Iarraidh ar réamhrialú ón Cour de cassation (an Fhrainc) a taisceadh an 22 Lúnasa 2023 – Societa Italiana Lastre SpA v Agora
(Cás C-537/23, Societa Italiana Lastre)
Teanga an cháis: an Fhraincis
An chúirt a rinne an tarchur
Cour de cassation
Páirtithe sna príomhimeachtaí
Iarratasóir: Societa Italiana Lastre SpA (SIL)
Cosantóir: Agora SARL
Na ceisteanna a tharchuirtear:
Nuair atá clásal dlínse neamhshiméadraí nach dtugtar an fhéidearthacht cúirt a roghnú atá inniúil faoi rialacha an ghnáth-dhlí ach atá difriúil ón gcúirt arna hainmniú sa chlásal sin ach do cheann amháin de na páirtithe agus nuair a áitíonn an páirtí eile go bhfuil an clásal mídhleathach toisc go bhfuil sé ró-mhíchruinn agus/nó go bhfuil sé claonta, ar cheart an cheist sin a chinneadh i gcomhréir le rialacha neamhspleácha arna ngabháil ó Airteagal 25(1) de Rialachán an Bhruiséil Ia 1 agus cuspóir na hintuarthachta agus na deimhneachta dlíthiúla a shaothraítear leis an Rialachán sin, nó ar cheart é a chinneadh trí dhlí an Bhallstáit atá ainmnithe leis an gclásal a chur i bhfeidhm? I bhfocail eile, an mbaineann sé le bailíocht shubstainteach an chlásail, de réir bhrí na forála sin? Nó ar cheart léiriú dian a dhéanamh ar bhailíocht shubstainteach an chlásail agus ar cheart a mheas nach mbaineann sé ach leis na forais neamhbhailíochta ábhartha, lena n-áirítear, go príomha, calaois, earráid, meabhlaireacht, foréigean agus éagumas?
Má tá an cheist maidir le míchruinneas nó claonadh an chlásail le cinneadh i gcomhréir le rialacha neamhspleácha, an gcaithfear Airteagal 25(1) de Rialachán an Bhruiséil Ia a léiriú sa chaoi gur cheart nó nár cheart clásal a chur i bhfeidhm má cheadaítear leis do pháirtí amháin imeachtaí a thionscnamh os comhair na cúirte céanna nó os comhair aon chúirt eile atá inniúil faoin ngnáth-dhlí?
Más coinníoll substainteach í neamhshiméadracht an chlásail, conas ba cheart léiriú a dhéanamh ar Airteagal 25(1) de Rialachán an Bhruiséil I, go háirithe maidir leis an riachtanas dul ar iontaoibh dhlí Stáit na cúirte a ainmníodh i gcás ina bhfuil roinnt cúirteanna ainmnithe sa chlásal, nó i gcás ina n-ainmnítear cúirt amháin sa chlásal ach go bhforáiltear don bhféidearthacht ag ceann de na páirtithe cúirt eile a roghnú ach i gcás nár feidhmíodh an rogha sin go nuige sin ar an dáta ina dtógtar an tsaincheist os comhair cúirte:
– An gcaithfear dlí naisiúnta infheidhme na cúirte aonair sin a ainmniú go sainráite, fiú dá bhféadfaí imeachtaí a thionscnamh os comhair cúirteanna eile?
– I gcás ina bhfuil roinnt cúirteanna ainmnithe, an féidir dul ar iontaoibh dhlí na cúirte ina bhfuil imeachtaí tionscanta go hiarbhír?
– Ar deireadh, i bhfianaise aithris 20 de Rialachán Ia an Bhruiséil, ar cheart a thuiscint gurb é atá le tuiscint le dul ar iontaoibh dhlí an Ballstáit atá ainmnithe ná rialacha ábhartha an Stáit agus a rialacha maidir le heasaontacht dlíthe?
____________
1 Rialachán (AE) Uimh.1215/2012 ó Pharlaimint na hEorpa agus ón gComhairle, an 12 Nollaig 2012, maidir le dlínse agus le haithint agus forghníomhú breithiúnas in ábhair shibhialta agus trachtála (IO 2012, L 351, lch. 1)