Rikors ippreżentat fl-10 ta' April 2009 - MRI vs Il-Kummissjoni

(Kawża T-154/09)

Lingwa tal-kawża: It-Taljan

Partijiet

Rikorrenti: Manuli Rubber Indusries SpA (MRI) (Milan, l-Italja) (rappreżentanti: L. Radicati di Brozolo, avvocato, M. Pappalardo, avvocato, E. Marasà, avvocato)

Konvenuta: Il-Kummissjoni tal-Komunitajiet Ewropej

Talbiet tar-rikorrenti

Prinċipalment:

tannulla l-Artikolu 1 tad-deċiżjoni fil-parti li fiha tiddikjara li r-rikorrenti ħadet sehem fi ksur uniku u kontinwu fis-suq tal-pajpijiet tal-baħar mill-1 ta' April 1986 sal-1 ta' Awwissu 1992 u mit-3 ta' Settembru 1996 sat-2 ta' Mejju 2007, b'mod partikolari fil-perijodu bejn it-3 ta' Settembru 1996 sad-9 ta' Mejju 2000.

tannulla l-Artikolu 2 tad-deċiżjoni sa fejn, b'riżultat tal-iżbalji esposti f'dan ir-rikors, tiġi imposta multa fuq ir-rikorrenti ta' EUR 4 900 000.

tiċħad kull motiv u difiża kuntrarja.

sussidjarjament:

tnaqqas, skont l-Artikolu 229 KE, il-multa ta' EUR 4.900.000 imposta fuq ir-rikorrenti skont l-Artikolu 2 tad-deċiżjoni.

u f'kull każ:

tikkundanna lill-Kummissjoni għall-ispejjeż ta' din il-kawża.

Motivi u argumenti prinċipali

Id-deċiżjoni kkontestata f'din il-kawża hija l-istess tal-Kawża T-146/09 Parker ITR u Parker Hannifin vs Il-Kummissjoni.

Insostenn tal-allegazzjonijiet tagħha, ir-rikorrenti ssostni l-ewwel nett li din id-deċiżjoni hija difettuża fir-rigward tal-klassifikazzjoni tal-ksur attribwit lilha bħala parteċipazzjoni f'akkordju uniku u kumpless mill-1986 sal-2007, u b'mod partikolari l-attribuzzjoni tal-ksur bejn il-perijodu 1996 u 2000 u għaldaqstant l-inklużjoni fil-perijodu suġġett għal sanzjoni tal-perijodu ta' bejn Settembru 1996 u Mejju 1997.

F'dan ir-rigward qed jiġi sostnut li ksur ma jistax ikun la kontinwu u lanqas ripetut meta każijiet speċifiċi ta' ksur jiġu separati, bħal f'dan il-każ, minn perijodu ta' żmien kunsiderevoli u, fuq kollox, minn avvenimenti pożittivi li mhumiex kompatibbli mal-intenzjoni li l-ksur ikun kontinwu jew ripetut, bħal fil-każ tal-interruzzjoni pubblika u espliċita tar-relazzjonijiet mal-kartell min-naħa tar-rikorrenti, li ġie rrikonoxxut ukoll mill-Kummissjoni.

Ir-rikorrenti ssostni wkoll l-irregolarità sabiex ġie stabbilit l-ammont tal-multa b'mod partikolari mill-aspett tat-tul ta' żmien, tal-gravità u tat-tnaqqis minħabba l-parteċipazzjoni tagħha fil-programm ta' klemenza.

____________