Achomharc arna thabhairt an 22 Meán Fómhair 2023 ag an Ungáir i gcoinne bhreithiúnas na Cúirte Ginearálta (an Chéad Dlísheomra) an 12 Iúil 2023 i gCás T-491/21, an Ungáir v an Coimisiún
(Cás C-587/23 P)
Teanga an cháis: an Ungáiris
Páirtithe
Achomharcóir: an Ungáir (ionadaithe: M. Z. Fehér agus G. Koós, Gníomhairí)
Páirtí eile sna himeachtaí: an Coimisiún Eorpach
An t-ordú atá á lorg
Iarrann an t-achomharcóir ar an gCúirt Bhreithiúnais:
breithiúnas Chúirt Ghinearálta an Aontais Eorpaigh an 12 Iúil 2023 i gCás T-491/21 a chur ar neamhní.
Cinneadh Cur Chun Feidhme (AE) 2021/988 an 16 Meitheamh 2021, lena n-eisiatar ó mhaoiniú an Aontais Eorpaigh caiteachas áirithe a thabhaíonn na Ballstáit faoin gCiste Eorpach um Ráthaíocht Talmhaíochta (CERT) agus faoin gCiste Eorpach Talmhaíochta um Fhorbairt Tuaithe (CETFT) 1 a chur ar neamhní go páirteach, a mhéid a bhaineann sé leis an Ungáir, Cinneadh Cur Chun Feidhme lena eisiatar, mar gheall ar mhainneachtain príomhrialú a dhéanamh, na suime EUR 1 887 692.57 ó mhaoiniú ón Aontas faoi CETFT “Forbairt Tuaithe CETFT – bearta foraoiseachta” do na blianta airgeadais 2016 go 2019.
a ordú don Choimisiún costais na n-imeachtaí a íoc.
Saincheisteanna dlí agus príomhargóintí
Leis an achomharc seo, déanann Rialtas na hUngáire agóid i gcoinne raon feidhme na toirmisc ar chistiú dúbailte a leagtar síos in Airteagal 30 de Rialachán (AE) Uimh. 1306/2013 ó Pharlaimint na hEorpa agus ón gComhairle an 17 Nollaig 2013 maidir leis an gcomhbheartas talmhaíochta a mhaoiniú, a bhainistiú agus faireachán a dhéanamh air agus lena n-aisghairtear Rialacháin (CEE) Uimh. 352/78, (CE) Uimh. 165/94, (CE) Uimh. 2799/98, (CE) Uimh. 814/2000, (CE) Uimh. 1290/2005 agus (CE) Uimh. 485/2008 ón gComhairle. De réir an rialtais sin, tá breithiúnas na Cúirte Ginearálta mícheart nuair a chinntear leis nach mór feidhm a bheith ag an toirmeasc a mhéid a fhéadfaidh an tairbhí céanna, i leith an fhearainn talún céanna, cistiú eile a fháil ó bhuiséad an Aontais chun na críche céanna, is cuma cé acu an cistiú cúiteach nó cistiú dreasacht é an cistiú atá i gceist. Dá bhrí sin, ní bhaineann an toirmeasc ach le cásanna ina gclúdaíonn an dá chineál cabhrach na costais chéanna. Sainaithnítear na costais a chumhdaítear le cabhair ar leith ar bhonn chuspóir na cabhrach a leagtar amach i bhfoclaíocht an rialacháin, ar bhonn na gcoinníollacha faoina ndeonaítear í agus ar bhonn na bhforálacha a bhaineann le méid na cabhrach a ríomh.
De réir Rialtas na hUngáire, féachtar le breithiúnas na Cúirte Ginearálta síneadh a chur, trí chosaint leasanna airgeadais bhuiséad an Aontais agus prionsabal na bainistíochta fónta airgeadais a agairt, leis an toirmeasc ar chistiú dúbailte do na cásanna sin chomh maith (cásanna ina bhféadfadh forluí a bheith ann idir cabhair don fhoraoisiú agus don ghlasú) i gcás, ag féachaint do rún reachtas an Aontais mar a léirítear i bhfoclaíocht an rialacháin, nach mbeifí ag súil leis sin.
____________
1 IO 2021 L 218, lch. 9.