Sentenza tal-Qorti tal-Ġustizzja (Ir-Raba' Awla) tad-29 ta' Ottubru 2009 (talba għal deċiżjoni preliminari tal-Østre Landsret - id-Danimarka) - NCC Construction Danmark A/S vs Skatteministeriet
(Sitt Direttiva tal-VAT - Artikolu 19(2) - Tnaqqis tat-taxxa tal-input imħallsa - Persuna taxxabbli mħallta - Oġġetti u servizzi użati kemm għal attivitajiet taxxabbli kif ukoll għal attivitajiet eżenti - Kalkolu tal-proporzjon imnaqqas - Kunċett ta' 'transazzjoni inċidentali għal [marbuta ma'] beni immobbli' - Provvisti għaliha nnifisha - Prinċipju ta' newtralità fiskali)
Lingwa tal-kawża: Id-Daniż
Qorti tar-rinviju
Østre Landsret
Partijiet fil-kawża prinċipali
Rikorrenti: NCC Construction Danmark A/S
Konvenuta: Skatteministeriet
Suġġett
Talba għal deċiżjoni preliminari - Østre Landsret - Interpretazzjoni tat-tieni sentenza tal-Artikolu 19(2) tas-Sitt Direttiva 77/388/KEE: Is-Sitt Direttiva tal-Kunsill 77/388/KEE, tas-17 ta' Mejju 1977, fuq l-armonizzazzjoni tal-liġijiet tal-Istati Membri dwar taxxi fuq id-dħul mill-bejgħ - Sistema komuni ta' taxxa fuq il-valur miżjud: bażi uniformi ta' stima - Kumpannija tal-kostruzzjoni li hija involuta fil-bejgħ ta' immobbli, mibnija minnha u f'isimha stess bil-għan finali ta' bejgħ - Oġġetti u s-servizzi użati kemm għal attivitajiet li jagħtu kif ukoll għal dawk li ma jagħtux lok għal dritt tat-tnaqqis ta' l-input VAT- Kalkolu tal-proporzjon imnaqqas - Kunċett ta' tranżazzjonijiet inċidentali għal beni immobbli
Dispożittiv
1) L-Artikolu 19(2) tas-Sitt Direttiva tal-Kunsill 77/388/KEE, tas-17 ta' Mejju 1977, fuq l-armonizzazzjoni tal-liġijiet tal-Istati Membri dwar taxxi fuq id-dħul mill-bejgħ - Sistema komuni ta' taxxa fuq il-valur miżjud: bażi uniformi ta' stima, għandu jiġi interpretat fis-sens, fil-każ ta' impriża ta' kostruzzjoni, il-bejgħ minnha ta' beni immobbli mibnija f'isimha stess, ma jistax jiġi kklassifikat bħala "transazzjoni inċidentali għal [marbuta ma'] beni immobbli" fis-sens ta' din id-dispożizzjoni, peress li din l-attività tikkostitwixxi estensjoni diretta, permanenti u neċessarja tal-attività taxxabbli tagħha. F'dawn iċ-ċirkustanzi, mhemmx lok li jiġi evalwat sa liema punt din l-atttività ta' bejgħ, ikkunsidrata separatament, timplika użu ta' oġġetti u ta' servizzi li għalihom hija dovuta l-VAT.
2) Il-prinċipju ta' newtralità fiskali ma jistax jipprekludi lil impriża ta' kostruzzjoni, li tħallas il-VAT fuq servizzi ta' kostruzzjoni li hija twettaq f'isimha stess (provvista għaliha nnifisha), li ma tnaqqasx integralment il-VAT fuq l-ispejjeż ġenerali sostnuti mit-twettiq ta' dawn is-servizzi, peress li d-dħul mill-bejgħ li jirriżulta mill-bejgħ tal-kostruzzjoni mwettqa b'dan il-mod huma eżenti mill-VAT.
____________1 - ĠU C 171, 05.07.2008.