Rikors ippreżentat fil-21 ta’ Novembru 2016 – Vans vs EUIPO - Deichmann (V)

(Kawża T-817/16)

Lingwa tar-rikors: il-Ġermaniż

Partijiet

Rikorrenti: Vans, Inc. (Wilmington, Delaware, l-Istati Uniti) (rappreżentant: M. Hirsch, avukat)

Konvenut: L-Uffiċċju tal-Proprjetà Intellettwali tal-Unjoni Ewropea (EUIPO)

Parti oħra quddiem il-Bord tal-Appell: Deichmann SE (Essen, il-Ġermanja)

Informazzjoni dwar il-proċedimenti quddiem l-EUIPO

Applikant għat-trade mark kontenzjuża: ir-rikorrenti

Trade mark kontenzjuża kkonċernata: trade mark figurattiva tal-Unjoni Ewropea (Rappreżentazzjoni ta’ “V”) – Applikazzjoni għal reġistrazzjoni Nru 10 263 978

Proċedimenti quddiem l-EUIPO: proċedimenti ta’ oppożizzjoni

Deċiżjoni kkontestata: deċiżjoni tar-Raba’ Bord tal-Appell tal-EUIPO tad-19 ta’ Settembru 2016 fil-Każ R 2030/2015-4

Talbiet

timmodifika d-deċiżjoni kkontestata fis-sens li l-oppożizzjoni tiġi miċħuda fl-intier tagħha;

sussidjarjament: timmodifika d-deċiżjoni kkontestata fis-sens li l-oppożizzjoni tiġi miċħuda wkoll fir-rigward tal-“prodotti tal-ġilda jew imitazzjoni tal-ġilda; bagalji tal-ivvjaġġar u tal-idejn; umbrelel u bsaten tal-mixi; portafolli tal-but; basktijiet u pouches; barżakki ta’ fuq id-dar; basktijiet taċ-ċinturin; kartieri tad-dokumenti; basktijiet tal-iskola; basktijiet tal-iskola għall-isport; basktijiet tal-baħar; ħoloq taċ-ċwievet; basktijiet għal fuq il-ġenb; kontenituri tal-kards” fil-Klassi 18 u “lbies, xedd is-saqajn, xedd ir-ras; ċinturini; ingwanti” fil-Klassi 25;

iktar sussidjarjament: tannulla d-deċiżjoni kkontestata;

tikkundanna lill-EUIPO għall-ispejjeż.

Motivi invokati

Ksur tar-Regoli 19(2) u (3) u 20(1) tar-Regolament Nru 2868/95;

Ksur tal-Artikolu 8(1)(b) tar-Regolament Nru 207/2009;

Ksur tal-ewwel sentenza tal-Artikolu 60(1), tal-Artikolu 63(2), tal-ewwel sentenza tal-Artikolu 75(1) tar-Regolament Nru 207/2009, tal-prinċipju ta’ reformatio in peius u kif ukoll tad-dritt għal smigħ xieraq.

____________