Caingean arna tabhairt an 18 Aibreán 2024 – Caronte&Tourist Isole Minori v an Coimisiún

(Cás T-208/24)

Teanga an cháis: an Béarla

Páirtithe

Iarratasóir: Caronte&Tourist Isole Minori SpA (Messina, an Iodáil) (ionadaí: M. Maćešić, Dlíodóir)

Cosantóir: an Coimisiún Eorpach

An t-ordú atá á lorg

Iarrann an t-iarratasóir ar an gCúirt Ghinearálta:

Cinneadh C(2024) 1065 final ón gCoimisiún an 14 Feabhra 2024 a chur ar neamhní, a mhéid a dhiúltaíonn sé rochtain ar dhoiciméid uimh. 2, 5, 7 agus 9 trí na heisceachtaí a leagtar síos sa dara fleasc agus sa tríú fleasc d’Airteagal 4(2) de Rialachán 1049/2001 ¹ a agairt agus trí rochtain a thabhairt ar na doiciméid arna n-iarraidh, cé is moite de na sonraí a bhaineann le cosaint phríobháideacht agus shláine an duine aonair;

a ordú don Choimisiún na costais a íoc.

Saincheisteanna dlí agus príomhargóintí

Mar thaca leis an gcaingean, maíonn an t-iarratasóir trí shaincheist dlí.

An chéad saincheist dlí lena n-éilítear go ndearna an Coimisiún earráid fhollasach measúnaithe agus Airteagal 4(2), an dara fleasc, de Rialachán 1049/2001 á chur i bhfeidhm aige.

Líomhnaítear gur mhainnigh an Coimisiún a shuíomh, agus an rochtain ar dhoiciméid á diúltú aige, nach féidir prionsabal chomhionannas na n-arm a agairt nuair is Ballstát ceann de na páirtithe san imeacht náisiúnta, toisc gur fíoras foirmiúil doshéanta é go n-achtaíonn an Stát an dlí, go bhforghníomhaíonn sé na dlíthe agus na trialacha maidir leis na dlíthe. Is é is cuspóir do phrionsabal an chomhionannais arm cothroime iomaíochta a chruthú idir dhá ábhar a ghlacann páirt i nós imeachta sibhialta. I gcás ina bhfuil an Ballstát ina pháirtí san imeacht, leanann sé, mar ábhar foirmeáltachta, go mbíonn éagothroime i bhfabhar an Bhallstáit i gcónaí.

An dara saincheist dlí lena n-éilítear go ndearna an Coimisiún earráid fhollasach measúnaithe agus Airteagal 4(2), an tríú fleasc, de Rialachán 1049/2001 á chur i bhfeidhm aige.

Ní féidir leis an gCoimisiún cúis na muiníne frithpháirtí agus an chomhair idir an Coimisiún agus na Ballstáit a agairt i bpróiseas na gcomhairliúchán agus Gníomh náisiúnta nua an Iompair Línéir Mhuirí (lena gcuirtear chun feidhme Rialachán (CEE) Uimh. 3577/92) ¹ ón gComhairle á ghlacadh aige  ós rud é go bhfuil an argóint sin contrártha do chás Schlyter, ² i.e. nach féidir forlámhas a bheith ag atmaisféar na muiníne frithpháirtí idir an Coimisiún agus an Ballstát ar phrionsabal na trédhearcachta i bpróiseas glactha na reachtaíochta náisiúnta nua

Ní bhainfeadh nochtadh na ndoiciméad a iarradh an bonn de chuspóir an Nós Imeachta Phíolótaigh an Aontais Eorpaigh (arna thionscnamh ag an iarratasóir) toisc go bhfuair an t-iarratasóir litir réamhdhúnta roimhe sin ó DG Move, litir ónar léir gur chinn an Coimisiún gan imeachtaí a thionscnamh os comhair Chúirt Bhreithiúnais an Aontais Eorpaigh maidir le pointí a bhaineann le saincheisteanna an chórais reachtaigh a bhí ann roimhe sin agus atá sna doiciméid a iarradh.

Bhí DG Move (a láimhseálann Nós Imeachta Píolótach an Aontais Eorpaigh) eolach cheana féin ar bharúlacha an dréachtghnímh nua maidir le hIompar Línéir Mhuirí (lena gcuirtear chun feidhme Rialachán (CEE) Uimh. 3577/92 sin ón gComhairle), toisc gur ghlac sí páirt ghníomhach sa phróiseas chun an Gníomh nua a ghlacadh trí mheasúnú críochnúil a dhéanamh.

An tríú saincheist dlí lena n-éilítear gur theip ar an gCoimisiún a chinneadh gurb ann do leas sáraitheach poiblí i ndáil le nochtadh.

Níor chomhlíon an Coimisiún an dualgas cúiseanna a lua maidir le heaspa leas sáraitheach poiblí i nochtadh, mar a suíodh i gcás Turco, ¹ toisc nár chinn sé ach nach mbaineann sé le hábhar an mbeadh éifeacht phoiblí ag toradh an imeachta náisiúnta maidir le cúiteamh as damáiste mar gheall ar shárú ar dhlí an Aontais i gcoinne an Bhallstáit.

Tá leas sáraitheach poiblí ann maidir le nochtadh san ábhar seo toisc go bhfuil margadh cabatáiste muirí na Cróite ina chuid de mhargadh inmheánach an Aontais agus go bhfuil an Gníomh nua maidir le hIompar Muirí Línéir (lena gcuirtear chun feidhme Rialachán (CEE) Uimh. 3577/92) sin ón gComhairle, ratione personae, infheidhme maidir le gach longúinéir ó Bhallstáit eile chomh maith. Thairis sin, ratione materiae, an Gníomh nua um Iompar Línéir Muirí lena gcuirtear chun feidhme an tsaoirse chun seirbhísí cabatáiste muirí a sholáthar (ceann de na saoirsí bunúsacha), déanann sé difear do chearta an longúinéara seirbhísí cabatáiste muirí a dhéanamh gan bhac, a bhfuil trédhearcacht i réim ina leith.

____________

¹ Rialachán (CE) Uimh. 1049/2001 ó Pharlaimint na hEorpa agus ón gComhairle an 30 Bealtaine 2001 maidir le rochtain phoiblí ar dhoiciméid ó Pharlaimint na hEorpa, ón gComhairle agus ón gCoimisiún (IO 2001 L 145, lch. 43).

¹ Rialachán (CEE) Uimh. 3577/92 ón gComhairle an 7 Nollaig 1992 lena ndéantar prionsabal na saoirse chun seirbhísí a sholáthar a chur i bhfeidhm ar iompar muirí laistigh de na Ballstáit (cabatáiste muirí) (IO 1992 L 364, lch. 7).

¹ Breithiúnas ón gCúirt Ghinearálta an 16 Aibreán 2015, Carl Schlyter v an Coimisiún (T-402/12, EU:T:2015:209).

¹ Breithiúnas ón gCúirt Bhreithiúnais an 1 Iúil 2008, Ríocht na Sualainne agus Maurizio Turco v an Chomhairle (Cásanna Uamtha C-39/05 P agus C-52/05 P, EU:C:2008:374).