Rikors ippreżentat fit-8 ta' Ġunju 2010 - Thomas Ax vs Il-Kunsill
(Kawża T-259/10)
Lingwa tal-kawża: il-Ġermaniż
Partijiet
Rikorrent: Thomas Ax (Neckargemünd, il-Ġermanja) (rappreżentant: J. Baumann, avukat)
Konvenut: Il-Kunsill tal-Unjoni Ewropea
Talbiet tar-rikorrent
tannulla r-Regolament tal-Kunsill (UE) Nru 407/2010, tal-11 ta' Mejju 2010, li jistabbilixxi mekkaniżmu Ewropew ta' stabbilizzazzjoni finanzjarja;
tikkundanna lill-Kunsill tal-Unjoni Ewropea għall-ispejjeż.
Motivi u argumenti prinċipali
Ir-rikorrent jikkontesta r-Regolament (EU) Nru 407/2010
1.
Insostennn tar-rikors tiegħu, ir-rikorrent isostni li, fost l-oħrajn, l-għajnuna awtorizzata bir-regolament ikkontestat tikser il-projbizzjoni li jiġu assunti u li tittieħed responsabbiltà għall-impenji tal-Istati Membri l-oħra kif prevista fl-Artikolu 125 TFUE.
Barra minn hekk, ir-Regolament Nru 407/2010 ma għandux bażi legali fl-Artikolu 122 TFUE. F'dan ir-rigward, ir-rikorrent isostni li l-Istati Membri affettwati mill-attakki spekulattivi ma humiex serjament mhedda minn diffikultà serja fis-sens ta' din id-dispożizzjoni. Barra minn hekk, id-diffikultajiet konsegwenti tal-attakki spekulattivi ma joriġinawx minn ċirkustanzi eċċezzjonali li l-Istati Membri ma għandhomx kontroll fuqhom.
____________1 - Regolament tal-Kunsill (UE) Nru 407/2010, tal-11 ta' Mejju 2010, li jistabbilixxi mekkaniżmu Ewropew ta' stabbilizzazzjoni finanzjarja (ĠU L 118, p. 1).