Rikors ippreżentat fl-14 ta' Novembru 2012 - Biscuits Poult vs UASI - Banketbakkerij Merba (Biscuits)

(Kawża T-494/12)

Lingwa tar-rikors: il-Franċiż

Partijiet

Rikorrenti: Biscuits Poult (Montauban, Franza) (rappreżentant: C. Chapoullié, avukat)

Konvenut: L-Uffiċċju għall-Armonizzazzjoni fis-Suq Intern (Trade marks u Disinni)

Parti oħra quddiem il-Bord tal-Appell: Banketbakkerij Merba BV (Oosterhout, il-Belġju)

Talbiet

Ir-rikorrenti titlob li l-Qorti Ġenerali jogħġobha:

tannulla jew tal-inqas tirriforma d-deċiżjoni tat-Tielet Bord tal-Appell tal-Uffiċċju għall-Armonizzazzjoni fis-Suq Intern (Trade marks u Disinni) tat-2 ta' Awwissu 2012 fil-Każ R 914/2011-3;

tikkonferma d-deċiżjoni mogħtija mid-Diviżjoni tal-Kanċellazzjoni li rrikonoxxiet il-validità tal-Mudell Nru 001114292-0001;

tiċħad it-talba għal dikjarazzjoni ta' invalidità rreġistrata taħt ir-referemza ICD 000007120; u

tikkundanna lill-kumpannija Banketbakkerij Merba BV għall-ispejjeż.

Motivi u argumenti prinċipali

Trade mark Komunitarja rreġistrata li hija s-suġġett tat-talba għal dikjarazzjoni ta' invalidità : Mudell ta' gallettina li fin-nofs hija mdewba, għal gallettini fil-klassi 01-01 - Mudell Komunitarju Nru 001114292-0001

Proprjetarju tat-trade mark Komunitarja: ir-rikorrenti

Parti li qed titlob id-dikjarazzjoni ta' invalidità tat-trade mark Komunitarja: Banketbakkerij Merba BV

Motivazzjoni tat-talba għal invalidità: Ksur tal-Artikoli 4 sa 9 tar-Regolament Nru 6/2002

Deċiżjoni tad-Diviżjoni tal-Kanċellazzjoni: It-talba għal dikjarazzjoni ta' invalidità hija miċħuda

Deċiżjoni tal-Bord tal-Appell: Ir-rikors huwa milqugħ u l-mudell Komunitarju huwa ddikjarat null

Motivi invokati: Ksur tal-Artikolu 4(2) u tal-Artikolu 6 tar-Regolament Nru 6/2002

____________