Rikors ippreżentat fit-23 ta' April 2010 - Reagens vs Il-Kummissjoni
(Kawża T-181/10)
Lingwa tal-kawża: l-Ingliż
Partijiet
Rikorrenti: Reagens SpA (San Giorgio di Piano, l-Italja) (rappreżentanti: B. O'Connor, solicitor u L. Toffoletti, D. Gullo u E. De Giorgi, avukati)
Konvenuta: Il-Kummissjoni Ewropea
Talbiet tar-rikorrenti
tannulla d-deċiżjoni tal-Kummissjoni tat-23 ta' Frar 2010 mogħtija fil-kuntest tal-applikazzjoni konfermatorja għal aċċess ta' dokumenti GESTDEM 2009/5145 (SG.E.3/HP/cr-Ares (2010)95823);
tobbliga lill-Kummissjoni sabiex id-dokumenti elenkati fil-paġna 3 tad-deċiżjoni kkontestata jkunu disponibbli b'mod pubbliku (fil-forma mhux kunfidenzjali tagħhom); u
tikkundanna lill-Kummissjoni għall-ispejjeż.
Motivi u argumenti prinċipali
Permezz tar-rikors tagħha, ir-rikorrenti titlob, abbażi tal-Artikolu 263 TFUE, l-annullament tad-deċiżjoni tal-Kummissjoni, tat-23 ta' Frar 2010, mogħtija fil-kuntest tal-applikazzjoni konfermatorja għal aċċess ta' dokumenti GESTDEM 2009/5145 (SG.E.3/HP/cr-Ares (2010)95823), dwar proċedura taħt ir-Regolament (KE) Nru 1049/2001
1. Id-deċiżjoni kienet tirrigwarda aċċess għal dokumenti dwar applikazzjonijiet għal nuqqas ta' kapaċità li tħallas multa imposta fuq ir-rikorrenti għal ksur tal-Artikoli 81 KE u 53 KEEA (Każ COMP/38589 − Heat Stabilisers).
Insostenn tal-argumenti tagħha, ir-rikorrenti ssostni l-motivi segwenti:
Il-Kummissjoni wettqet żball manifest ta' liġi meta applikat b'mod wiesa' l-eċċezzjonijiet taħt l-Artikolu 4 tar-Regolament Nru 1049/2001.
Barra minn hekk, il-Kummissjoni wettqet żball ta' liġi meta ċaħdet it-talba għal aċċess għal dokumenti fuq il-bażi ta' difiża tal-interessi kummerċjali tal-kumpannija u sabiex tipproteġi l-għan tal-investigazzjoni.
Barra minn hekk, il-Kummissjoni kisret id-dritt tar-rikorrenti li jkollha aċċess għall-verżjonijiet mhux kunfidenzjali tad-dokumenti taħt ir-Regolament Nru 1049/2001, billi ċaħdet l-aċċess parzjali.
Fl-aħħar nett, il-Kummissjoni kisret l-prinċipju ta' amministrazzjoni tajba, tal-aspettattivi leġittimi, kif ukoll il-prinċipju li l-amministrazzjoni għandha tkun legali, billi ċaħdet l-aċċess għall-informazzjoni meħtieġa sabiex tistabbilixxi kif il-Kummissjoni tapplika l-paragrafu 35 tal-Linji Gwida dwar il-metodu tal-kalkoli tal-multi
2.