Rikors ippreżentat fis-27 ta' Jannar 2010 - CECA SA vs Il-Kummissjoni Ewropea
(Kawża T-24/10)
Lingwa tal-kawża: l-Ingliż
Partijiet
Rikorrenti: CECA SA (La Garenne Colombes, Franza) (rappreżentanti: J. Joshua, Barrister, E. Aliende Rodríguez, avukat)
Konvenuta: Il-Kummissjoni Ewropea
Talbiet tar-rikorrenti
tannulla l-Artikoli 1(1) u (2) tad-Deċiżjoni tal-Kummissjoni C(2009)8682 tal-11 ta' Novembru 2009, sa fejn jirrigwarda lir-rikorrenti u, f'kull każ, tannulla l-Artikolu 1(1) sa fejn jikkonstata li r-rikorrenti pparteċipat fi ksur fis-suq tal-istabbilizzaturi tal-landa bejn is-16 ta' Marzu 1994 u l-31 ta' Marzu 1996;
tħassar il-multi imposti fuq ir-rikorrenti fl-Artikolu 2;
jekk il-Qorti Ġenerali ma tannullax il-multi fit-totalità tagħhom, sussidjarjament tnaqqashom skont il-kompetenza tagħha;
tikkundanna lill-Kummissjoni għall-ispejjeż.
Motivi u argumenti prinċipali
Permezz ta' dan ir-rikors, qed jintalab l-annullament tad-deċiżjoni tal-Kummissjoni tal-11 ta' Novembru 2009 fil-Każ COMP/38.589 - Stabbilizzaturi tas-sħana, li tikkonstata li r-rikorrenti pparteċipat f'żewġ każijiet ta' ksur separati tal-Artikolu 81 KE (li issa sar l-Artikolu 101 TFEU), wieħed fis-settur tal-istabbilizzaturi tal-landa u l-ieħor fl-ESBO, u timponi multa għal kull ksur.
Ir-rikorrenti tressaq il-motivi li ġejjin insostenn tar-rikors tagħha:
L-ewwel nett, hija ssostni li, permezz ta' applikazzjoni korretta tal-Artikolu 25 tar-Regolament (KE) Nru 1/2003
1, il-Kawża Akzo
2, ma tissospendix il-prekrizzjoni u s-setgħa tal-Kummissjoni li timponi multi kienet preskritta għaż-żewġ każijiet ta' ksur taħt il-preskrizzjoni ta' għaxar snin li tirriżulta mit- "terminu doppju ta' preskrizzjoni". Ir-rikorrenti ssostni li l-Kummissjoni wettqet żball ta' liġi meta kkonstatat li l-perijodu li fih il-proċedura li tirrgwarda l-kumpannija Akzo kienet quddiem il-Qorti Ġenerali wassal għas-sospensjoni tal-preskrizzjoni u kkonkludiet b'mod żbaljat li l-preskrizzjoni ta' għaxar snin stabbilita mill-Artikolu 25(5) tal-imsemmi regolament setgħet tiġi estiża f'din il-kawża.
It-tieni nett, ir-rikorrenti ssostni li l-Kummissjoni ma wriet l-ebda interess leġittimu sabiex tikkonstata ksur li fir-rigward tiegħu ma kellha l-ebda setgħa timponi multi. Fil-fatt, ir-rikorrenti ssostni li l-Artikolu 7(1) tar-Regolament 1/2003 jippermetti lill-Kummissjoni tikkonstata li seħħ ksur anki jekk ma timponix multa, sakemm jintwera li l-Kummissjoni għandha interess leġittimu.
It-tielet nett, u b'mod indipendenti mill-ewwel żewġ motivi, ir-rikorrenti titlob lill-Qorti Ġenerali tannulla l-konstatazzjonijiet magħmula fl-Artikolu 1(1) tad-deċiżjoni kkontestata li skonthom hija pparteċipat fi ksur fis-settur tal-istabbilizzaturi tal-landa bejn il-perijodu tas-16 ta' Marzu 1994 sal-31 ta' Marzu 1996, u ssostni li l-Kummissjoni ma wriet l-ebda interess leġittimu sabiex tipproċedi għal tali konstatazzjonijiet.
Ir-raba' nett, jekk il-Qorti Ġenerali ma tannullax il-multi fit-totalità tagħhom, ir-rikorrenti ssostni li l-Kummissjoni ma wrietx li l-ksur baqa' għaddej wara t-23 ta' Frar 1999 u li għaldaqstant il-multa imposta għat-tieni perijodu ta' akkordju għandha titnaqqas sabiex tirrefletti dewmien iqsar tal-ksur.
____________1 - Regolament tal-Kunsill (KE) Nru 1/2003 tas-16 Diċembru 2002 fuq l-implimentazzjoni tar-regoli tal-kompetizzjoni mniżżlin fl-Artikoli 81 u 82 tat-Trattat (Edizzjoni Speċjali bil-Malti: Kapitolu 8, Vol. 2, p. 205)2 - Sentenza tal-Qorti Ġenerali tas-17 ta' Settembru 2007, fil-Kawżi magħquda T-125/03 u T-253/03, Akzo Nobel Chemicals u Akcros Chemicals vs Il-Kummissjoni (ĠU C 269, 10.11.2007)