Achomharc arna thabhairt an 6 Deireadh Fómhair 2023 ag Luossavaara-Kiirunavaara AB i gcoinne bhreithiúnas na Cúirte Ginearálta (an Dara Dlísheomra) a tugadh an 26 Iúil 2023 i gCás T-244/21, Luossavaara-Kiirunavaara v an Coimisiún
(Cás C-621/23 P)
Teanga an cháis: an Béarla
Páirtithe
Achomharcóir: Luossavaara-Kiirunavaara AB (ionadaithe: A. Bryngelsson, F. Sjövall agus A. Johansson, advokater)
Páirtithe eile sna himeachtaí: An Coimisiún Eorpach, Ríocht na Sualainne
An t-ordú atá á lorg
Iarrann an t-achomharcóir ar an gCúirt:
an breithiúnas faoi achomharc a chur ar leathtaobh;
Airteagal 1(3) den chinneadh ón gCoimisiún Eorpach (AE) 2021/355 1 an 25 Feabhra 2021 maidir le bearta náisiúnta cur chun feidhme le haghaidh leithdháileadh saor in aisce idirthréimhseach lamháltas astaíochtaí gás ceaptha teasa i gcomhréir le hAirteagal 11(3) de Threoir 2003/87/CE 2 (‘Treoir ETS’) ó Pharlaimint na hEorpa agus ón gComhairle a chur ar neamhní;
a ordú don Choimisiún costais na n-imeachtaí a íoc.
Saincheisteanna dlí agus príomhargóintí
Mar thaca leis an achomharc, maíonn an t-iarratasóir cúig shaincheist dlí.
An chéad saincheist dlí: rinne an Chúirt Ghinearálta léiriú earráideach ar an téarma ‘ionadaithe’ in Airteagal 10a(1) de Threoir ETS.
An dara saincheist dlí: rinne an Chúirt Ghinearálta earráid dlí i míreanna 93–99 trí mheasúnú inionadaitheachta an Choimisiúin a ionadú lena measúnú féin.
An tríú saincheist dlí: a mhéid is gá don chéad saincheist a rinne an t-achomharcóir, tá saobhadh déanta ag an gCúirt Ghinearálta ar bhraistint shoiléir na fianaise.
An ceathrú saincheist dlí: rinne an Chúirt Ghinearálta earráid dlí agus í ag cinneadh gur chomhlíon an Coimisiún a dhualgas maidir le gnéithe ábhartha uile an cháis aonair a scrúdú go cúramach agus go neamhchlaonta.
An cúigiú saincheist dlí: rinne an Chúirt Ghinearálta earráid dlí agus í ag cinneadh gur chomhlíon an Coimisiún a oibleagáid cúiseanna a lua.
____________
1 IO 2021 L 68, lch. 221.
1 Treoir 2003/87/CE ó Pharlaimint na hEorpa agus ón gComhairle an 13 Deireadh Fómhair 2003 lena mbunaítear scéim i ndáil le trádáil lamháltas i gcomhair astaíochtaí gás ceaptha teasa laistigh den Chomhphobal agus lena leasaítear Treoir 96/61/CE ón gComhairle, IO 2003 L 275, lch. 32.