Rikors ippreżentat fil-21 ta' April 2010 - Spanja vs Il-Kummissjoni
(Kawża T-178/10)
Lingwa tal-kawża: l-Ispanjol
Partijiet
Rikorrent: Ir-Renju ta' Spanja (rappreżentant: N. Diaz Abad)
Konvenuta: Il-Kummissjoni Ewropea
Talbiet tar-rikorrenti
Tannulla d-deċiżjoni tal-Kummissjoni, tat-22 ta' Frar 2010, li permezz tagħha ġiet deċiża s-sospensjoni ta' talbiet għall-ħlasijiet interim imressqa minn Spanja bejn is-17 ta' Novembru u t-30 ta' Diċembru 2009 u, sussidjarjament, tannulla parzjalment l-imsemmija deċiżjoni fir-rigward tat-talbiet għall-ħlasijiet interim li ġejjin:
2007ES161PO008 Andalucía EUR 94 370 752.75
2007ES161PO008 Andalucía EUR 479 712 483.22
2007ES162PO001 Cantabria EUR 4 697 332.79
2007ES162PO006 Cataluña EUR 15 392 569.98
2007ES162PO008 Aragón EUR 12 451 358.48
tiddikjara li l-Kummissjoni Ewropea kienet obbligata tħallas l-interessi minħabba d-dewmien fil-ħlas effettiv tat-talbiet interim indebitament iffriżati, u
tikkundanna lill-Kummissjoni Ewropea għall-ispejjeż.
Motivi u argumenti prinċipali
Il-preżenti rikors huwa intiż kontra d-deċiżjoni tal-konvenuta li tinterrompi t-terminu perentorju għall-ħlas fir-rigward ta' ċerti talbiet għall-ħlasijiet imressqa minn Spanja bejn is-17 ta' Novembru u t-30 ta' Diċembru 2009. Din l-interruzzjoni taffettwa għoxrin talba għall-ħlasijiet interim għal ammont totali ta' EUR 1 890 708 859.51.
Insostenn tat-talbiet tiegħu r-rikorrent jinvoka l-motivi li ġejjin:
Ksur tal-Artikolu 91(1)(a) tar-Regolament Nru 1083/2006
1, sa fejn il-Kummissjoni, mingħajr ma pprovdiet rapport ta' korp ta' verifika nazzjonali jew Komunitarju li juri li hemm nuqqas sinjifikattiv fil-funzjonament tas-sistemi ta' ġestjoni u kontroll u mingħajr ma kien jeżisti dan in-nuqqas, interrompiet, permezz tad-deċiżjoni kkontestata, it-terminu perentorju għall-ħlas fir-rigward ta' ċerti talbiet għall-ħlasijiet imressqa minn Spanja.
Ksur tal-istrateġiji ta' kontroll adottati mill-Kummissjoni minħabba li l-Kummissjoni interrompiet it-terminu perentorju għall-ħlas tal-imsemmija ħlasijiet interim peress li kkunsidrat li n-nuqqas ta' verifiki tas-sistemi jikkostitwixxi dewmien sinjifikattiv fl-eżekuzzjoni tal-istrateġiji, filwaqt li l-imsemmija strateġiji jagħtu lir-Renju ta' Spanja sat-30 ta' Ġunju 2010 sabiex jippreżenta l-imsemmija verifiki.
Ksur tal-prinċipju ta' ċertezza legali, sa fejn id-deċiżjoni kkontestata teżiġi li r-Renju ta' Spanja jippreżenta l-verifiki tas-sistema iktar kmieni mill-iskeda miftiehma mal-Kummissjoni nnifisha, minkejja li din l-eżiġenza ma kinitx prevedibbli għall-awtoritajiet Spanjoli.
Ksur tal-prinċipju ta' protezzjoni tal-aspettattivi leġittimi, sa fejn l-awtoritajiet nazzjonali aġixxew fid-dawl ta' skedi ta' verifika li l-Kummissjoni kienet approvat fl-istrateġiji, skeda li kienet qed tiġi osservata, mingħajr ma kien hemm xi indikazzjoni min-naħa tal-Kummissjoni li hija kienet tissuspetta li kien hemm xi nuqqas fis-sistema ta' ġestjoni u kontroll.
Ksur tal-prinċipju ta' proporzjonalità, sa fejn il-miżura adottata mill-Kummissjoni hija sproporzjonata u tmur kontra ġestjoni finanzjarja effikaċi u sa fejn jeżistu strumenti ġuridiċi oħra li huma inqas onerużi sabiex jintlaħaq l-istess għan.
Sussidjarjament, ir-rikorrent jitlob li d-deċiżjoni kkontestata tiġi annullata parzjalment minħabba ksur tal-Artikoluż 87(2) tar-Regolament Nru 1083/2006, sa fejn il-ħlas tat-talbiet għall-ħlas inkwistjoni ma sarx fit-terminu ta' xahrejn mill-preżentazzjoni tat-talba.
Fl-aħħar nett, ir-Renju ta' Spanja jitlob il-ħlas ta' interessi moratorji skont l-Artikolu 87(2) tar-Regolament tal-Kummissjoni Nru 1083/2006, l-Artikolu 83 tar-Regolament tal-Kummissjoni Nru 1605/2002
2 u l-Artikolu 106(5) tar-Regolament tal-Kummissjoni Nru 2342/2002
3.