Talba għal deċiżjoni preliminari mressqa mil-Landgericht Ravensburg (il-Ġermanja) fid-9 ta’ Novembru 2023 – Gruß Verwaltungs-GmbH et vs Volkswagen AG
(Kawża C-667/23, Volkswagen)
Lingwa tal-kawża: il-Ġermaniż
Qorti tar-rinviju
Landgericht Ravensburg
Partijiet fil-kawża prinċipali
Rikorrenti: Gruß Verwaltungs-GmbH, AT, FO, PV, QZ
Konvenut: Volkswagen AG
Domandi preliminari
It-talba għal kumpens tax-xerrej tal-vettura fil-konfront tal-manifattur tal-vettura minħabba t-tqegħid b’mod negliġenti fis-suq ta’ vettura b’tagħmir ta’ riduzzjoni li ma huwiex permissibbli fis-sens tal-Artikolu 5(2) tar-Regolament (KE) Nru 715/2007 tal-Parlament Ewropew u tal-Kunsill tal-20 ta’ Ġunju 2007 dwar l-approvazzjoni tat-tip ta’ vetturi bil-mutur fir-rigward ta’ l-emissjonijiet ta’ vetturi ħfief għall-passiġġieri u ta’ vetturi kummerċjali (Euro 5 u Euro 6) u dwar l-aċċess għal informazzjoni dwar it-tiswija u l-manutenzjoni tal-vetturi 1 , tista’ tiġi miċħuda minħabba li:
a) kien hemm żball dwar in-natura illegali tal-att min-naħa tal-manifattur li kien insormontabbli?
Fil-każ ta’ risposta fl-affermattiv:
b) l-iżball dwar in-natura illegali tal-att kien insormontabbli għall-manifattur peress li l-awtorità responsabbli għall-approvazzjoni tat-tip tal-KE jew ta’ miżuri sussegwenti fil-fatt approvat it-tagħmir ta’ riduzzjoni installat fil-vettura?
Fil-każ ta’ risposta fl-affermattiv:
c) l-iżball dwar in-natura illegali tal-att kien insormontabbli għall-manifattur peress li l-opinjoni legali tal-manifattur tal-vettura tal-Artikolu 5(2) tar-Regolament 715/2007 kienet ikkonfermata mill-awtorità responsabbli għall-approvazzjoni tat-tip tal-KE jew ta’ miżuri sussegwenti meta din kienet mistoqsija dwarha (approvazzjoni ipotetika)?
Huwa kompatibbli mad-dritt tal-Unjoni li, fit-talba għal kumpens fil-konfront tal-manifattur tal-vettura minħabba t-tqegħid b’mod negliġenti fis-suq ta’ vettura b’tagħmir ta’ riduzzjoni li ma huwiex permissibbli fis-sens tal-Artikolu 5(2) tar-Regolament Nru 715/2007
a) ix-xerrej tal-vettura għandu jippermetti t-tpaċija tal-benefiċċji li jirriżultaw mill-użu tal-vettura mal-ammont ta’ kumpens fit-talba tiegħu għal kumpens minuri, fejn il-benefiċċji li jirriżultaw mill-użu, flimkien mal-valur residwu, jaqbżu l-prezz tax-xiri mħallas bit-tnaqqis tal-ammont ta’ kumpens?
b) it-talba tax-xerrej tal-vettura għal kumpens żgħir hija limitata għal massimu ta’ 15 % tal-prezz tax-xiri imħallas?
____________
1 ĠU 2007, L 171, p. 1.