SENTENZA TAL-QORTI ĠENERALI (Awla tal-Appell)

15 ta’ Ottubru 2014

Kawża T‑663/13 P

Il-Qorti tal-Awdituri tal-Unjoni Ewropea

vs

BF

“Appell – Servizz pubbliku – Reklutaġġ – Ħatra għal pożizzjoni ta’ Direttur tar-Riżorsi Umani – Ċaħda ta’ kandidatura – Obbligu ta’ motivazzjoni tar-rapport ippreżentat mill-kumitat ta’ preselezzjoni”

Suġġett:      Appell mis-sentenza tat-Tribunal għas-Servizz Pubbliku tal-Unjoni Ewropea (L-Ewwel Awla) tas-17 ta’ Ottubru 2013, BF vs Il-Qorti tal-Awdituri (F‑69/11), u intiż għall-annullament ta’ din is-sentenza.

Deċiżjoni:      L-appell huwa miċħud. Il-Qorti tal-Awdituri tal-Unjoni Ewropea għandha tbati l-ispejjeż tagħha kif ukoll dawk sostnuti minn BF fil-kuntest tal-preżenti istanza.

Sommarju

1.      Uffiċjali – Reklutaġġ – Proċedura ta’ mili ta’ pożizzjoni ta’ direttur – Eżami komparattiv tal-merti tal-kandidati – Setgħa diskrezzjonali tal-amministrazzjoni – Preparazzjoni mid-dipartimenti amministrattivi tad-deċiżjoni tal-Awtorità tal-Ħatra – Ammissibbiltà

(Regolamenti tal-Persunal, Artikoli 29(2) u (45))

2.      Uffiċjali – Reklutaġġ – Proċedura ta’ appell ta’ impjieg ta’ direttur – Rapport tal-kumitat ta’ preselezzjoni – Obbligu ta’ motivazzjoni – Portata

(Regolamenti tal-Persunal, Artikolu 29(2))

3.      Appell – Aggravji – Insuffiċjenza ta’ motivazzjoni – Użu ta’ motivazzjoni impliċita mill-Qorti Ġenerali – Ammissibbiltà – Limiti – Obbligu li tippronunzja ruħha fuq kull ksur ta’ dritt allegat – Portata

(Statut tal-Qorti tal-Ġustizzja, Artikolu 36 u Anness I, Artikolu 7(1))

1.      L-Awtorità tal-Ħatra għandha jkollha disponibbli, fil-kuntest tal-eżami tagħha ta’ kandidaturi għall-impjieg ta’ direttur, l-elementi kollha ta’ evalwazzjoni tal-merti rispettivi tal-kandidati u f’dan ir-rigward tista’ tiġi assistita mid-dipartimenti amministrattivi fil-livelli differenti tal-ġerarkija, konformement mal-prinċipji inerenti fl-operazzjoni ta’ kwalunkwe struttura amministrattiva ġerarkika. L-imsemmija awtorità, li tieħu d-deċiżjoni finali ta’ ħatra, għaldaqstant għandha tkunu tista’ tagħraf u tevalwa hija stess l-elementi li, f’kull stadju tal-iżvolġiment tal-proċess ta’ għażla, wasslu, fil-livelli amministrattivi differenti kkonsultati, għall-adozzjoni ta’ opinjonijiet konsultattivi kif dawn ġew ippreżentati lilha. Huwa biss f’din l-ipoteżi li l-Awtorità tal-Ħatra tista’ tibbaża d-deċiżjoni finali tagħha dwar dawn l-opinjonijiet mingħajr ma tikser l-Artikolu 45 tal-Istatut.

(ara l-punti 25 u 42)

Referenza:

Il-Qorti Ġenerali: 4 ta’ Lulju 2006, Tzirani vs Il-Kummissjoni, T‑88/04, ĠabraSP p. I‑A‑2‑149 u II‑A‑2‑703, punt 81, u l-ġurisprudenza ċċitata

2.      Fil-kuntest ta’ proċedura intiża li timtela pożizzjoni ta’ direttur, ir-rapport li l-kumitat ta’ preselezzjoni għandu jippreżenta lill-Awtorità tal-Ħatra skont ir-regoli interni ta’ proċedura għandu jkunu motivat u ma jistax ikun limitat għall-indikazzjoni tal-lista tal-kandidati l-iktar kwalifikati għal kull waħda mill-pożizzjonijiet inkwistjoni, ikklassifikati f’ordni alfabetiku. Għandu neċessarjament jinkludi elementi ta’ evalwazzjoni tal-merti tal-kandidati magħżula minn dan il-kumitat, sabiex l-imsemmija awtorità validament tkun tista’ tipproċedi, l-ewwel nett, għal eżami komparattiv tal-merti tal-kandidati, sussegwentement, għall-għażla tal-kandidat l-iktar xieraq għall-eżerċizzju tal-funzjonijiet koperti mill-avviż ta’ reklutaġġ.

(ara l-punti 37 u 43)

3.      Fil-kuntest ta’ appell, l-għan tal-istħarriġ tal-Qorti tal-Ġustizzja huwa, b’mod partikolari, li jiġi eżaminat jekk il-Qorti Ġenerali rrispondietx b’mod sodisfaċenti għall-finijiet ta’ dritt għall-argumenti kollha invokati mill-appellant. Madankollu, l-obbligu, għat-Tribunal għas-Servizz Pubbliku, li timmotiva d-deċiżjonijiet tagħha ma jistax jiġi interpretat li jimplika li dan kien marbut li jwieġeb fid-dettall għal kull argument invokat mill-appellant, b’mod partikolari jekk dan l-argument ma jkunx ta’ natura suffiċjentement ċara u preċiża.

(ara l-punt 70)

Referenza:

Il-Qorti tal-Ġustizzja: 9 ta’ Settembru 2008, FIAMM et vs Il-Kunsill u Il-Kummissjoni, C‑120/06 P u C‑121/06 P, Ġabra p. I‑6513, punt 91; 2 ta’ April 2009, Franza Télécom vs Il-Kummissjoni, C‑202/07 P, Ġabra p. I‑2369, punt 41

Il-Qorti Ġenerali: 13 ta’ Diċembru 2011, Marcuccio vs Il-Kummissjoni, T‑311/09 P, punt 33