Appell ippreżentat fit-3 ta' Jannar 2011 minn Gerhard Birkhoff mis-sentenza tat-Tribunal għas-Servizz Pubbliku tas-27 ta' Ottubru 2010 fil-Kawża F-60/09, Gerhard Birkhoff vs Il-Kummissjoni Ewropea

(Kawża T-10/11 P)

Lingwa tal-kawża: it-Taljan

Partijiet

Appellant: Gerhard Birkhoff (Weitnau, il-Ġermanja) (rappreżentant: C. Inzillo, avukat)

Appellata: Il-Kummissjoni Ewropea

Talbiet tal-appellanti

L-appellant jitlob lill-Qorti Ġenerali jogħġobha:

tannulla d-deċiżjoni appellata;

tikkundanna lill-appellata għall-ispejjeż kollha taż-żewġ istanzi.

Aggravji u argumenti prinċipali

L-għan ta' dan l-appell huwa l-annullament tas-sentenza tat-Tribunal għas-Servizz Pubbliku, fil-Kawża F-60/09, Birkhoff vs Il-Kummissjoni, li ċaħdet ir-rikors kontra d-deċiżjoni tal-appellata, li ċaħdet l-estensjoni tal-ħlas tal-allowance tat-tfal dipendenti, li huwa kien jirċievi sa mill-1978.

Insostenn tal-appell tiegħu, l-appellant qiegħed iressaq seba' aggravji:

-    L-ewwel aggravju huwa bbażat fuq il-ksur tad-dispożizzjonijiet tar-Regolamenti tal-Persunal tal-Komunitajiet Ewropej u tal-prinċipji taċ-ċertezza legali u tat-trattament ugwali.

-    It-tieni aggravju huwa bbażat fuq żball ta' liġi fir-rigward tal-kunsiderazzjoni li r-rikorrent sostna motiv wieħed fir-rikors promotur (Artikolu 2(5) tal-Anness VII tar-Regolamenti tal-Persunal) b'mod li ġew illimitati l-ilmenti tiegħu intiżi sabiex jinvolvu, minflok, l-applikazzjoni żbaljata tas-sistema regolatorja u tad-dispożizzjonijiet rilevanti ta' riferiment fil-qasam inkwistjoni.

-    It-tielet aggravju huwa bbażat fuq żball ta' liġi, nuqqas ta' motivazzjoni u ksur tad-Dritt Komunitarju inkwantu t-Tribunal għas-Servizz Pubbliku ddeċieda l-kawża fuq il-bażi tal-prinċipju ta' analoġija u fin-nuqqas totali ta' xi kriterju legali u/jew ta' regola ta' riferiment.

-    Ir-raba' aggravju huwa bbażat fuq żball ta' liġi u ommissjoni u nuqqas ta' motivazzjoni fl-evalwazzjoni tal-provi prodotti mill-appellant insostenn tar-raġunijiet tiegħu.

-    Il-ħames aggravju huwa bbażat fuq nuqqas ta' osservanza tal-prinċipji ġenerali u invjolabbli tal-ugwaljanza bejn l-individwi u infondatezza manifesta tal-applikazzjonijiet u l-interpretazzjonijiet tar-regoli u/jew linji ta' riferiment tal-ġurisprudenza inkwistjoni.

-    Is-sitt aggravju huwa bbażat fuq inkompetenza, nuqqas ta' motivazzjoni u użu ħażin ta' poter fir-rigward tad-deċiżjoni dwar l-ispejjeż deduċibbli totalment jew parzjalment rimborsabbli għall-mard ta' membru tal-familja tal-appellant, mit-Tribunal għas-Servizz Pubbliku fuq parir tal-mediku likwidatur tas-sistema komuni għall-mard minflok l-Amministratur.

-    Is-seba' aggravju huwa bbażat fuq nuqqas ta' motivazzjoni fir-rigward ta' diversi punti deċiżivi tas-sentenza appellata mqajma mill-appellant u li ma ġewx ikkunsidrati fid-dettall mit-Tribunal għas-Servizz Pubbliku.

____________