Rikors ippreżentat fl-14 ta' Ottubru 2011 - Ghreiwati vs Il-Kunsill
(Kawża T-543/11)
Lingwa tal-kawża: il-Franċiż
Partijiet
Rikorrent: Emad Ghreiwati (Al Maliki, is-Sirja) (rappreżentant: P.-F. Gaborit, avukat)
Konvenut: Il-Kunsill tal-Unjoni Ewropea
Talbiet
Ir-rikorrent jitlob lill-Qorti Ġenerali jogħġobha:
tannulla d-Deċiżjoni 2011/522/PESK, ir-Regolament (UE) Nru 878/2011, id-Deċiżjoni 2011/628/PESK u r-Regolament (UE) Nru 950/2011, tal-Kunsill tal-Unjoni Ewropea, sa fejn dawn jikkonċernaw lil Emad Ghreiwati;
tikkundanna lill-Kunsill tal-Unjoni Ewropea għall-ispejjeż kollha tal-istanza.
Motivi u argumenti prinċipali
Insostenn tar-rikors tiegħu, ir-rikorrent jinvoka żewġ motivi.
L-ewwel motiv ibbażat fuq in-nuqqas ta' motivazzjoni u fuq ksur tad-drittijiet tad-difiża u tad-dritt għal rikors ġudizzjarju effettiv, sa fejn:
l-atti kkontestati, li jżidu isem ir-rikorrent mal-lista tal-persuni kkonċernati bil-miżuri restrittivi kontra s-Sirja, ma jurux il-motivazzjoni tal-miżura restrittiva meħuda kontrieh;
dawn id-deċiżjonjiet ma kinux ġew innotifikati, u
l-elementi meqjusa sabiex fuqhom jiġu bbażati l-miżuri restrittivi li jikkonċernaw lir-rikorrent għadhom qatt ma ġew ikkomunikati lilu minkejja talba indirizzata lill-Kunsill tal-Unjoni Ewropea.
It-tieni motiv ibbażat, sussidjarjament, fuq żball manifest ta' evalwazzjoni, sa fejn la l-kwalità tar-rikorrent bħala President tal-Kamra tal-Industrija ta' Damasku, u lanqas il-kwalità tiegħu bħala partner fil-kumpanija Zouheir Ghreiwati ma jippermettu li jiġi allegat kwalunkwe sostenn ekonomiku lir-reġim Sirjan.
____________