Rikors ippreżentat fil-15 ta' Settembru 2010 - Companhia Previdente vs Il-Kummissjoni
(Kawża T-414/10)
Lingwa tal-kawża: il-Portugiż
Partijiet
Rikorrenti: Companhia Previdente - Sociedade de Controle de Participações Financeiras, SA (Lisboa, il-Portugall) (rappreżentanti: D. Proença de Carvalho u J. Caimoto Duarte, avukati)
Konvenuta: Il-Kummissjoni Ewropea
Talbiet tar-rikorrenti
tannulla parzjalment l-Artikolu 1 u l-Artikolu 2 tad-Deċiżjoni tal-Kummissjoni, tat-30 ta' Ġunju 2010, dwar proċedura skont l-Artikolu 101 TFUE u tal-Artikolu 53 tal-Ftehim ŻEE (Każ COMP/38.344 - Azzar użat għall-prestressing), għal dak li jikkonċerna r-rikorrenti;
tirrikonoxxi li kwalunkwe tnaqqis fil-multa applikabbli għal Socitrel, fl-ambitu ta' rikorsi oħra għal ksur li fir-rigward tagħhom Companhia Previdente hija responsabbli in solidum, jirriżulta fi tnaqqis awtomatiku ekwivalenti tal-multa li din tal-aħħar ikollha tħallas in solidum.
Motivi u argumenti prinċipali
Id-deċiżjoni kkontestata mir-rikorrenti hija l-istess deċiżjoni kkontestata fil-kawża T-385/10, ArcelorMittal Wire France et vs Il-Kummissjoni.
Ir-rikorrenti ssostni quddiem il-Qorti Ġenerali:
(i) Ksur tal-Artikolu 101 TFUE u tal-prinċipji ta' responsabbiltà individwali għall-ksur, b'rabta mal-Artikolu 6 tal-Konvenzjoni Ewropea tad-Drittijiet tal-Bniedem, u tal-Artikolu 23(2) tar-Regolament tal-Kunsill Nru 1/2003, tas-16 ta' Diċembru 2002, fuq l-implimentazzjoni tar-regoli tal-kompetizzjoni mniżżlin fl-Artikoli 81 u 82 tat-Trattat
1. Id-Deċiżjoni tat lok għal żball manifest ta' evalwazzjoni fid-determinazzjoni tar-responsabbiltà
in solidum ta' COMPANHIA PREVIDENTE għall-ksur imwettaq minn SOCITREL, billi eċċediet il-limitu massimu tal-multa skont l-Artikolu 23(2) tar-Regolament Nru 1/2003.
(ii) Ksur tal-Artikolu 296 TFUE talli l-Kummissjoni ma kkonfutatx l-argumenti tar-rikorrenti u ma teskludix fondamentalment il-preżunzjoni tal-eżerċizzju ta' influwenza determinanti ta' COMPANHIA PREVIDENTE fuq SOCITREL għall-finijiet ta' attribuzzjoni tar-responsabbiltà in solidum u kalkolu tal-multa, matul il-perijodu bejn l-1998 u l-2002, kif ukoll talli ma tispjegax debitament fuq xhiex ibbażat ruħha biex tikkonkludi li kienet teżisti influwenza determinanti fil-perijodu preċedenti, bejn l-1994 u l-1998, li fih, milli jidher, il-preżunzjoni ma hijiex applikabbli.
Sussidjarjament,
(iii) Ksur tal-Artikolu 101(1) TFUE, tal-Artikolu 53 tal-Ftehim ŻEE, tal-Artikolu 23(2) tar-Regolament (KE) Nru 1/2003 u tal-prinċipju ta' proporzjonalità billi nqabeż il-limitu massimu tal-multa li tista' tiġi imposta fuq COMPANHIA PREVIDENTE.
(iv) Ksur tal-prinċipji ta' proporzjonalità u ta' nondiskriminazzjoni talli ma ħaditx inkunsiderazzjoni l-kuntest ekonomiku ta' kriżi attwali u l-inkapaċità ta' ħlas min-naħa ta' COMPANHIA PREVIDENTE.
____________1 - ĠU Edizzjoni Speċjali bil-Malti: Kapitolu 8, Vol. 2, p. 205