Achomharc arna thabhairt an 16 Samhain 2023 ag Dmitry Alexandrovich Pumpyanskiy i gcoinne bhreithiúnas na Cúirte Ginearálta (an Chéad Dlísheomra) a tugadh an 6 Meán Fómhair 2023 i gCás T-270/22, Pumpyanskiy v An Chomhairle
(Cás C-696/23 P)
Teanga an cháis: an Béarla
Páirtithe
Achomharcóir: Dmitry Alexandrovich Pumpyanskiy (ionadaí: G. Lansky, P. Goeth, A. Egger agus E. Steiner, Rechtsanwälte)
Páirtí eile sna himeachtaí: Comhairle an Aontais Eorpaigh
An t-ordú atá á lorg
Iarrann an t- achomharcóir ar an gCúirt Bhreithiúnais:
cinneadh Chúirt Ghinearálta an Aontais Eorpaigh an 6 Meán Fómhair 2023 a chur ar neamhní;
maidir le Cinneadh (CBES) 2022/397 1 ón gComhairle an 9 Márta 2022 lena leasaítear Cinneadh (CBES) 2014/145 ón gComhairle a bhaineann le bearta sriantacha i ndáil le gníomhaíochtaí lena mbaintear an bonn d’iomláine chríochach, de cheannasacht agus de neamhspleáchas na hÚcráine nó ar bagairt iad na gníomhaíochtaí sin ar an méid sin agus Rialachán Cur Chun Feidhme (AE) 2022/396 2 ón gComhairle an 9 Márta 2022 lena gcuirtear chun feidhme Rialachán (AE) Uimh. 269/2014 ón gComhairle a bhaineann le bearta sriantacha i ndáil le gníomhaíochtaí lena mbaintear an bonn d’iomláine chríochach, de cheannasacht agus de neamhspleáchas na hÚcráine nó ar bagairt iad na gníomhaíochtaí sin ar an méid sin, breithiúnas críochnaitheach a thabhairt ar an díospóid agus a chur ar neamhní, a mhéid a bhaineann siad leis an achomharcóir, agus a ordú do Chomhairle an Aontais Eorpaigh na costais a íoc, lena n-áirítear na costais sna himeachtaí os comhair na Cúirte Ginearálta, chomh maith le costais na n-idiragraithe;
mar mhalairt air sin maidir leis an dara cuntar éilimh, an cás a tharchur ar ais chuig an gCúirt Ghinearálta le haghaidh breithiúnais, i gcomhréir le breithiúnas na Cúirte Breithiúnais maidir le pointí dlí agus na costais a fhorchoimeád.
Saincheisteanna dlí agus príomhargóintí
Rinne an Chúirt Ghinearálta earráid sa dlí nuair a chinn sí nár dhearna an Chomhairle earráid measúnaithe, nuair a cháiligh sé an achomharcóir mar ‘duine mór gnó […] a sholáthraíonn foinse shuntasach ioncaim do Rialtas Chónaidhm na Rúise’ de réir bhrí Airteagal 2(1)(g) agus, go bunúsach, Airteagal 1(1) den Chinneadh (CBES) 2014/145 ón gComhairle arna leasú le Cinneadh (CBES) 2022/329 1 ón gComhairle an 25 Feabhra 2022 agus Airteagal 3(1)(g) Rialachán (AE) 269/2014 ón gComhairle arna leasú le Rialachán (AE) 2022/330 2 ón gComhairle an 25 Feabhra 2022.
Rinne an Chúirt Ghinearálta earráid sa dlí nuair a chinn sí nár sháraigh an Chomhairle cearta bunúsacha an achomharcóra. Go háirithe, rinne an Chúirt Ghinearálta earráid nuair chinn sí nach sáraítear leis an dlí ar a fhorchuirtear na bearta sriantacha ar phrionsabal na deimhneachta dlíthiúla, go n-urramaíonn na bearta sriantacha bunbhrí cearta bunúsacha an achomharcóra agus go bhfuil siad comhréireach
____________
1 IO 2022, L 80, lch. 31.
1 IO 2022, L 80, lch. 1.
1 Cinneadh (CBES) 2022/329 ón gComhairle an 25 Feabhra lena leasaítear Cinneadh 2014/145/CBES a bhaineann le bearta sriantacha i ndáil le gníomhaíochtaí lena mbaintear an bonn d’iomláine chríochach, de cheannasacht agus de neamhspleáchas na hÚcráine nó ar bagairt iad na gníomhaíochtaí sin ar an méid sin (IO 2022, L 50, lch. 1).
1 Rialachán (AE) 2022/330 ón gComhairle an 25 Feabhra 2022 lena leasaítear Rialachán (AE) Uimh. 269/2014 a bhaineann le bearta sriantacha i ndáil le gníomhaíochtaí lena mbaintear an bonn d’iomláine chríochach, de cheannasacht agus de neamhspleáchas na hÚcráine nó ar bagairt iad na gníomhaíochtaí sin ar an méid sin (IO 2022, L 51, lch. 1).