Iarraidh ar réamhrialú ó Sofiyski gradski sad (an Bhulgáir) a taisceadh an 26 Deireadh Fómhair 2023 – Imeachtaí coiriúla i gcoinne IR
(Cás C-644/23, Stangalov) 1
Teanga an cháis: an Bhulgáiris
An chúirt a rinne an tarchur
Sofiyski gradski sad
Páirtí sna príomhimeachtaí
IR
Na ceisteanna a tharchuirtear
An bhfuil i gcomhréir le hAirteagal 9 de Threoir 2016/343, 1 arna léamh i gcomhar le hAirteagal 8(4) agus (2) di, foráil dlí náisiúnta – an chéad rogha den dara habairt d’Airteagal 423 de NPK – ar dá réir nach bhfuil ceart ag cosantóir a ciontaíodh in absentia chun trialach nua ina bhfuil sé i láthair más rud é gur éalaigh sé tar éis a bheith curtha ar an eolas faoin gcúiseamh i dtéarmaí an-ghinearálta le linn na céime réamhthrialaí, agus gurbh é an t-éalú sin féin a d’fhág nárbh fhéidir an cosantóir a chur ar an eolas faoi na cúisimh iomlána, faoin triail a tionscnaíodh de bhun na gcúiseamh sin nó na hiarmhairtí mar gheall ar gan bheith i láthair ag an triail sin – agus freisin nach bhfuil an ceart ag an gcosantóir sin chun trialach nua agus é i láthair más rud é go bhfuil sé á chosaint ag dlíodóir a cheaptar de thionscnamh na cúirte féin, gan beann air nach raibh an cosantóir i dteagmháil leis an dlíodóir sin?
Más freagra diúltach a thabharfar ar an gcéad cheist, an gcuirtear d’oibleagáid nó an gceadaítear le hAirteagal 8 de Threoir 2016/343 agus le hAirteagal 47 den Chairt don chúirt a rinne an tarchur diúltú do thuillteanas cúiseamh arna dtabhairt i gcoinne cosantóir den sórt sin a scrúdú agus diúltú do bhreithiúnas a thabhairt ina choinne in absentia má tá an chúirt sin cinnte, ar bhonn faisnéis iontaofa, nach ndeonóidh an t-údarás náisiúnta breithiúnach is uachtaraí, a bhfuil dlínse eisiach aige breith a thabhairt ar iarratas arna dhéanamh ag cosantóir a ciontaíodh in absentia agus ar thriail nua ina mbeidh sé i láthair, iarratas ar imeachtaí den sórt sin agus nach n-athosclóidh sé na himeachtaí sin, a mhéid nach gcuirfidh sé i bhfeidhm an riail a leagtar amach in Airteagal 9 den Treoir, arna léamh i gcomhar le hAirteagal 8(4) agus (2) di, ach seachas sin go gcuirfidh sí i bhfeidhm an dlí náisiúnta agus dá bhrí sin go séanfaidh sé an ceart don chosantóir a ciontaíodh in absentia, a ráthaítear le dlí an Aontais Eorpaigh, chun bheith i láthair ag imeachtaí coiriúla?
____________
1 Is ainm bréige é an t-ainm sa chás seo. Ní fhreagraíonn sé d’fhíorainm aon pháirtí sna príomhimeachtaí.
1 Treoir (AE) 2016/343 ó Pharlaimint na hEorpa agus ón gComhairle an 9 March 2016 maidir le neartú ar ghnéithe áirithe de thoimhde na neamhchiontachta agus den cheart chun bheith i láthair le linn na trialach in imeachtaí coiriúla (IO 2016 L 65, lch. 1).