Rikors ippreżentat fil-31 ta' Awwissu 2009 - Il-Ġermanja vs Il-Kummissjoni

(Kawża T-347/09)

Lingwa tal-kawża: Il-Ġermaniż

Partijiet

Rikorrenti: Ir-Repubblika Federali tal-Ġermanja (rappreżentanti: M. Lumma u B. Klein)

Konvenuta: Il-Kummissjoni tal-Komunitajiet Ewropej

Talbiet tar-rikorrenti

tannulla d-Deċiżjoni tal-Kummissjoni SG Greffe (2009) D/3985 dwar l-għajnuna mill-Istat Nru NN 8/2009, tat-2 ta' Lulju 2009, sa fejn il-miżuri nnotifikati huma klassifikati bħala għajnuna mill-Istat skont l-Artikolu 87(1) KE;

tikkundanna lill-konvenuta għall-ispejjeż.

Motivi u argumenti prinċipali

Ir-rikorrenti tikkontesta d-Deċiżjoni tal-Kummissjoni C(2009) 5080, fis-seħħ b'effett mit-2 ta' Lulju 2009, dwar għajnuna mill-Istat li tikkonsisti, minn naħa, fi trasferimenti mingħajr ħlas ta' ċerti żoni naturali ta' patrimonju nazzjonali, li huma proprjetà tal-Gvern Federali, u min-naħa l-oħra, ta' miżuri ta' sostenn għal proġetti kbar għal protezzjoni tal-ambjent (għajnuna mill-Istat NN 8/2009 - Il-Ġermanja - Żoni ta' protezzjoni). F'din id-deċiżjoni, il-Kummissjoni ssostni li l-għajnuna mill-Istat inkwistjoni hija kompatibbli mas-suq komuni skont l-Artikolu 86(2) KE. Ir-rikorrenti tikkontesta d-deċiżjoni kkontestata, sa fejn il-miżuri inkwistjoni huma kklassifikati bħala għajnuna mill-Istat skont l-Artikolu 87(1) KE.

Insostenn tar-rikors tagħha, ir-rikorrenti ssostni li l-konvenuta applikat b'mod żbaljat l-Artikolu 87(1) KE fir-rigward ta' numru ta' aspetti. Dwar dan, hija ssostni, inter alia, li l-konvenuta tikklassifika b'mod żbaljat organizzazzjonijiet ta' protezzjoni tal-ambjent bħala impriżi u naqset, b'mod żbaljat, milli twettaq evalwazzjoni ġenerali tal-miżuri inkwistjoni. Barra minn hekk, l-organizzazzjonijiet ta' protezzjoni tal-ambjent ma kisbu ebda vantaġġ oneruż permezz tal-miżuri inkwistjoni. Ir-rikorrenti ssostni wkoll li hemm applikazzjoni żbaljata tar-raba' kriterju kif stabbilit mill-Qorti tal-Ġustizja fis-sentenza tal-24 ta' Lulju 2003, fil-Kawża C-280/00 (Altmark Trans und Regierungspräsidkum Magdeburg, Ġabra p. I-7747).

Sussidjarjament, qiegħed jiġi invokat ksur tal-obbligu ta' motivazzjoni skont l-Artikolu 253 KE.

____________