Rikors ippreżentat fit-18 ta’ Ottubru 2021 – TL vs Il-Kummissjoni Ewropea
(Kawża T-677/21)
Lingwa tal-kawża: l-Ingliż
Partijiet
Rikorrent: TL (rappreżentant): L. Levi u N. Flandin, avukati)
Konvenut: Il-Kummissjoni Ewropea
Talbiet
Ir-rikorrenti titlob li l-Qorti Ġenerali jogħġobha:
Tannulla r-rapport tal-iżvilupp tal-karriera (iktar ’il quddiem ir-“RŻK”) tal-2019;
Sussidjarjament, tannulla r-RŻK sa fejn jinkludi kummenti kkontestati;
Fl-istess waqt, u sa fejn meħtieġ, tannulla d-deċiżjoni tal-konvenuta tat-8 ta’ Lulju 2021 li tiċħad l-ilment imressaq mir-rikorrenti kontra r-RŻK;
Tordna l-kumpens għad-dannu morali mġarrab mir-rikorrenti; u
Tikkundanna lill-konvenuta għall-ispejjeż.
Motivi u argumenti prinċipali
Insostenn tar-rikors tagħha, ir-rikorrenti tinvoka tliet motivi.
L-ewwel motiv ibbażat fuq il-fatt li peress li ebda objettiv ma kien stabbilit għas-sena 2019, il-konvenuta ma setgħetx tagħmel evalwazzjoni korretta u ġusta tal-prestazzjoni tar-rikorrenti fl-2019. Huwa allegat li dan in-nuqqas ta’ objettivi wassal għal żbalji manifesti ta’ evalwazzjoni, għal ksur tad-dmir ta’ premura u tal-prinċipju ta’ amministrazzjoni tajba.
It-tieni motiv ibbażat fuq il-ksur min-naħa tal-konvenuta tal-Artikolu 43 tar-Regolamenti tal-Persunal u tal-Guidance for Reporting Officers (il-Linji Gwida intiża għall-Evalwaturi). Huwa wkoll allegat li l-konvenuta wettqet żbalji manifesti ta’ evalwazzjoni u abbużat mis-setgħat tagħha. Ir-rikorrenti ssostni wkoll li l-konvenuta kisret id-dmir tagħha ta’ premura u d-dmir tagħha ta’ amministrazzjoni tajba.
It-tielet motiv ibbażat fuq il-ksur mill-konvenuta tal-Artikolu 292(2) TFUE, moqri flimkien mal-Artikolu 25(2) tar-Regolamenti tal-Persunal u l-Artikolu 41(2) tal-Karta tad-Drittijiet Fundamentali.
____________