Achomharc arna thabhairt an 29 Eanáir 2024 ag PNB Banka AS i gcoinne bhreithiúnas na Cúirte Ginearálta (an Seachtú Dlísheomra) a fógraíodh an 15 Samhain 2023 i gCás T-732/19, PNB Banka agus páirtithe eile v BRA

(Cás C-74/24 P)

Teanga an cháis: an Béarla

Páirtithe

Achomharcóir: PNB Banka AS (ionadaí: O. Behrends, Rechtsanwalt)

Páirtithe eile sna himeachtaí: Bord Réitigh Aonair (BRA), Poblacht na Laitvia, an Banc Ceannais Eorpach, HG, HH, HI, HJ, HL, HM, HN, HO

An t-ordú atá á lorg

Iarrann an t-achomharcóir ar an gCúirt Bhreithiúnais:

an breithiúnas atá faoi achomharc a chur ar ceal;

a dhearbhú go bhfuil Cinneadh BRA SRB/EES/2019/131 an 15 Lúnasa 2019 gan scéim réitigh a ghlacadh i ndáil leis an institiúid creidmheasaPNB Banka AS (‘an cinneadh atá faoi chonspóid’) ar neamhní de réir bhrí Airteagal 264 CFAE;

a mhéid nach bhfuil an Chúirt Bhreithiúnais in ann rialú a dhéanamh ar shubstaint an cháis, an cás a tharchur ar ais chuig an gCúirt Ghinearálta; agus

a ordú do BRA na costais a íoc.

Saincheisteanna dlí agus príomhargóintí

Mar thaca leis an achomharc, maíonn an t-achomharcóir ceithre shaincheist dlí.

An chéad saincheist dlí lena n-éilítear go ndearna an Chúirt Ghinearálta sárú nós imeachta trí mhainneachtain déileáil go hiomchuí leis an gcur isteach neamhdhleathach ar ionadaíocht éifeachtach an achomharcóra.

An dara saincheist dlí lena n-éilítear gur chuir an Chúirt Ghinearálta ráiteas mhíchuí ar chúiseanna ar fáil trí mhainneachtain cur síos a dhéanamh ar an leasú a rinneadh leis an gcinneadh atá faoi chonspóid ar sheasamh dlíthiúil an achomharcóra, ar ghlac an Chúirt Ghinearálta leis go raibh sé contrártha le seasamh BRA.

An tríú saincheist dlí lena n-éilítear go ndearna an Chúirt Ghinearálta earráidí éagsúla maidir le ceart an achomharcóra chun éisteacht a fháil.

An ceathrú saincheist dlí lena n-éilítear gur mhainnigh an Chúirt Ghinearálta aitheantas a thabhairt do chineál ultra vires chinneadh BRA sa chás seo trí mhainneachtain a aithint nach bhfuil an inniúlacht ag BRA faoi bhun Airteagal 18 den Rialachán maidir leis an Sásra Réitigh Aonair (SRMR) chun cinneadh ar bith a bhfuil éifeacht sheachtrach aige a ghlacadh, go háirithe i gcás nach gcomhlíontar na coinníollacha réitigh.

____________