Language of document :

Talba għal deċiżjoni preliminari mressqa mill-Court of Appeal (l-Irlanda) fil-11 ta’ Awwissu 2021 – K.M. vs The Director of Public Prosecutions

(Kawża C-493/21)

Lingwa tal-kawża: l-Ingliż

Qorti tar-rinviju

Court of Appeal

Partijiet fil-kawża prinċipali

Rikorrent: K.M.

Konvenut: The Director of Public Prosecutions

Domandi preliminari

Il-kliem tal-Artikolu 89 u/jew tal-Artikolu 90 tar-Regolament Nru 1224/2009 1 , u r-rekwiżiti ta’ proporzjonalità taħt il-Karta tad-Drittijiet Fundamentali tal-Unjoni Ewropea u d-dritt tal-Unjoni, jeżiġu li l-qorti li tagħti s-sentenza jkollha diskrezzjoni taġġusta, tadatta jew ittaffi l-portata tal-ordni ta’ konfiska tal-qabdiet ta’ ħut u tat-tagħmir tas-sajd b’mod partikolari fid-dawl taċ-ċirkustanzi msemmija fl-Artikoli 89 u 90 tar-Regolament (KE) Nru 1224/2009?

B’teħid inkunsiderazzjoni tal-impatt potenzjali fuq l-għajxien tal-kaptan bħala konsegwenza ta’ konfiska awtomatika obbligatorja tal-qabdiet ta’ ħut u tat-tagħmir tas-sajd kollu, dispożizzjoni tad-dritt nazzjonali bħall-Artikolu 28(5)(b) 2 , li ma tippermettix lil qorti nazzjonali teżamina impatt fuq id-dritt għal qligħ ta’ għajxien ta’ persuna li tiġi ddikjarata ħatja wara l-ħruġ ta’ att tal-akkuża għal reat li jmur kontra dan l-artikolu u r-Regolament Nru 1224/2009 (minbarra fil-kuntest tal-kunsiderazzjoni ta’ liema multa tista’ tkun xierqa), tista’ titqies li hija kompatibbli mal-kliem tar-Regolament Nru 1224/2009, mal-Karta u mad-dritt tal-Unjoni, fid-dawl tad-dritt fundamentali tal-kaptan li jeżerċita l-professjoni tiegħu?

____________

1 Regolament tal-Kunsill (KE) Nru 1224/2009 tal-20 ta’ Novembru 2009 li jistabbilixxi sistema Komunitarja ta’ kontroll għall-iżgurar tal-konformità mar-regoli tal-Politika Komuni tas-Sajd, li jemenda r-Regolamenti (KE) Nru 847/96, (KE) Nru 2371/2002, (KE) Nru 811/2004, (KE) Nru 768/2005, (KE) Nru 2115/2005, (KE) Nru 2166/2005, (KE) Nru 388/2006, (KE) Nru 509/2007, (KE) Nru 676/2007, (KE) Nru 1098/2007, (KE) Nru 1300/2008, (KE) Nru 1342/2008 u li jħassar ir-Regolamenti (KEE) Nru 2847/93, (KE) Nru 1627/94 u (KE) Nru 1966/2006 (ĠU 2009, L 343, p. 1, rettifiki fil-ĠU 2013, L 355, p. 93, fil-ĠU 2014, L 318, p. 34 u fil-ĠU 2015, L 149, p. 23).

2 tas-Sea Fisheries and Maritime Jurisdiction Act 2006 (il-Liġi tal-2006 dwar is-Sajd fil-Baħar u l-Ġurisdizzjoni Marittima).