Iarraidh ar réamhrialú ón Ard-Chúirt (Éire) a taisceadh an 22 Eanáir 2024 – Waltham Abbey Residents Association v An Bord Pleanála, Éire agus an tArd-Aighne
(Cás C-41/24, Waltham Abbey Residents Association)
Teanga an cháis: an Béarla
An chúirt a rinne an tarchur
An Ard-Chúirt (Éire)
Páirtithe sna príomhimeachtaí
Iarratasóir: Waltham Abbey Residents Association
Cosantóirí: An Bord Pleanála, Éire agus an tArd-Aighne
Fógra-pháirtí: O’Flynn Construction Co. Unlimited Company
Na ceisteanna a tharchuirtear:
An bhfuil sé d’éifeacht ag Airteagal 4(4) agus/nó le mír 3 d’Iarscríbhinn IIA a ghabhann le Treoir 2011/921 , arna leasú le Treoir 2014/522 , arna léiriú i bhfianaise phrionsabal an réamhchúraim, i gcás ina bhfuil an fhaisnéis faoi Iarscríbhinn IIA a ghabhann leis an Treoir le tabhairt, agus i gcás ina bhfuil ábhar os comhair an údaráis inniúil go bhféadfadh tionchar a bheith ag an tionscadal ar speiceas nó ar ghnáthóg, gur cheart go bhfaigheadh an forbróir lena mbaineann gach faisnéis ábhartha maidir le speicis nó gnáthóga a bhféadfadh an tionscadal difear a dhéanamh dóibh trí shuirbhéanna eolaíocha a dhéanamh nó a fháil atá leordhóthanach chun deireadh a chur le hamhras faoi éifeachtaí suntasacha ar speicis nó ar ghnáthóga den sórt sin, agus in éagmais torthaí suirbhéanna den sórt sin, gur cheart an t-údarás inniúil a chur ar an eolas faoi agus a cheangal air leanúint ar aghaidh ar an mbonn nach bhfuil dóthain faisnéise chun amhras a chur as an áireamh an mbeidh tionchar suntasach ag an tionscadal ar an gcomhshaol?
An bhfuil sé d’éifeacht ag Airteagal 4(4) agus/nó le mír 3 d’Iarscríbhinn IIA a ghabhann le Treoir 2011/92, arna leasú le Treoir 2014/52, arna léiriú i bhfianaise phrionsabal an réamhchúraim, i gcás ina bhfuil an fhaisnéis faoi Iarscríbhinn IIa a ghabhann leis an Treoir le tabhairt, go gceanglaítear ar an údarás inniúil amhras a chur as an áireamh maidir leis an bhféidearthacht go mbeadh éifeachtaí suntasacha ar an gcomhshaol má bheartaíonn sé gan an tionscadal a chur faoi mheasúnú faoi Airteagail 5 go 10 den Treoir, agus dá bhrí sin i gcás, le linn cinneadh faoi Airteagal 4(2) den Treoir, nach bhfuil dóthain faisnéise go hoibiachtúil ag údarás inniúil chun amhras a chur as an áireamh i dtaobh an mbeidh éifeachtaí suntasacha ag an tionscadal ar an gcomhshaol, gur cheart go gceanglófaí go gcuirfí an tionscadal faoi réir measúnú faoi Airteagail 5 go 10 den Treoir?
Más ‘ní hea’ an freagra ginearálta atá ar an ar an gcéad cheist, an dtagann iarmhairtí den sórt sin chun cinn a mhéid a bhaineann an éifeacht shuntasach fhéideartha ar an gcomhshaol le speicis a bhféadfadh an tionscadal difear a dhéanamh dóibh i gcás ina bhfuil speicis den sórt sin i dteideal cosaint dhian faoi Airteagal 12 de Threoir 92/431 , ag féachaint inter alia don tábhacht a bhaineann le speicis den sórt sin mar a aithnítear in Airteagal 3(1)(b) de Threoir 2011/92 agus in aithris 11 a ghabhann le Treoir 2014/52?
An bhfuil d’éifeacht le hAirteagal 4(4) agus/nó le mír 3 d’Iarscríbhinn IIA a ghabhann le Treoir 2011/92, arna leasú le Treoir 2014/52, arna léiriú i bhfianaise phrionsabal an réamhchúraim, más rud é, tar éis don fhorbróir faisnéis a sholáthar de bhun Iarscríbhinn IIA den Treoir, go gcuireann páirtí eile faisnéis bhreise ar fáil don údarás inniúil atá in ann amhras a chruthú go hoibiachtúil maidir le héifeacht an tionscadail ar an gcomhshaol, go gceanglaítear ar an bhforbróir tuilleadh faisnéise a sholáthar don údarás inniúil a dhéanfadh amhras den sórt sin a chur as an áireamh nó an t-údarás inniúil a chur ar an eolas faoi easpa faisnéise den sórt sin, nó a gceanglaítear ar an údarás inniúil féin faisnéis bhreise a fháil a chuirfeadh an t-amhras sin as an áireamh nó mar mhalairt air sin a chinneadh go dteastaíonn an measúnú sin faoi Airteagail 5 go 10 den Treoir d’éagmais dóthain faisnéise chun amhras a eisiamh i dtaobh an mbeidh tionchar suntasach ag an tionscadal ar an gcomhshaol?
Más ‘ní hea’ an freagra ginearálta atá ar an gceathrú ceist, an dtiocfaidh iarmhairtí den sórt sin chun cinn a mhéid a bhaineann an éifeacht shuntasach fhéideartha ar an gcomhshaol le speicis a bhféadfadh an tionscadal difear a dhéanamh dóibh i gcás ina bhfuil speicis den sórt sin i dteideal cosaint dhocht faoi Airteagal 12 de Threoir 92/43 ón gComhairle, ag féachaint inter alia don tábhacht a bhaineann le speicis den sórt sin mar a aithnítear in Airteagal 3(l)(b) de Threoir 2011/92 agus in aithris 11 a ghabhann le Treoir 2014/52?
____________
1 Treoir 2011/92/AE ó Pharlaimint na hEorpa agus ón gComhairle an 13 Nollaig 2011 maidir le measúnú ar éifeachtaí tionscadal poiblí agus príobháideach áirithe ar an gcomhshaol (IO 2012, L 26, lch. 1).
1 Treoir 2014/52/AE ó Pharlaimint na hEorpa agus ón gComhairle an 16 Aibreán 2014 lena leasaítear Treoir 2011/92/AE maidir le measúnú ar éifeachtaí tionscadal poiblí agus príobháideach áirithe ar an gcomhshaol (IO 2014, L 124, lch. 1).
1 Treoir 92/43/CEE ón gComhairle an 21 Bealtaine 1992 maidir le gnáthóga nádúrtha agus fauna agus flora fiáine a chaomhnú (IO 1992, L 206, lch. 7).