Rikors ippreżentat fit-12 ta' Settembru 2012 - Mitsubishi Electric vs Il-Kummissjoni
(Kawża T-409/12)
Lingwa tal-kawża: l-Ingliż
Partijiet
Rikorrenti: Mitsubishi Electric Corp. (Tokyo, il-Ġappun) (rappreżentanti: R. Denton, J. Vyavaharkar u R. Browne, Solicitors, u K. Haegeman, avukat)
Konvenuta: Il-Kummissjoni Ewropea
Talbiet tar-rikorrenti
tannulla d-Deċiżjoni tal-Kummissjoni C(2012) 4381 finali, tas-27 ta' Ġunju 2012, li temenda d-Deċiżjoni C(2006) 6762 finali, tal-24 ta' Jannar 2007, dwar proċedura skont l-Artikolu 81 tat-Trattat KE (li sar l-Artikolu 101 tat-Trattat dwar il-Funzjonament tal-Unjoni Ewropea) u l-Artikolu 53 tal-Ftehim ŻEE (Kawża COMP/39.966 - Switchgear insulat bil-gass - multi), sa fejn tikkonċerna lir-rikorrenti; jew, sussidjarjament,
tnaqqas b'mod sostanzjali l-ammont tal-multa li ġiet imposta fuqha;
tikkundanna lill-konvenuta għall-ispejjeż.
Motivi u argumenti prinċipali
Insostenn tar-rikors tagħha, ir-rikorrenti tinvoka disa' motivi.
L-ewwel motiv ibbażat fuq il-fatt li
l-Kummissjoni naqset mill-obbligu tagħha ta' motivazzjoni fir-rigward tal-kalkolu tal-multa u kisret il-prinċipju ta' amministrazzjoni tajba.
2. It-tieni motiv ibbażat fuq il-fatt li
l-Kummissjoni naqset mill-obbligu tagħha ta' motivazzjoni meta kkalkulat il-koeffiċjent multiplikatur applikabbli għar-rikorrenti u kisret il-prinċipji ta' ugwaljanza fit-trattament u ta' proporzjonalità meta kkalkulat dan il-multiplikatur.
3. It-tielet motiv ibbażat fuq il-fatt li
l-Kummissjoni kisret il-prinċipju ta' proporzjonalità meta ffissat il-multa tar-rikorrenti bl-istess mod li hija ffissat il-multa għall-produtturi Ewropej.
4. Ir-raba' motiv ibbażat fuq il-fatt li
il-Kummissjoni wettqet żball meta naqset milli tieħu inkunsiderazzjoni provi tekniċi u ekonomiċi meta hija evalwat l-impatt tal-aġir tar-rikorrenti u meta kkalkolat il-multa ta' din tal-aħħar.
5. Il-ħames motiv ibbażat fuq il-fatt li
il-Kummissjoni wettqet żball meta stabbilixxiet it-tul tal-akkordju allegat.
6. Is-sitt motiv ibbażat fuq il-fatt li
il-Kummissjoni wettqet żball meta ffissat il-proporzjonijiet tal-ammont inizjali ta' TM T&D li kellu jinqasam bejn ir-rikorrenti u kumpannija oħra, u b'hekk kisret il-prinċipji ta' ugwaljanza fit-trattament u ta' proporzjonalità.
7. Is-seba' motiv ibbażat fuq il-fatt li
il-Kummissjoni naqset mill-obbligu tagħha ta' motivazzjoni meta stabbilixxiet il-proporzjonijiet tal-ammont inizjali ta' TM T&D li kellu jinqasam bejn ir-rikorrenti u kumpannija oħra.
8. It-tmien motiv ibbażat fuq il-fatt li
il-Kummissjoni wettqet żball fil-metodu użat sabiex talloka ammont inizjali lir-rikorrenti għall-perijodu preċedenti għall-istabbiliment ta' TM T&D, u għaldaqstant kisret il-prinċipji ta' ugwaljanza fit-trattament u ta' proporzjonalità.
9. Id-disa' motiv ibbażat fuq il-fatt li
il-Kummissjoni naqset mill-obbligu tagħha ta' motivazzjoni fir-rigward tal-metodu użat sabiex talloka ammont inizjali lir-rikorrenti għall-perijodu preċedenti għall-istabbiliment ta' TM T&D.
____________