Rikors ippreżentat fis-6 ta' Frar 2008 - Now Pharma vs Il-Kummissjoni

(Kawża T-74/08)

Lingwa tal-kawża: Il-Ġermaniż

Partijiet

Rikorrenti: Now Pharma AG (Lussemburgu, il-Lussemburgu) (rappreżentanti: C. Kaletta u I.-J. Tegebauer, Rechtsanwälte)

Konvenuta: Il-Kummissjoni tal-Komunitajiet Ewropej

Talbiet tar-rikorrenti

tannulla d-deċiżjoni tal-Kummissjoni C (2007) 6132, ta' l-4 ta' Diċembru 2007;

tordna lill-Kummissjoni tagħti deċiżjoni mill-ġdid fir-rigward ta' l-applikazzjoni tar-rikorrenti fid-dawl ta' l-interpretazzjoni tal-liġi mogħtija mill-Qorti tal-Prim'Istanza;

tikkundanna lill-konvenuta għall-ispejjeż.

Motivi u argumenti prinċipali

Ir-rikorrenti tikkontesta d-deċiżjoni tal-Kummissjoni ta' l-4 ta' Diċembru 2007, li biha ġiet miċħuda l-applikazzjoni tagħha sabiex il-prodott mediċinali "Estratt likwidu speċjali ta' Chelidonii radix" jiġi kklassifikat bħala prodott mediċinali orfni fis-sens tar-Regolament Nru 141/2000 KE ¹.

In sostenn tar-rikors tagħha, ir-rikorrenti ssostni li d-deċiżjoni kkontestata tikser l-Artikolu 3 tar-Regolament Nru 141/2000. F'dan ir-rigward, hija ssostni, b'mod partikolari, li l-opinjoni finali negattiva ta' l-Aġenzija Ewropea għall-Evalwazzjoni ta' Prodotti Mediċinali kienet ibbażata fuq kriterji żbaljati, jiġifieri fuq l-eżiġenzi għal awtorizzazzjoni ta' tqegħid fis-suq fir-rigward ta' prodott mediċinali kopert mill-Artikolu 8(3)(ċ) tar-Regolament Nru 141/2000. Madankollu, skond ir-rikorrenti, sabiex prodott mediċinali jiġi kklassifikat bħala prodott mediċinali orfni, dan għandu jkun ta' benefiċċju sinjifikanti għal dawk li huma affettwati minn din il-kundizzjoni, fis-sens ta' l-Artikolu 3(2) tar-Regolament (KE) Nru 847/2000 ². Skond ir-rikorrenti, ir-rekwiżiti ta' l-Artikolu 3(1)(b) tar-Regolament Nru 141/2000 huma sodisfatti, għaliex il-prodott mediċinali jservi għat-trattament ta' kundizzjonijiet rari u se jkun ta' benefiċċju sinjifikanti.

Barra minn hekk, ir-rikorrenti tikkontesta n-nuqqas ta' klassifikazzjoni u l-parzjalità ta' l-espert.

____________

¹ - Ir-Regolament tal-Parlament Ewropew u tal-Kunsill Nru 141/2000 KE, tas-16 ta' Diċembru 1999, dwar il-prodotti mediċinali orfni

² - Ir-Regolament tal-Kummissjoni Nru 847/2000 KE, tas-27 ta' April 2000, li jistabbilixxi d-dispożizzjonijiet għall-implimentazzjoni tal-kriterji għall-għażla ta' prodott mediċinali bħal prodott mediċinali orfni u definizzjonijiet tal-kunċetti "prodott mediċinali simili" u "superjorità klinika" (ĠU L 103, p. 5)