Caingean arna tabhairt an 30 Bealtaine 2023 – An Coimisiún Eorpach v Poblacht na Slóvaice
(Cás C-341/23)
Teanga an cháis: an tSlóvaicis
Páirtithe sna himeachtaí
Iarratasóir: An Coimisiún Eorpach (ionadaithe: M. Ioan agus R. Lindenthal, Gníomhairí)
Cosantóir: Poblacht na Slóvaice
An t-ordú atá á lorg
Iarrann an t-iarratasóir ar an gCúirt Bhreithiúnais:
a dhearbhú, toisc nár áirithigh Poblacht na Slóvaice, maidir leis an 11 líonadh talún dá dtagraítear san iarratas (Vlčie Hory, Bojná, Cuid B agus Cuid C — Céim I, Čadca –Podzávoz, Rajec – Šuja, Ružomberok – Biela Púť, Líonadh talún TKO Zubrohlava, Hnúšťa — Kotlište, Detva — Studienec Chéim II, Hontianske Tesáre, Hôrky — Pláne agus Stropkov — Chotča) gur cuireadh isteach na pleananna cóireála agus gach beart feabhais lena bhformheas ionas go bhféadfaí cinntí críochnaitheacha a dhéanamh i dtaobh an bhféadfadh oibriú an líonta talún leanúint ar aghaidh ar bhonn an phlean cóireála nó bearta a dhéanamh chun an líonadh talún a dhúnadh a luaithe ab fhéidir, nár chomhlíon sí a hoibleagáidí faoi Airteagal 14(a) agus (b) de Threoir 1999/31/CE1 maidir le líonadh talún le dramhaíl;
a dhearbhú, toisc nár áirithigh Poblacht na Slóvaice gur glacadh bearta le haghaidh na ndeich líonadh talún a leagtar amach san iarratas a dhúnadh a luaithe agus ab fhéidir (Stupava – Žabáreň, Bobogdány, Prietrž, Veronika Dežerice, Landfill KO Duslo, Šahy – Holá Stráž, Židová – Vráble, Smutná, Hnúšťa – Branzová, Veľká Ves) nár chomhlíon Poblacht na Slóvaice a hoibleagáidí faoi Airteagal 14(b) de Threoir 1999/31/CE maidir le líonadh talún le dramhaíl;
a ordú do Phoblacht na Slóvaice na costais a íoc.
Saincheisteanna dlí agus príomhargóintí:
De réir Airteagal 14 de Threoir 1999/31, bhí ar Phoblacht na Slóvaice bearta a dhéanamh chun a áirithiú go ndéanfaí na láithreáin líonta talún atá ann cheana, i.e. “líonta talún ar deonaíodh ceadúnas ina leith nó a bhí i bhfeidhm cheana tráth thrasuí na Treorach seo”, a mheasúnú de réir cheanglais na Treorach agus go ndúnfaí iad a luaithe ab fhéidir nó go gcuirfí siad i gcomhréir leis an Treoir laistigh den idirthréimhse ocht mbliana a chuaigh in éag an 16 Iúil 2009.
Faoi Airteagal 14(a) den Treoir, ceanglaíodh ar Phoblacht na Slóvaice, laistigh de bhliain amháin ó theacht i bhfeidhm na reachtaíochta lena dtrasuitear an Treoir, a áirithiú go ndearna oibreoir an líonta talún plean cóireála don láithreán a ullmhú agus a chur faoi bhráid na n-údarás inniúil lena fhormheas, lena n-áirítear na sonraí dá dtagraítear in Airteagal 8, agus aon bhearta feabhais a mheasfaí a bheith riachtanach chun ceanglais na Treorach a chomhlíonadh. De bhun Airteagal 14(b) den Treoir, tar éis an plean cóireála sin don láithreán a chur isteach, ba cheart go mbeadh cinneadh críochnaitheach déanta ag na húdaráis inniúla, ar bhonn an phlean sin agus na Treorach, maidir le cé acu a fhéadfaidh nó nach bhféadfaidh oibriú an líonta talún leanúint ar aghaidh. Ina theannta sin, de bhun na habairte deiridh d’Airteagal 14(b) den Treoir, ba cheart go mbeadh na bearta is gá glactha ag Poblacht na Slóvaice, i gcomhréir le hAirteagal 7(g) agus Airteagal 13, chun na láithreáin líonta talún sin nár tugadh cead dóibh leanúint de bheith ag oibriú de bhun Airteagal 8 a dhúnadh a luaithe ab fhéidir.
Mhainnigh Poblacht na Slóvaice na hoibleagáidí sin a chomhlíonadh.
____________
1 Treoir 1999/31/CE ón gComhairle an 26 Aibreán 1999 maidir le líonadh talún le dramhaíl (IO 1999 L 182, lch. 1).