Rikors ippreżentat fl-14 ta’ Mejju 2024 – Il-Kummissjoni Ewropea vs L-Irlanda
(Kawża C-346/24)
Lingwa tal-kawża: l-Ingliż
Partijiet
Rikorrent: Il-Kummissjoni Ewropea (rappreżentanti: L. Armati u E. Sanfrutos Cano, aġenti)
Konvenut: L-Irlanda
Talbiet
tikkonstata li, billi naqset milli tissodisfa l-obbligi tagħha relatati mar-reviżjoni, l-aġġornament u l-komunikazzjoni, sat-22 ta’ Marzu 2022, tal-pjanijiet ta’ mmaniġġjar tal-baċin tax-xmara, l-Irlanda naqset milli tissodisfa l-obbligi tagħha taħt l-Artikolu 13(7) u l-Artikolu 15(1) tad-Direttiva 2000/60/KE tal-Parlament Ewropew u tal-Kunsill li tistabilixxi qafas għal azzjoni Komunitarja fil-qasam tal-politika ta’ l-ilma 1 (iktar ʼil quddiem id-“Direttiva Qafas dwar l-Ilma” jew id-“Direttiva”);
tikkundanna lill-Irlanda għall-ispejjeż.
Motivi u argumenti prinċipali
It-terminu għat-traspożizzjoni tad-Direttiva skada fit-22 ta’ Marzu 2022.
Id-Direttiva Qafas dwar l-Ilma tiffoka fuq l-iżgurar tas-saħħa kwalitattiva u kwantitattiva tajba tal-korpi tal-ilma Ewropej, bħax-xmajjar u l-lagi. Għandha l-għan li tnaqqas u tneħħi t-tniġġis kif ukoll li tjiżgura li jkun hemm biżżejjed ilma biex isostni fl-istess ħin il-bżonnijiet tal-bniedem u dawk tal-fawna u l-flora.
Taħt id-Direttiva Qafas dwar l-Ilma, l-Istati Membri għandhom jirrevedu, jaġġornaw u jikkomunikaw il-pjanijiet ta’ mmaniġġjar tal-baċin tax-xmara (PMBX) tagħhom kull sitt snin. Id-Direttiva daħlet fis-seħħ fit-22 ta’ Diċembru 2000. L-ewwel pjanijiet ta’ mmaniġġjar tal-baċin tax-xmara kellhom jiġu adottati sat-22 ta’ Diċembru 2009 u l-ewwel reviżjoni u aġġornament tagħhom sat-22 ta’ Diċembru 2015.
L-Istati Membri kellhom jirrevedu u jaġġornaw il-PMBX tagħhom għat-tieni darba sat-22 ta’ Diċembru 2021, u jibagħtu kopji ta’ dawk il-pjanijiet aġġornati (l-hekk imsejjaħ “PMBX tat-tielet ġenerazzjoni”) sat-22 ta’ Marzu 2022.
Minkejja li t-terminu tat-22 ta’ Marzu 2022 ilu li għadda, il-Kummissjoni għadha ma rċevietx il-kopji mill-Irlanda tal-pjanijiet aġġornati ta’ mmaniġġjar tal-baċin tax-xmara. Dan huwa ksur tal-Artikolu 15(1) tad-Direttiva.
Mit-tweġibiet tal-Irlanda matul fil-fażi amministrattiva jirriżulta wkoll kjarament li l-Irlanda għadha ma rrevedietx u ma aġġornatx dawn il-pjanijiet. Konsegwentement, il-Kummissjoni tqis li l-Irlanda qed tikser l-obbligi tagħha taħt l-Artikolu 13(7) tad-Direttiva li tirrevedi u taġġorna l-pjanijiet tagħha ta’ mmaniġġjar tal-baċin tax-xmara.
____________
1 ĠU Edizzjoni Speċjali bil-Malti, Kapitolu 15, Vol. 5, p. 275