Rikors ippreżentat fil-11 ta’ Settembru 2017 – Google u Alphabet vs Il-Kummissjoni
(Kawża T-612/17)
Lingwa tal-kawża: l-Ingliż
Partijiet
Rikorrenti: Google Inc. (Mountain View, California, l-Istati Uniti) u Alphabet Inc. (Mountain View) (rappreżentanti: T. Graf, R. Snelders u C. Thomas, avukati, K. Fountoukakos-Kyriakakos, Solicitor, R. O’Donoghue u D. Piccinin, Barristers)
Konvenuta: Il-Kummissjoni Ewropea
Talbiet
tannulla d-deċiżjoni tal-Kummissjoni, tas-27 ta’ Ġunju 2017, dwar proċeduri taħt l-Artikolu 102 TFUE u l-Artikolu 54 tal-Ftehim dwar iż-ŻEE (AT.39741 - Google Search (Shopping));
sussidjarjament, tannulla jew tnaqqas il-multa imposta fuq ir-rikorrenti fl-eżerċizzju tal-ġurisdizzjoni sħiħa tal-Qorti tal-Ġustizzja, u
fi kwalunkwe każ, tikkundanna lill-Kummissjoni tħallas l-ispejjeż tar-rikorrenti u l-ispejjeż ta’ dawn il-proċeduri.
Motivi u argumenti prinċipali
Insostenn tar-rikors, ir-rikorrenti jinvokaw sitt motivi.
L-ewwel motiv, ibbażat fuq li d-deċiżjoni kkontestata hija żbaljata fil-konstatazzjoni li Google iffavorixxiet servizz ta’ paragun ta’ xiri ta’ billi wriet riżultati ta’ prodotti rraggruppati (Product Universals).
Ir-rikorrenti sostniet li d-deċiżjoni kkontestata tiżnatura l-fatti. Skont ir-rikorrenti, Google nediet riżultati ta’ prodotti rraggruppati sabiex ittejjeb il-kwalità, u mhux sabiex ikun hemm iktar traffiku għas-servizz ta’ paragun tax-xiri ta’ Google.
Ir-rikorrenti jsostnu wkoll li d-deċiżjoni kkontestata hija żbaljata fil-konstatazzjoni li t-trattament differenti ta’ riżultati tal-prodott u riżultati ġeneriċi jinvolvi favoritiżmu, meta ma hemm l-ebda diskriminazzjoni.
Ir-rikorrenti finalment isostnu li d-deċiżjoni kkontestata tikser l-istandard legali għall-evalwazzjoni tal-ġustifikazzjonijiet ta’ Google sabiex turi Product Universals.
It-tieni motiv, ibbażat fuq li d-deċiżjoni kkontestata hija żbaljata fil-konstatazzjoni li Google iffavorixxiet servizz ta’ paragun ta’ xiri billi wriet reklami tal-prodotti rraggruppati (Shopping Units).
Ir-rikorrenti sostniet li d-deċiżjoni kkontestata hija żbaljata meta kkonstatat li t-trattament differenti ta’ reklami tal-prodotti rraggruppati u riżultati peneriċi b’xejn jinvolvi favoritiżmu, meta ma hemmx diskriminazzjoni;
Ir-rikorrenti jsostnu wkoll li d-deċiżjoni kkontestata hija żbaljata meta kkonstatat li reklami tal-prodotti f’Shoppoing Units jibbenefikaw servizz ta’ paragun tax-xiri ta’ Google;
Ir-rikorrenti jsostnu finalment li d-deċiżjoni kkontestata tikser l-istandard legali sabiex jiġu evalwati l-ġustifikazzjonijiet oġġettivi ta’ Google sabiex jintwerew Shopping Units.
It-tielet motiv, ibbażat fuq li d-deċiżjoni kkontestata hija żbaljata meta tikkonsatata li l-allegat aġir abbużiv żvija it-traffiku ta’ tiftix ta’ Google.
Ir-rikorrenti jsostnu li d-deċiżjoni kkontestata ma turix li l-allegat aġir abbużiv naqqas it-traffiku ta’ tiftix ta’ Google lil aggregaturi.
Ir-rikorrenti jsostnu wkoll li d-deċiżjoni kkontestata ma turix li l-allegat aġir abbużiv żied it-traffiku lis-servizz ta’ paragun ta’ xiri ta’ Google;
Ir-raba’ motiv, ibbażat fuq li d-deċiżjoni kkontestata hija żbaljata meta kkonstatat li l-allegat aġir abbużiv jista’ jkollu effetti antikompetittivi.
Ir-rikorrenti jsostnu li d-deċiżjoni kkontestata hija żbaljata minħabba li tispekula dwar effetti antikompetittivi potenzjali mingħajr ma teżamina l-iżviluppi attwali tas-suq.
Ir-rikorrenti jsostnu wkoll li d-deċiżjoni kkontestata tonqos milli tieħu inkunsiderazzjoni kif xieraq ir-restrizzjoni kompetittiva eżerċitata mill-pjattaformi merkantili.
Ir-rikorrenti finalment jsostnu li anki jekk l-analiżi kompetittiva tista’ tkun limitata għall-aggregaturi, id-deċiżjoni kkontestata tonqos milli turi effetti antikompetittivi.
Il-ħames motiv, ibbażat fuq il-fatt li d-deċiżjoni kkontestata hija żbaljata meta tittratta titjib fil-kwalità li jikkostitwixxi kompetizzjoni fil-mertu bħala abbużiv.
Ir-rikorrenti jsostnu li d-deċiżjoni tikkaratterizza b’mod żbaljat it-tijib fil-prodott ta’ Google f’tiftix ġenerali bħala saħħa abbużiva;
Ir-rikorrenti jsostnu wkoll li d-deċiżjoni kkontestata titlob li Google tipprovdi aċċess lill-aggregaturi għat-titjib tal-prodotti tagħha, mingħajr ma tissodisfa l-kundizzjonijiet legali rikjesti.
Is-sitt motiv, ibbażat fuq il-fatt li d-deċiżjoni kkontestata hija żbaljata meta timponi multa.
Ir-rikorrenti jsostnu li multa ma tkunx meħtieġa minħabba li l-Kummissjoni ressqet teorija ġdida, għażlet il-każ għal impenji, u preċedentement ċaħdet ir-rimedju.
Ir-rikorrenti jsostnu wkoll li d-deċiżjoni kkontestata hija żbaljata fil-kalkolu tal-multa.
____________