Caingean arna tabhairt an 19 Deireadh Fómhair 2023 – Markov v an Coimisiún
(Cás T-1050/23)
Teanga an cháis: an Béarla
Páirtithe
Iarratasóir: Yavor Markov (Sóifia, an Bhulgáir) (ionadaí: I. Stoynev, Dlíodóir)
Cosantóir: an Coimisiún Eorpach
An t-ordú atá á lorg
Iarrann an t-iarratasóir ar an gCúirt Ghinearálta:
Cinneadh an bhoird roghnúcháin an 29 Samhain 2022, cinneadh an bhoird roghnúcháin an 28 Feabhra 2023 agus cinneadh intuigthe ón Oifig Eorpach um Roghnú Foirne (EPSO) an 20 Iúil 2023 a chur ar neamhní;
cúiteamh as damáiste a bhronnadh faoi Airteagal 270 CFAE a mhaíonn an t-iarratasóir a d’fhulaing sé mar gheall ar chomórtas EPSO do dhlítheangeolaithe Bulgáirise EPSO/AD/383/21 (AD7) mar iarratasóir Uimh. 4657756, nuair a bhain sé céim dheireanach an chomórtais amach, eadhon an tIonad Measúnaithe;
a ordú don Choimisiún na costais a íoc.
Saincheisteanna dlí agus príomhargóintí
Mar thaca leis an gcaingean, maíonn an t-iarratasóir ceithre shaincheist dlí.
An chéad saincheist dlí lena n-éilítear nach bhféadfadh EPSO struchtúr agus raon na scrúdaithe cur i láthair ó bhéal a athrú go dleathach agus dá bhrí sin ní mór cinneadh an 29 Samhain 2022 a chur ar neamhní.
Mar thoradh ar na neamhrialtachtaí substainteacha i bpróiseas an chomórtais agus i gcásanna neamhchomhlíonta leis an dlí, sáraíodh ionchais dhlisteanacha an iarratasóra maidir le struchtúr agus raon na scrúdaithe cur i láthair ó bhéal (OP). Níor fhéad EPSO struchtúr agus raon an scrúdaithe a athrú go dleathach trí thriú cuid ar leith a chur leis a bhain d’eolas ar dhlí an Aontais Eorpaigh amháin.
An dara saincheist dlí lena n-éilítear gur chuir EPSO faisnéis mhíchruinn, doiléir, débhríoch, neamhsheasmhach agus frithráiteach ar fáil don iarratasóir go neamhdhleathach agus dá bhrí sin ní mór cinneadh an 29 Samhain 2022 a chur ar neamhní.
Rinne EPSO roinnt ráiteas ábhartha, go poiblí ar a shuíomh gréasáin oifigiúil agus go príobháideach ina theachtaireachtaí don iarratasóir. Tá siad ina gceangal ar EPSO i gcomhréir leis an gceart chun dea-riaracháin a chumhdaítear in Airteagal 41 de Chairt um Chearta Bunúsacha an Aontais Eorpaigh (“an Chairt”) agus an prionsabal patere legem quam ipse fecist. Bhraith an t-iarratasóir ar an bhfaisnéis seo ina chur chuige i leith na scrúdaithe OP agus chruthaigh sé ionchais dhlisteanacha faoi seach. Tharla go raibh an fhaisnéis a chur EPSO ar fáil míchruinn, doiléir, débhríoch, neamhsheasmhach agus frithráiteach. Mar thoradh díreach ar sin, níor éirigh leis an iarratasóir chomh maith agus a d’fhéadfadh sé.
An tríú saincheist dlí lena n-éilítear go raibh cinneadh an 28 Feabhra 2023 neamhdhleathach agus nach mór é a chur ar neamhní.
Ar an gcéad dul síos, tá cinneadh an 28 Feabhra 2023 neamhdhleathach toisc nach gcuirtear cinneadh an 29 Samhain 2022 ar neamhní, in ainneoin na n-argóintí a cuireadh ar fáil san iarraidh ar athbhreithniú. Ar an dara dul síos, sháraigh an bord roghnúcháin ceart an iarratasóra chun éisteacht a fháil toisc níor bhreithnigh an bord a chuid argóintí go léir ina ghearán agus bhreithnigh sé argóintí nach ndearna an t-iarratasóir, rud a sháraíonn Airteagal 41(2)(a) de Chairt. Ar an triú dul síos, leis na hargóintí a bhreithnigh sé, ní dhearna sé ach srac-mheasúnú orthu agus mar sin níl ach dearbhú lom a chinneadh . Dá bhrí sin agus chun gach intinne agus críche, mhainnigh an bord roghnúcháin cúiseanna a lua maidir leis a chinneadh an 28 Feabhra 2023, de shárú ar Airteagal 296(2) CFAE, Airteagal 41(2)(c) den Chairt agus a dualgas faoin gCód 1 a chinntí a mhíniú, toisc nár luaigh an cinneadh na cúiseanna is bun leo.
An ceathrú saincheist dlí lena n-éilítear nach mór cinneadh intuigthe EPSO an 20 Iúil 2023 a chur ar neamhní.
Sa mhéid gur dhearbhaítear le cinneadh intuigthe EPSO an 20 Iúil 2023 cinneadh an 28 Feabhra 2023, ní mór é a chur ar neamhní dá réir sin ar na cúiseanna a measadh thuas maidir le cinneadh an 28 Feabhra 2023.
____________
1 Cód um Dhea-Iompraíochta Riaracháin d’fhoireann an Choimisiúin Eorpaigh ina gcaidreamh leis an bpobal (dá dtagraítear san iarratas).