Iarraidh ar réamhrialú ón Consiglio di Stato (an Iodáil), arna taisceadh an 9 Márta 2022 – Sad Trasporto Locale SpA v Provincia autonoma di Bolzano
(Cás C-186/22)
Teanga an cháis: an Iodáilis
An chúirt a rinne an tarchur
Consiglio di Stato
Páirtithe sna príomhimeachtaí
Iarratasóir agus Achomharcóir: Sad Trasporto Locale SpA
Cosantóir agus Freagróir: Provincia autonoma di Bolzano
Na ceisteanna a tharchuirtear
An gá Airteagal 1(2) de Rialachán (CE) Uimh. 1370/20071 a léirmhíniú mar chosc ar chur i bhfeidhm an Rialacháin sin maidir le hoibriú seirbhísí poiblí iompair ilmhódacha náisiúnta agus idirnáisiúnta do phaisinéirí, i gcás, ar an gcéad dul síos, go bhfuil an tseirbhís iompair phoiblí de chineál aonfhoirmeach chun críoch na dámhachtana agus go ndéantar í le trambhealach, le hiarnród cáblach agus le cábla-bhealach, agus ar an dara dul síos, gurb ionann modhanna iompair rianbhunaithe agus níos mó ná 50% den tseirbhís a bhronntar ar an oibreoir ina hiomláine?
I gcás freagra diúltach ar an gcéad cheist, i gcás ina bhfuil feidhm ag Rialachán Uimh. 1370/2007 freisin maidir le hoibriú seirbhísí poiblí iompair ilmhódacha náisiúnta agus idirnáisiúnta do phaisinéirí, i gcás, ar an gcéad dul síos, go bhfuil an tseirbhís iompair phoiblí de chineál aonfhoirmeach chun críoch na dámhachtana agus go ndéantar í le trambhealach, le hiarnróid cáblach agus le cábla-bhealach, agus ar an dara dul síos, gurb ionann modhanna iompair rianbhunaithe agus níos mó ná 50% den tseirbhís a bhronntar ar an oibreoir ina hiomláine, an gá Airteagal 5(1) agus (2) de Rialachán Uimh. 1370/2007 a léirmhíniú sa chiall go bhforchuirtear, go háirithe i ndáil le conradh seirbhíse poiblí lena n-áirítear paisinéirí a iompar ar thram a dhámhachtain díreach ar oibreoir inmheánach, seiceáil ar an bhfoirm dhlíthiúil a ghlactar leis sa ghníomh lena sanntar an cúram agus é mar éifeacht leis sin eisiamh ó raon feidhme Airteagal 5(2) den Rialachán sin bearta nach bhfuil i bhfoirm conarthaí lamháltais le haghaidh seirbhísí?
I gcás freagra dearfach ar an dara ceist, an gá Airteagal 5(1)(b) agus an dara fomhír d’Airteagal 5(1) de Threoir 2014/23/AE 1 a léirmhíniú sa chiall nár cheart an riosca oibriúcháin a bhaineann le saothrú na seirbhísí sin a aistriú chuig an gconraitheoir má tá an conradh atá á dhámhachtain (a) bunaithe ar ollchostas, agus an t-ioncam á fháil ag an eintiteas conarthach; (b) de chineál nach shamhlaítear ach mar ioncam oibriúcháin don oibreoir táille a íocfaidh an t-eintiteas [conarthach], atá ar comhréir le méid na seirbhísí a chuirtear ar fáil (agus dá bhrí sin gan riosca éilimh a áireamh); (c) den cineál a fhágann an t-eintiteas conarthach faoi riosca oibriúcháin ó thaobh an éilimh de (laghdú ar tháillí mar gheall ar laghdú ar líon na seirbhísí faoi bhun na tairsí réamhshainithe), riosca rialála (de thoradh athruithe reachtacha nó rialála agus moill ar údarú agus/nó ar dheonú deimhnithe ag na comhlachtaí inniúla), riosca airgeadais (neamhíocaíocht nó íocaíocht dhéanach táillí agus mainneachtain táillí a choigeartú), agus riosca force majeure (mar thoradh ar athrú neamh-intuartha ar na coinníollacha feidhmíochta seirbhíse); (d) aistrithe chuig riosca oibriúcháin ó thaobh an tsoláthair conraitheora de (athruithe ar chostais fachtóirí amhail fuinneamh, amhábhair agus soláthairtí nach bhfuil smacht ag an oibreoir orthu), riosca caidrimh thionsclaíoch (de thoradh athruithe ar chostais foirne faoi chomhaontú comhchoiteann), riosca bainistíochta (mar thoradh ar mhéadú ar chostais oibriúcháin de bharr meastacháin mhíchearta), agus riosca soch-chomhshaoil (de thoradh teagmhais oibriúcháin a bhaineann le sócmhainní a theastaítear chun an tseirbhís a sholáthar)?
An gá Airteagail 107(1) CFAE agus 108(3) CFAE a léirmhíniú sa chiall, i gcás ina ndéanfaidh údarás áitiúil inniúil conradh seirbhíse poiblí chun paisinéirí a iompar a dhámhachtain go díreach chuig oibreoir inmheánach, gurb ionann cúiteamh seirbhíse poiblí arna ríomh ar bhonn na gcostas bainistíochta, cé go mbaineann siad leis na ceanglais seirbhíse a bhfuiltear ag súil leo, a mheastar, ar thaobh amháin, ag cur san áireamh costais stairiúla na seirbhíse a sholáthraíonn an t-oibreoir reatha, dámhadh lamháltas seirbhísí a leathnaíodh ar feadh níos mó ná 10 mbliana, agus ar an taobh eile, bunaithe ar chostais nó ar tháillí a bhaineann leis an dámhachtain roimhe sin nó a bhaineann ar a laghad le paraiméadair chaighdeánacha mhargaidh is infheidhme maidir le gach oibreoir san earnáil, agus Státchabhair atá faoi réir an nós imeachta um rialú coisctheach dá dtagraítear in Airteagal 108(3) CFAE?
____________
1 Rialachán (CE) Uimh. 1370/2007 ó Pharlaimint na hEorpa agus ón gComhairle an 23 Deireadh Fómhair 2007 maidir le seirbhísí poiblí iompair do phaisinéirí d'iarnród agus de bhóthar agus lena n-aisghairtear Rialachán (CEE) Uimh. 1191/69 agus Rialachán (CEE) Uimh. 1107/70 ón gComhairle (IO 2007 L 315,. 1).
1 Treoir 2014/23/AE ó Pharlaimint na hEorpa agus ón gComhairle an 26 Feabhra 2014 maidir le conarthaí lamháltais a dhámhachtain (IO 2014 L 94, lch. 1).