Achomharc arna thabhairt an 8 Márta 2024 agus Air France-KLM agus Société Air France i gcoinne bhreithiúnas na Cúirte Ginearálta (an tOchtú Dlísheomra, an Comhdhéanamh Méadaithe) a tugadh an 20 Nollaig 2023 i gCás T-494/21, Ryanair agus Malta Air v an Coimisiún
(Cás C-193/24 P)
Teanga an cháis: an Béarla
Páirtithe
Achomharcóirí: Air France-KLM, Société Air France (ionadaithe: J. Derenne, D. Vallindas, avocats, A. Álvarez Vidal, abogada)
Páirtithe eile sna himeachtaí: Ryanair DAC, Malta Air ltd., an Coimisiún Eorpach, Poblacht Chónaidhme na Gearmáine, Poblacht na Fraince, Ríocht na hÍsiltíre
An t-ordú atá á lorg
Iarrann an t-achomharcóir ar an gCúirt Ghinearálta:
an breithiúnas atá faoi achomharc a chur ar ceal;
leas a bhaint as a chumhacht faoin dara habairt den chéad mhír d’Airteagal 61 de Reacht Chúirt Bhreithiúnais an Aontais Eorpaigh chun breithiúnas críochnaitheach a thabhairt san ábhar agus chun an chaingean le haghaidh neamhniú arna taisceadh i gCás T-494/21 a dhíbhe;
de rogha air sin, an cás a tharchur ar ais chuig an gCúirt Ghinearálta chun na pléadálacha nach ndearnadh measúnú orthu cheana a bhreithniú, agus
a ordú do Ryanair DAC agus Malta Air ltd costais na n-imeachtaí achomhairc agus na gcostas sin ar an gcéad chéim a íoc, má thugann sí breithiúnas críochnaitheach ar an ábhar, nó costais na n-imeachtaí reatha a fhorchoimeád, má tharchuireann sí an cás ar ais chuig an gCúirt Ghinearálta.
Saincheisteanna dlí agus príomhargóintí
An chéad saincheist: Chuir an Chúirt Ghinearálta caighdeán mícheart i bhfeidhm chun tairbhí na cabhrach a chinneadh laistigh de ghrúpa corparáideach agus, dá bhrí sin, tháinig sí ar an gconclúid mhícheart nach bhféadfaí KLM a eisiamh ó thairbhí an bhirt cabhrach atá i gceist.
An dara saincheist: Chuir an Chúirt Ghinearálta a measúnú féin in ionad chinneadh thairbhí na cabhrach gan earráid fhollasach measúnaithe a shuíomh go leordhóthanach ar an gcinneadh 1 ón gCoimisiún Eorpach atá faoi chonspóid.
An tríú saincheist: Rinne an Chúirt Ghinearálta earráid dlí ina léiriú ar choincheapa an bhuntáiste indírigh agus na n-éifeachtaí tánaisteacha i réimse na Státchabhrach.
____________
1 Cinneadh C(2021) 2488 final ón gCoimisiún an 5 Aibreán 2021 i gCás SA.59913 (2021/N) – An Fhrainc – COVID-19 – Athchaipitliú Air France agus Air France-KLM Holding.