Rikors ippreżentat fil-15 taʼ April 2013 - Typke vs Il-Kummissjoni
(Kawża T-214/13)
Lingwa tal-kawża: l-Ingliż
Partijiet
Rikorrent: Rainer Typke (Hasbergen, il-Ġermanja) (rappreżentanti: B. Cortese u A. Salerno, avukati)
Konvenuta: Il-Kummissjoni Ewropea
Talbiet tar-rikorrent
tannulla d-deċiżjoni tal-Kummissjoni Ewropea tal-5 ta' Frar 2013 li tirrifjuta l-applikazzjoni konfermatorja tar-rikorrent għal aċċess għal dokumenti skont ir-Regolament (KE) Nru 1049/2001 - fil-Proċedura GESTDEM 2012/3258;
tannulla d-deċiżjoni negattiva impliċita tal-Kummissjoni Ewropea tat-13 ta' Marzu 2013 dwar l-applikazzjoni konfermatorja tar-rikorrent għal aċċess għal dokumenti skont ir-Regolament (KE) Nru 1049/2001 - fil-Proċedura GESTDEM 2012/0068;
tikkundanna lill-konvenuta għall-ispejjeż.
Motivi u argumenti prinċipali
Insostenn tar-rikors tiegħu, ir-rikorrent jinvoka motiv wieħed, ibbażat fuq ksur tal-Artikoli 2 u 4 tar-Regolament (KE) Nru 1049/2001, kif ukoll ta' dispożizzjonijiet oħra tal-imsemmi regolament, għaliex:
Is-suppożizzjoni tal-Kummissjoni li t-talba tar-rikorrent ma taqax taħt il-kamp ta' applikazzjoni tar-Regolament (KE) Nru 1049/2001, li timplika l-ħolqien ta' dokumenti ġodda minflok aċċess għal dawk eżistenti, ma hijiex fondata;
Is-suppożizzjoni tal-Kummissjoni li t-talbiet tar-rikorrent huma sproporzjonati, u għaldaqstant inammissibbli, anki jekk titqies il-possibbiltà li jingħata aċċess parzjali, ma hijiex fondata;
Is-suppożizzjoni tal-Kummissjoni li t-talbiet tar-rikorrent huma esklużi minħabba l-ħtieġa li ma tiġix żvelata data personali ta' terzi ma hijiex fondata; u
Is-suppożizzjoni tal-Kummissjoni li t-talbiet tar-rikorrent huma esklużi minħabba l-ħtieġa li tinżamm il-kunfidenzjalità tal-proċedimenti tal-Bord tal-Għażla, u minħabba l-ħtieġa li jiġi protett il-proċess deċiżjonali tal-imsemmi Bord, ma hijiex fondata.
____________1 - Regolament (KE) Nru 1049/2001 tal-Parlament Ewropew u tal-Kunsill, tat-30 ta' Mejju 2001, dwar l-aċċess pubbliku għad-dokumenti tal-Parlament Ewropew, tal-Kunsill u tal-Kummissjoni (ĠU Edizzjoni Speċjali bil-Malti, Kapitolu 1, Vol. 3, p. 331)