Digriet tal-Qorti Ġenerali (Ir-Raba’ Awla) tas-6 ta’ Novembru 2014 —
ANKO vs Il-Kummissjoni

(Kawża T‑17/13)

“Klawżola ta’ arbitraġġ — Seba’ Programm Qafas dwar l-attivitajiet ta’ riċerka, ta’ żvilupp teknoloġiku u ta’ dimostrazzjoni (2007-2013) — Kuntratt li jikkonċerna l-proġett Pocemon — Rimbors tas-somom antiċipati — Ittra li tħabbar il-ħruġ ta’ nota ta’ debitu — Ittra ta’ tfakkira — Nuqqas ta’ interess ġuridiku — Inammissibbiltàˮ

1.                     Proċedura ġudizzjarja — Eċċezzjonijiet ta’ inammissibbiltà ta’ ordni pubbliku — Eżami ex officio mill-qorti — Neċessità ta’ eżistenza ta’ interess ġuridiku sa ma tingħata d-deċiżjoni ġudizzjarja (Regoli tal-Proċedura tal-Qorti Ġenerali, Artikoli 113 u 114(3) u (4)) (ara l-punt 30)

2.                     Proċedura ġudizzjarja — Kawża mressqa quddiem il-Qorti Ġenerali abbażi ta’ klawżola ta’ arbitraġġ — Ġurisdizzjoni tal-Qorti Ġenerali ddefinita esklużivament mill-Artikolu 272 TFUE u mill-klawżola ta’ arbitraġġ — Applikazzjoni ta’ dispożizzjonijiet nazzjonali fil-qasam ta’ ġurisdizzjoni u ta’ ammissibbiltà — Esklużjoni (Artikolu 272 TFUE) (ara l-punt 31)

3.                     Proċedura ġudizzjarja — Kawża mressqa quddiem il-Qorti Ġenerali abbażi ta’ klawżola ta’ arbitraġġ — Kuntratti konklużi fil-kuntest ta’ programm speċifiku ta’ riċerka, ta’ żvilupp tekonoloġiku u ta’ dimostrazzjoni — Rexissjoni unilaterali mill-Kummissjoni bbażata fuq in-nuqqas ta’ eżekuzzjoni tal-obbligi kuntrattwali — Talba għar-rimbors ta’ somom antiċipati — Rikors ippreżentat mill-benefiċjarju kontra l-ittra tal-Kummissjoni li tħabbar l-intenzjoni tagħha li toħroġ nota ta’ debitu — Assenza ta’ ffissar tal-kundizzjonijiet ta’ ħlas u tad-data ta’ skadenza — Nuqqas ta’ interess ġuridiku — Inammissibbiltà tar-rikors (Artikolu 272 TFUE ; Regolament tal-Kunsill Nru 1605/2002, Artikolu 71(2); Regolament tal-Kummissjoni Nru 2342/2002, Artikoli 78 u 79) (ara l-punti 38, 39, 46-51, 53)

Suġġett

Rikors ippreżentat skont l-Artikolu 272 TFUE, intiż sabiex il-Qorti Ġenerali tikkonstata, l-ewwel nett, li r-rikorrenti ma hijiex obbligata tirrimborsa s-somma kollha li l-Kummissjoni ħallsitha għall-proġett Pocemon, konkluż fil-kuntest tas-Seba’ Programm Qafas dwar l-attivitajiet ta’ riċerka, ta’ żvilupp teknoloġiku u ta’ dimostrazzjoni (2007-2013), it-tieni nett, li r-rikorrenti ma hijiex obbligata tħallas kumpens fil-forma ta’ somma f’daqqa fir-rigward tal-imsemmi proġett, it-tielet nett, li l-Kummissjoni ma hijiex intitolata tipproċedi għall-kumpens tas-somom dovuti minnha lir-rikorrenti.

Dispożittiv

1) Ir-rikors huwa miċħud bħala inammissibbli.

2) ANKO AE Antiprosopeion, Emporiou kai Viomichanias hija kkundannata għall-ispejjeż.