Caingean arna tabhairt an 8 Eanáir 2024 – TU agus BY v Parlaimint na hEorpa

(Cás T-10/24)

Teanga an cháis: an Fhraincis

Páirtithe

Iarratasóirí: TU agus BY (ionadaí: N. de Montigny, Dlíodóir)

Cosantóir: Parlaimint na hEorpa

An t-ordú atá á lorg

Iarrann na hiarratasóirí ar an gCúirt Ghinearálta:

cinntí an 9 agus an 28 Márta 2023 a chur ar neamhní;

a ordú don Pharlaimint an tuarascáil ar fhiosrúchán riaracháin a tharchur chuig na hiarratasóirí;

a ordú don Pharlaimint liúntas EUR 20 000 a thabhairt le haghaidh gach iarratasóra;

a ordú don Pharlaimint na costais a íoc.

Saincheisteanna dlí agus príomhargóintí

Mar thaca leis an gcaingean i gcoinne chinntí an 9 agus an 28 Márta 2023 lenar dhiúltaigh an Coiste Comhairleach maidir le Ciapadh d’iarratas na n-iarratasóirí chun rochtain a fháil ar an tuarascáil ar fhiosrúchán riaracháin a bunaíodh mar gheall ar ghníomhartha ciaptha a rinne Feisire de Pharlaimint na hEorpa orthu mar chuid dá ndualgais mar Chúntóirí Parlaiminteacha Creidiúnaithe, maíonn na hiarratasóirí dhá shaincheist dlí.

An chéad saincheist dlí lena n-éilítear mainneachtain cúiseanna a lua.

An dara saincheist dlí lena n-éilítear gur sáraíodh, sa chéad áit, Airteagal 24 de Rialacháin Foirne Oifigigh an Aontais Eorpaigh, sa dara háit, an dualgas cúnaimh agus, ar deireadh, prionsabal an dea-riaracháin.

____________