali sostnuti mir-rikorrenti, skont l-Artikolu 21 tal-Anness IX tar-Regolamenti tal-Persunal u tordna l-ħlas ta’ EUR 2 413.95;
tikkundanna lill-konvenut iħallas kumpens għad-dannu materjali u morali subit mir-rikorrenti minħabba d-deċiżjonijiet ikkontestati;
tikkundanna lill-konvenut għall-ispejjeż.
Motivi u argumenti prinċipali
Insostenn tar-rikors tagħha, ir-rikorrenti tinvoka l-motivi li ġejjin.
L-ewwel motiv, ibbażat fuq li, fir-rigward tal-illegalità tad-deċiżjoni tas-16 ta’ Diċembru 2022 li timponi twissija skont l-Artikolu 3(1)(b) tal-Anness IX tar-Regolamenti tal-Persunal, tliet irregolaritajiet proċedurali li jaffettwaw l-aġir tal- inkjesta amministrattiva, li ħallew impatt fuq il-legalità tad-deċiżjoni finali kkontestata:
il-Konsulenti Legali tal-Unità Amministrattiva ma kellhomx kompetenza sabiex iwettqu inkjesta amministrattiva fil-qasam tal-protezzjoni tad-data personali abbażi tal-Anness IX tar-Regolamenti tal-Persunal. Dan jammonta għal ksur tal-Artikolu 7(3) tad-Deċiżjoni 6/2021 tas-Segretarju Ġenerali tal-Kunsill li jadotta dispożizzjonijiet ġenerali ta’ implimentazzjoni dwar investigazzjonijiet amministrattivi u proċeduri dixxiplinarji (iktar ʼil quddiem id-“Deċiżjoni 6/2021”);
l-inkjesta amministrattiva ma twettqitx b’mod imparzjali, bi ksur tal-Artikolu 41(1) tal-Karta tad-Drittijiet Fundamentali tal-Unjoni Ewropea u tal-Artikolu 13 tad-Deċiżjoni 6/2021;
l-inkjesta amministrattiva ma twettqitx skont il-prinċipju ta’ amministrazzjoni tajba, bi ksur tad-drittijiet tad-difiża u tad-dmir li jiġu eżaminati l-fatti tal-każ b’kunsiderazzjoni xierqa tal-elementi favur u dawk li jiskaġunaw;
Fuq il-mertu, ir-rikorrenti ssostni li d-deċiżjoni kkontestata tas-16 ta’ Diċembru 2022 li timponi twissija hija illegali, peress li hija:
ibbażata fuq fatti mhux stabbiliti;
ivvizzjata bi żball manifest ta’ evalwazzjoni;
bi ksur tal-prinċipju ta’ proporzjonalità; u
bi ksur tal-prinċipju ta’ nondiskriminazzjoni.
It-tieni motiv, ibbażat fuq l-illegalità tad-deċiżjoni tas-6 ta’ Frar 2023 li tirrifjuta r-rimbors tal-onorarji tal-avukati sostnuti għad-difiża tar-rikorrenti matul il-proċeduri dixxiplinari li ma jinvolvux lill-Bord tad-Dixxiplina, li:
din id-deċiżjoni tikser l-Artikolu 21 tal-Anness IX tar-Regolamenti tal-Persunal li taħtu l-ispejjeż għandhom jitħallsu mill-amministrazzjoni meta l-proċeduri dixxiplinari ma jirriżultawx f’sanzjoni dixxiplinarja, kif inhu l-każ f’dan il-każ;
il-prinċipji ta’ amministrazzjoni tajba u ta’ nondiskriminazzjoni nkisru fir-rigward tal-interpretazzjoni mogħtija lir-Regolamenti tal-Persunal li tikkonsisti f’li ssir distinzjoni bejn id-dritt għar-rimbors tal-onorarji tal-avukati skont jekk ikunx involut Bord Dixxiplinari u, għall-ksur tad-dritt tad-difiża għal kull membru tal-persunal li jkun assistit minn avukat meta jiffaċċja proċeduri dixxiplinarji.
It-tielet motiv, ibbażat fuq, fir-rigward tat-talba għal kumpens finanzjarju għad-dannu materjali u morali subit, li, dan jikkorrispondi rispettivament għall-impatt negattiv fuq il-karriera tar-rikorrenti li jirriżulta fit-telf ċerta tal-opportunità li tiġi promossa fl-2023 u l-opportunità mnaqqsa b’mod sinjifikattiv li jiġi promoss fis-snin li ġejjin, u għad-dannu kkawżat lid-dinjità u r-reputazzjoni professjonali tagħha minħabba d-deċiżjoni illegali kkontestata tas-16 ta’ Diċembru 2022, li affettwatilha b’mod sever saħħitha.
____________