Achomharc arna thabhairt an 4 Aibreán 2022 ag Mylan IRE Healthcare Ltd i gcoinne bhreithiúnas na Cúirte Ginearálta (Naoú Dlísheomra) a tugadh an 26 Eanáir 2022 i gCás T-303/16, Mylan IRE Healthcare v An Coimisiún
(Cás C-237/22 P)
Teanga an cháis: an Béarla
Páirtithe
Iarratasóir: Mylan IRE Healthcare Ltd (ionadaí: I. Vernimme agus L. Bidaine, dlíodóirí)
Páirtithe eile sna himeachtaí: An Coimisiún Eorpach, UAB VVB
An t-ordú atá á lorg
Iarann an t-iarratasóir ar an gCúirt:
A dhearbhú go bhfuil an t-iarratas inghlactha agus go bhfuil bunús maith leis;
an breithiúnas atá faoi achomharc a chur ar ceal go hiomlán;
má mheasann an Chúirt go gceadófar a leithéid le staid na n-imeachtaí, go ndéanfaí Cinneadh Cur Chun Feidhme C(2016) 2083 final ón gCoimisiún, an 4 Aibreán 2016, maidir, faoi chuimsiú Airteagal 29 de Threoir 2001/83/CE ó Pharlaimint na hEorpa agus ón gComhairle, leis na húdaruithe margaíochta do tháirgí íocshláinte “Tobramycin VVB agus ainmneacha gaolmhara” lena n-úsáid ag an duine ina bhfuil an tsubstaint ghníomhach “tobramycine” (an cinneadh atá faoi chonspóid) a neamhniú; mura ndéanfar, an cás a tharchur ar ais chuig an gCúirt Ghinearálta;
a ordú don Choimisiún na costais arna dtabhú ag an iarratasóir sna himeachtaí seo agus sna himeachtaí ag an gcéad chéim a íoc.
a ordú do UAB VVB a chostais féin arna dtabhú sna himeachtaí seo agus sna himeachtaí ag an gcéad chéim a íoc.
Saincheisteanna dlí agus príomhargóintí
Mar thaca leis an gcaingean, maíonn an t-iarratasóir dhá shaincheist dlí.
An chéad saincheist dlí lena n-éilítear earráid dlí i léiriú an choincheapa “airde chliniciúil” de réir bhrí Airteagal 8(3)(c) Rialachán (CE) Uimh. 141/2000 ó Pharlaimint na hEorpa agus ón gComhairle an 16 Nollaig 1999 maidir le táirgí íocshláinte dílleachta1 (an Rialachán Dílleachta), go háirithe i bhfianaise léiriú na Cúirte Ginearálta ar an gcoincheap “leas shuntasach” de réir bhrí Airteagal 3 an Rialacháin Dílleachta.
An dara saincheist dlí lena n-éilítear go raibh réasúnaíocht neamhleor ag an gCúirt Ghinearálta le bunús a chur lena cinneadh go raibh TOBI/Tobramycin VVB ní ba shlándála ná Tobi Podhaler i gcuid shubstaintiúil den spriocghrúpa, go háirithe i bhfianaise inneachar an chinnidh atá faoi chonspóid.
____________
1 IO 2000 L 18, lch 1.