Kawża T-353/10

Lito Maieftiko Gynaikologiko kai Cheirourgiko Kentro AE

vs

Il-Kummissjoni Ewropea

“Rikors għal annullament — Nota ta’ debitu — Eċċezzjoni ta’ inammissibbiltà — Natura kuntrattwali tat-tilwima — Natura tar-rikors — Kwalità ta’ att li jista’ jiġi kkontestat”

Sommarju tad-digriet

1.      Rikors għal annullament — Rikors li fil-verità jirrigwarda tilwima ta’ natura kuntrattwali — Annullament ta’ nota ta’ debitu maħruġa mill-Kummissjoni — Nuqqas ta’ ġurisdizzjoni tal-qorti tal-Unjoni — Inammissibbiltà

(Artikoli 263 TFUE u 288 TFUE)

2.      Rikors għal annullament — Rikors li fil-verità jirrigwarda tilwima ta’ natura kuntrattwali — Klassifikazzjoni mill-ġdid tar-rikors — Kundizzjonijiet

(Artikoli 263 TFUE u 272 TFUE; Regoli tal-Proċedura tal-Qorti Ġenerali, Artikolu 44(1)(ċ))

1.      Skont l-Artikolu 263 KE, il-qrati tal-Unjoni jistħarrġu l-legalità tal-atti adottati mill-istituzzjonijiet intiżi li jipproduċu effetti legali fir-rigward ta’ terzi, billi jbiddlu b’mod sostanzjali s-sitwazzjoni legali tagħhom. Din il-ġurisdizzjoni tikkonċerna biss l-atti msemmija fl-Artikolu 288 TFUE, li l-istituzzjonijiet jistgħu jadottaw fiċ-ċirkustanzi previsti mit-Trattat FUE, billi jeżerċitaw il-prerogattivi tagħhom ta’ awtorità pubblika.

Min-naħa l-oħra, l-atti adottati mill-istituzzjonijiet li jidħlu fl-ambitu ta’ kuntest purament kuntrattwali u li ma jistgħux jiġu sseparati minnu ma humiex imsemmija, minħabba n-natura tagħhom, fl-atti msemmija fl-Artikolu 288 TFUE, li l-annullament tagħhom jista’ jintalab skont l-Artikolu 263 TFUE.

Il-qorti tal-Unjoni, għaldaqstant tista’ validament tintalab tieħu konjizzjoni, fuq il-bażi tal-Artikolu 263 TFUE, ta’ rikors li jirrigwarda nota ta’ debitu maħruġa mill-Kummissjoni fil-kuntest ta’ kuntratt li jorbotha mar-rikorrenti biss jekk in-nota tfittex li toħloq effetti legali vinkolanti li jmorru lil hinn minn dawk li jirriżultaw mill-kuntratt u li jimplikaw l-eżerċizzju tal-prerogattivi ta’ awtorità pubblika mogħtija lill-Kummissjoni bħala awtorità pubblika.

(ara l-punti 22-25)

2.      Meta quddiemha jiġi ppreżentat rikors għal annullament jew rikors għad-danni, filwaqt li fil-verità t-tilwima tkun ta’ natura kuntrattwali, il-qorti tal-Unjoni għandha tikklassifika r-rikors mill-ġdid, jekk il-kundizzjonijiet għal tali klassifikazzjoni mill-ġdid jiġu sodisfatti.

Madankollu, quddiem tilwima ta’ natura kuntrattwali, il-qorti tal-Unjoni għandha tqis li jkun impossibbli għaliha li tikklassifika mill-ġdid rikors għal annullament kemm meta r-rieda espressa mir-rikorrenti li ma tibbażax it-talba tagħha fuq l-Artikolu 238 KE tipprekludi tali klassifikazzjoni mill-ġdid, kemm meta r-rikors ma jkun sostnut minn ebda motiv ibbażat fuq il-ksur tar-regoli li jirregolaw ir-relazzjoni kuntrattwali inkwistjoni, kemm jekk dawn ikunu klawżoli kuntrattwali jew dispożizzjonijiet tal-liġi nazzjonali mniżżla fil-kuntratt.

(ara l-punti 34, 35)