Caingean arna tabhairt an 1 Nollaig 2023 – Intel Corporation v an Coimisiún

(Cás T-1129/23)

Teanga an cháis: an Béarla

Páirtithe

Iarratasóir: Intel Corporation, Inc. (Wilmington, Delaware, Stáit Aontaithe Mheiriceá) (ionadaithe: J.-F. Bellis agus B. Meyring, Dlíodóirí, agus D. Beard agus J. Williams, Abhcóidí)

Cosantóir: an Coimisiún Eorpach

An t-ordú atá á lorg

Iarrann an t-iarratasóir ar an gCúirt Ghinearálta:

Cinneadh C(2023) 5914 final ón gCoimisiún an 22 Meán Fómhair 2023 i gCás AT.37990 – Intel (an ‘Cinneadh atá faoi chonspóid’) a chur ar neamhní (go hiomlán nó go páirteach);

dá dhroim sin, nó mar mhalairt air sin, an fhíneáil a forchuireadh ar Intel i bhfeidhmiú dhlínse neamhtheoranta na Cúirte a chur ar neamhní nó a laghdú; agus

a ordú don Choimisiún costais agus caiteachais Intel a íoc i ndáil leis na himeachtaí sin.

Saincheisteanna dlí agus príomhargóintí

Mar thaca leis an gcaingean, maíonn an t-iarratasóir trí shaincheist dlí.

An chéad saincheist dlí lena n-éilítear go bhfuil leibhéal na fíneála díréireach agus neamhdhleathach ós rud é: (i) go bhfuil sé díréireach i bhfianaise na dtorthaí in T-286/09 RENV Intel v an Coimisiún EU:T:2022:19, cineál, raon feidhme agus fairsinge Airteagal 1(f) go (h) Cinneadh C(2009) 3726 ón gCoimisiún an 13 Bealtaine 2009, agus neamhniú Airteagal 1(a) go (e) de Chinneadh C(2009) 3726 ón gCoimisiún an 13 Bealtaine 2009; (ii) nár aithin an Coimisiún an t-athrú radacach ar chineál aon sáraithe nua aonair agus leanúnaigh nach raibh ann ach an t-iompar in Airteagal 1(f) go (h) de Chinneadh C(2009) 3726 ón gCoimisiún an 13 Bealtaine 2009, agus a impleacht ar aon fhíneáil a fhorchur agus a ríomh; (iii) nár aithin an Coimisiún tionchar carnach éagsúil agus níos ísle an iompair a fhaightear in Airteagal 1(f) go (h) de Chinneadh C(2009) 3726 ón gCoimisiún an 13 Bealtaine 2009; (iv) gur mhainnigh an Coimisiún ábhair gheografacha agus dlínse a chur san áireamh, ar chor ar bith nó go leordhóthanach, i bhforchur agus i ríomh na fíneála; (i) nach bhfuil cur chuige an Choimisiúin maidir le ríomh luach ábhartha na ndíolachán chun bunmhéid na fíneála a shocrú i gcomhréir le dlí an Aontais Eorpaigh maidir le fíneálacha a ríomh, go rannchuidíonn sé leis an toradh ar léir go bhfuil sé díréireach, agus go mbaineann sé an bonn de bhrí cheart agus d’éifeacht cheart bhreithiúnas na Cúirte Ginearálta in T-286/09 RENV Intel v an Coimisiún; (vi) go bhfuil laghdú neamhshuntasach curtha i bhfeidhm ag an gCoimisiún ar an bhfachtóir tromchúise agus an fhíneáil á ríomh aige; agus/nó (vii) theip ar an gCoimisiún tosca maolaitheacha áirithe a chur san áireamh, ar chor ar bith nó go leordhóthanach.

An dara saincheist dlí lena n-éilítear gur sháraigh an Coimisiún ceanglais fhíor-riachtanacha nós imeachta trí (a) mhainneachtain cúiseanna a thabhairt sa Chinneadh atá faoi chonspóid agus/nó i gcomhfhreagras laistigh de na himeachtaí riaracháin as a dtáinig an Cinneadh sin; agus/nó trí (b) mhainneachtain deis a thabhairt d’Intel a chearta cosanta a fheidhmiú i gceart.

An tríú saincheist dlí lena n-éilítear gur mhainnigh an Coimisiún a mheas an raibh dlínse aige cinntí a dhéanamh agus/nó fíneáil a fhorchur i ndáil leis an iompar dá dtagraítear in Airteagal 1(g) go (h) de Chinneadh C(2009) 3726 ón gCoimisiún an 13 Bealtaine 2009. Dá ndéanfaí amhlaidh, ba cheart go mbeadh sé tagtha ar an gconclúid nach raibh aon dlínse aici.

____________