Rikors ippreżentat fl-20 ta' Frar 2009 - Franza vs Il-Kummissjoni

(Kawża T-79/09)

Lingwa tal-kawża: Il-Franċiż

Partijiet

Rikorrenti: Ir-Repubblika Fraċiża (rappreżentanti: E. Belliard, G. de Bergues u A. A.-L. Vendrolini, aġenti)

Konvenuta: Il-Kummissjoni tal-Komunitajiet Ewropej

Talbiet tar-rikorrenti

tannulla d-deċiżjoni kkontestata;

tikkundanna l-Kummissjoni għall-ispejjeż.

Motivi u argumenti prinċipali

Bir-rikors preżenti, ir-rikorrenti titlob li d-Deċiżjoni tal-Kummissjoni C(2008) 7486 finali, tal-10 ta' Diċembru 2008, li fiha l-Kummissjoni kkunsidrat li l-kontribuzzjonijiet volontarji li saru obbligatorji, miġbura mill-organizzazzjonijiet interprofessjonali fuq il-membri tal-professjonijiet li huma jirrapreżentaw, bil-għan li jiffinanzjaw l-azzjonijiet li jistgħu jiġu organizzati minn dawn l-organizzazzjonijiet, kienu jikkonstitwixxu għajnuna mill-Istat fis-sens tal-Artikolu 87(1) KE.

Insostenn tar-rikors tagħha, ir-rikorrenti ssostni, fir-rigward tal-mertu, motiv wieħed, ibbażat fuq:

ksur tal-kunċett ta' għajnuna mill-Istat fis-sens tal-Artikolu 87(1) KE, sa fejn il-Kummissjoni kkunsidrat, bil-kontra ta' dak li jsostni l-Gvern Franċiż, li dawn il-kontribuzzjonijiet volontarji obbligatorji jikkostitwixxu taxxi parafiskali, jiġifieri riżorsi tal-Istat, meta fil-fatt:

il-proċedura ta' rikonoxximent tal-organizzazzjonijiet interprofessjonali kif ukoll il-proċedura tal-proroga tal-ftehim interprofessjonali ma għandhomx jitqiesu li huma mezzi għall-Istat sabiex jimplementa politika partikolari li tkun imfassla minn qabel;

il-bażi tat-taxxa, l-ammont, l-allokazzjoni u l-użu tal-kontribuzzjonijiet volontarji obbligatorji huma ffissati mill-organizzazzjonijiet interprofessjonali fil-ftehim tagħhom, u l-awtoritajiet pubbliċi ma jintervjenu fl-ebda stadju;

il-kontribuzzjonijiet volontarji obbligatorji huma imperattivament użati għall-finanzjament tal-azzjonijiet li għalihom huma ddestinati u ma jitqegħdu qatt għad-dispożizzjoni tal-awtoritajiet pubbliċi;

il-persuni suġġetti għall-kontribuzzjoni volontarja obbligatorja neċessarjament jibbenefikaw mill-azzjonijiet finanzjati minn dawn tal-aħħar u l-operaturi kollha jħallsu t-tariffa bħala xerrejja jew bejjiegħa tal-prodott ikkonċernat.

____________