Edizzjoni Provviżorja
DIGRIET TAL‑QORTI TAL‑ĠUSTIZZJA (Is‑Seba’ Awla)
10 ta’ April 2024 (*)
“Rinviju għal deċiżjoni preliminari – Artikolu 99 tar-Regoli tal-Proċedura tal-Qorti tal-Ġustizzja – Risposta li tkun tista’ kjarament tiġi dedotta mill-ġurisprudenza – Tassazzjoni – Taxxa fuq il-valur miżjud (VAT) – Direttiva 2006/112/KE – Artikolu 183 – Dritt għat-tnaqqis tal-VAT tal-input imħallsa – Modalitajiet ta’ eżerċizzju – Rimbors tardiv – Dewmien ikkawżat mill-applikazzjoni ta’ dispożizzjoni nazzjonali – Effett ta’ sentenza preliminari mogħtija mill-Qorti tal-Ġustizzja wara dawn il-fatti – Interessi moratorji – Preskrizzjoni – Prinċipji ta’ ekwivalenza, ta’ effettività u ta’ newtralità fiskali”
Fil-Kawża C‑532/23,
li għandha bħala suġġett talba għal deċiżjoni preliminari skont l-Artikolu 267 TFUE, imressqa mill-Fővárosi Törvényszék (il-Qorti tal-Belt ta’ Budapest, L-Ungerija), permezz ta’ deċiżjoni tal‑10 ta’ Lulju 2023, li waslet fil-Qorti tal-Ġustizzja fit‑18 ta’ Awwissu 2023, fil-proċedura
Lear Corporation Hungary Autóipari Gyártó Kft.
vs
Nemzeti Adó- és Vámhivatal Fellebbviteli Igazgatósága,
IL‑QORTI TAL‑ĠUSTIZZJA (Is‑Seba’ Awla),
komposta minn F. Biltgen, President tal-Awla, N. Wahl (Relatur) u J. Passer, Imħallfin,
Avukat Ġenerali: T. Ćapeta,
Reġistratur: A. Calot Escobar,
wara li rat id-deċiżjoni meħuda, wara li nstemgħet l-Avukata Ġenerali, li tagħti deċiżjoni permezz ta’ digriet motivat, konformement mal-Artikolu 99 tar-Regoli tal-Proċedura tal-Qorti tal-Ġustizzja,
tagħti l-preżenti
Digriet
1 It-talba għal deċiżjoni preliminari tirrigwarda l-interpretazzjoni tal-Artikolu 183 tad-Direttiva tal-Kunsill 2006/112/KE ta’ 28 ta’ Novembru 2006 dwar is-sistema komuni ta’ taxxa fuq il-valur miżjud (ĠU 2006, L 347, p. 1, rettifika fil-ĠU 2007, L 335, p. 60), kif ukoll tal-prinċipji ta’ ekwivalenza, ta’ effettività u ta’ newtralità fiskali.
2 Din it-talba tressqet fil-kuntest ta’ kawża bejn Lear Corporation Hungary Autóipari Gyártó Kft. (iktar ’il quddiem “Lear Corporation”) u n-Nemzeti Adó- és Vámhivatal Fellebbviteli Igazgatósága (id-Direttorat tal-Appelli tal-Amministrazzjoni Nazzjonali tat-Taxxa u tad-Dwana, l-Ungerija) (iktar ’il quddiem id-“Direttorat tal-Appelli”), dwar id-dritt ta’ Lear Corporation li tikseb il-ħlas ta’ interessi moratorji relatati mal-ħlas lura tardiv ta’ eċċess tat-taxxa fuq il-valur miżjud (VAT) li jirriżulta minn kundizzjoni imposta minn dispożizzjoni nazzjonali li sussegwentement ġiet iddikjarata inkompatibbli mad-dritt tal-Unjoni mill-Qorti tal-Ġustizzja.
Il‑kuntest ġuridiku
Id‑dritt tal‑Unjoni
3 L-Artikolu 183 tad-Direttiva 2006/112 jipprevedi:
“Fejn, għal perijodu partikolari ta’ taxxa, l-ammont ta’ tnaqqis jeċċedi l-ammont tal-VAT dovuta, l-Istati Membri jistgħu, skond il-kondizzjonijet li huma għandhom jiddeterminaw, jew jagħmlu rifużjoni jew imexxu l-eċċess ’il quddiem għall-perijodu li jmiss.
Madankollu, l-Istati Membri jistgħu jirrifjutaw li jagħmlu rifużjoni jew li jmexxu “l quddiem jekk l-ammont ta’ l-eċċess hu insinifikanti”.
Id‑dritt Ungeriż
Il‑Liġi li temenda l‑Liġi dwar il‑VAT
4 L-az általános forgalmi adóról szóló 2007. évi CXXVII. törvény jogharmonizációs célú módosításáról és az adó-visszaigénylés különös eljárási szabályairól szóló 2011. évi CXXIII. törvény (il-Liġi CXXIII tal‑2011 li Temenda bl-Għan ta’ Armonizzazzjoni l-Liġi CXXVII tal‑2007 dwar it-Taxxa fuq il-Valur Miżjud u li Tistabbilixxi il-Modalitajiet tal-Proċedura Speċjali għall-Irkupru tal-VAT) (Magyar Közlöny 2011/110, iktar ’il quddiem il-“Liġi li temenda l-Liġi dwar il-VAT”), ħassret, b’effett mis‑27 ta’ Settembru 2011, l-Artikolu 186(2) sa (4) tal-az általános forgalmi adóról szóló 2007. évi CXXVII. törvény (il-Liġi CXXVII tal‑2007 dwar il-VAT) (Magyar Közlöny 2007/15), sabiex tippermetti r-rimbors tal-eċċess tal-VAT li tista’ titnaqqas mingħajr ħtieġa li jiġi mistenni l-ħlas tal-korrispettiv dovut minħabba t-tranżazzjoni li minnha tirriżulta l-VAT li tista’ titnaqqas. Preċedentement, dan l-Artikolu 186, kien jipprevedi, fil-paragrafu 2 tiegħu, li l-eżerċizzju tad-dritt għar-rimbors ta’ eċċess tal-VAT li tista’ titnaqqas kien suġġett għal kundizzjoni dwar il-ħlas tal-ammont dovut fir-rigward tat-tranżazzjoni inkwistjoni.
5 L-Artikolu 1(1) tal-Liġi li temenda l-Liġi dwar il-VAT , jipprovdi:
“L-ammonti li fir-rigward tagħhom il-persuna taxxabbli ma kinitx f’pożizzjoni li titlob, fl-aħħar dikjarazzjoni tal-VAT li kellha tippreżenta qabel id-dħul fis-seħħ ta’ din il-liġi (iktar ’il quddiem id-‘dikjarazzjoni’), id-dritt tagħha għal irkupru skont l-Artikolu 186(2) sa (4), [...] imħassar minn din il-liġi ‐ biss għall-ammont li l-persuna taxxabbli niżżlet bħala taxxa fuq l-akkwisti mhux imħallsa ‐ jistgħu jkunu s-suġġett ta’ talba għal irkupru mressqa quddiem l-awtoritajiet fiskali mill-persuna taxxabbli sal‑20 ta’ Ottubru 2011, bl-użu tal-formola pprovduta għal dan l-għan; irrispettivament minn dan il-perijodu, il-persuna taxxabbli tista’, fid-dikjarazzjoni korrispondenti għall-iskema li hija suġġetta għaliha, tgħodd l-ammonti ta’ hawn fuq bħala punt li jnaqqas l-ammont ta’ taxxa li għaliha hija responsabbli, jew teżerċita d-dritt tagħha għal rimbors fid-dikjarazzjoni tagħha. Din it-talba hija meqjusa bħala dikjarazzjoni għall-finijiet tal-applikazzjoni tad-dispożizzjonijiet [tal-Kodiċi ta’ Proċedura Fiskali]. It-terminu sabiex titressaq din it-talba huwa terminu ta’ dekadenza li l-persuna taxxabbli ma tistax tiġi meħlusa minnu”.
Il‑Kodiċi ta’ Proċedura Fiskali
6 L-az adózás rendjéről szóló 2003. évi XCII. törvény (il-Liġi XCII tal‑2003 li tistabbilixxi l-Kodiċi ta’ Proċedura Fiskali) (Magyar Közlöny 2003/131, iktar ’il quddiem il-“Kodiċi ta’ Proċedura Fiskali”), tipprovdi, fl-Artikolu 37(4) sa (6) tagħha:
“(4) Id-data li fiha jkun dovut il-ħlas ta’ sussidju baġitarju dovut lill-persuna taxxabbli għandha tiġi rregolata mill-Annessi ta’ din il-liġi jew liġi speċifika. L-għoti baġitarju jew il-VAT li r-rimbors tagħha huwa mitlub għandhom jitħallsu fi 30 jum mill-irċevuta tat-talba (dikjarazzjoni), iżda mhux qabel id-data li fiha tkun dovuta, u fejn l-ammont ta’ VAT li jista’ jiġi rkuprat jeċċedi HUF 500 000 [madwar EUR 1 300] dan il-perijodu jiġi estiż għal 45 jum.
[...]
(6) Fejn l-amministrazzjoni fiskali tagħmel ħlas tardiv, din għandha tħallas interessi b’rata ekwivalenti għal dik ta’ penali moratorja għal kull jum ta’ dewmien. [...]”.
7 Skont l-Artikolu 124/C tal-Kodiċi ta’ Proċedura Fiskali:
“(1) Fejn l-Alkotmánybíróság [il-Qorti Kostituzzjonali, l-Ungerija], il-Kúria [il-Qorti Suprema, l-Ungerija] jew il-[Qorti tal-Ġustizzja] jikkonstataw, b’effett retroattiv, li regola ta’ dritt li tippreskrivi obbligu fiskali tikser il-Liġi Fundamentali jew att obbligatorju tal-Unjoni Ewropea jew, fil-każ ta’ regolament muniċipali, kwalunkwe regola oħra ta’ dritt, u li din id-deċiżjoni ġudizzjarja tagħti lok għal dritt ta’ rimbors għall-persuna taxxabbli skont id-dispożizzjonijiet ta’ dan l-artikolu, l-awtorità fiskali inizjali għandha tipproċedi bir-rimbors fuq it-talba tal-persuna taxxabbli ‐ u skont il-modalitajiet stabbiliti fid-deċiżjoni kkonċernata.
(2) Il-persuna taxxabbli tista’ tressaq it-talba tagħha bil-miktub lill-awtorità fiskali f’180 jum mill-pubblikazzjoni jew notifika tad-deċiżjoni tal-Alkotmánybíróság [il-Qorti Kostituzzjonali], tal-Kúria [il-Qorti Suprema] jew tal-[Qorti tal-Ġustizzja]; l-ebda talba għal dikjarazzjoni ta’ dekadenza ma għandha tiġi aċċettata fi tmiem il-perijodu. L-awtorità fiskali għandha tiċħad it-talba f’każ li, fid-data tal-pubblikazzjoni jew notifika tad-deċiżjoni, id-dritt għal talba għal kumpens ikun skada.
[...]
(6) Jekk id-dritt ta’ persuna taxxabbli għal rimbors huwa fondat sew, l-awtorità fiskali għandha tħallas ‐ fil-mument tar-rimbors ‐ l-interessi fuq it-taxxa li għandha tiġi rrimborsata, b’rata ekwivalenti għar-rata bażika tal-bank ċentrali u kkalkolata mid-data tal-ħlas tat-taxxa sal-jum li fih id-deċiżjoni tal-għoti tar-rimbors saret finali. Ir-rimbors huwa dovut fid-data li fiha d-deċiżjoni tal-għoti tiegħu saret finali u għandu jsir fi 30 jum mid-data li fiha sar dovut. Id-dispożizzjonijiet li jirrelataw mal-ħlas ta’ sussidji baġitarji għandhom japplikaw mutatis mutandis għar-rimbors irregolat minn dan il-paragrafu, bl-eċċezzjoni tal-Artikolu 37(6)”.
8 L-Artikolu 124/D(1) sa (3) tal-Kodiċi ta’ Proċedura Fiskali huwa fformulat kif ġej:
“(1) Sakemm mhux previst mod ieħor f’dan l-artikolu, id-dispożizzjonijiet tal-Artikolu 124/C għandhom japplikaw għal rikorsi ta’ rimbors ibbażati fuq id-dritt li titnaqqas il-VAT.
(2) Il-persuna taxxabbli tista’ teżerċita d-dritt imsemmi fil-paragrafu 1 hawn fuq permezz ta’ dikjarazzjoni ta’ regolarizzazzjoni ‐ ippreżentata f’180 jum mill-pubblikazzjoni jew notifika tad-deċiżjoni tal-Alkotmánybíróság [il-Qorti Kostituzzjonali], tal-Kúria [il-Qorti Suprema] jew tal-[Qorti tal-Ġustizzja] ‐ tad-dikjarazzjoni jew dikjarazzjonijiet li jikkorrispondu għas-sena jew is-snin fiskali li fihom inħoloq id-dritt ta’ tnaqqis ikkonċernat. L-ebda talba għal dikjarazzjoni ta’ dekadenza ma għandha tiġi aċċettata fi tmiem il-perijodu.
(3) Jekk id-dikjarazzjoni, kif ikkoreġuta fid-dikjarazzjoni ta’ regolarizzazzjoni, turi li l-persuna taxxabbli hija intitolata għal rimbors minħabba t-tnaqqis fit-taxxa li hija għandha tħallas jew minħabba ż-żieda fl-ammont li jista’ jiġi rkuprat […], l-awtorità fiskali għandha tapplika għall-ammont li għandu jiġi rrimborsat rata ta’ interessi ekwivalenti għar-rata bażika tal-bank ċentrali, ikkalkolata għall-perijodu bejn id-data stabbilita għall-ħlas fid-dikjarazzjoni jew fid-dikjarazzjonijiet ikkonċernati mid-dikjarazzjoni ta’ regolarizzazzjoni, jew id-data dovuta ‑ jew id-data tal-ħlas tat-taxxa jekk din tkun iktar tard – u d-data li fiha tiġi ppreżentata d-dikjarazzjoni ta’ regolarizzazzjoni. Ir-rimbors ‐ li għalih japplikaw id-dispożizzjonijiet li jirrelataw mal-ħlas ta’ sussidji baġitarji – għandu jiġi ppreżentat fi 30 jum mid-data tal-preżentata tad-dikjarazzjoni ta’ regolarizzazzjoni”.
9 L-Artikolu 164(1) tal-imsemmi kodiċi jipprevedi:
“Id-dritt għall-evalwazzjoni tat-taxxa jiskadi 5 snin wara l-aħħar jum tas-sena kalendarja li fiha kellha ssir id-dikjarazzjoni jew in-notifika li tirrelata ma’ din it-taxxa, jew fl-assenza ta’ tali dikjarazzjoni jew notifika, li fiha t-taxxa kellha titħallas. Sakemm mhux previst mod ieħor bil-liġi, id-dritt biex jintalab sussidju baġitarju u d-dritt għar-rimbors ta’ ħlas indebitu jiskadi 5 snin wara l-aħħar jum tas-sena kalendarja li fiha d-dritt biex jintalab is-sussidju jew ir-rimbors ikun beda”.
Il‑kawża prinċipali u d‑domandi preliminari
10 Lear Corporation tipproduċi tagħmir għall-vetturi bil-mutur f’diversi siti fl-Ungerija. Għall-perijodi ta’ dikjarazzjoni tal-VAT mix-xahar ta’ Diċembru 2005 sax-xahar ta’ Lulju 2011, hija ma setgħetx tinvoka d-dritt tagħha għar-rimbors tal-VAT minħabba l-eżistenza tal-kundizzjoni fis-seħħ dak iż-żmien u mfakkra fil-punt 4 ta’ dan id-digriet, magħrufa bħala “akkwisti mħallsa”, li tgħid li kien biss ix-xiri kollu mħallas li kien jagħti dritt għal tnaqqis tal-VAT tal-input imħallsa.
11 Fis-senentza tat‑28 ta’ Lulju 2011, Il‑Kummissjoni vs L‑Ungerija (C‑274/10, EU:C:2011:530, punt 54), il-Qorti tal-Ġustizzja ddeċidiet li l-Artikolu 183 tad-Direttiva 2006/112 ma jippermettix lill-Istati Membri jimponu fuq l-eżerċizzju tad-dritt għar-rimbors ta’ eċċess tal-VAT li tista’ titnaqqas kundizzjoni dwar il-ħlas tal-ammont dovut għat-tranżazzjoni inkwistjoni.
12 Wara din is-sentenza, il-leġiżlatur Ungeriż adotta l-Liġi li temenda l-Liġi dwar il-VAT. Madankollu, din il-liġi l-ġdida ma fiha l-ebda regola li tipprevedi kumpens lill-persuni taxxabbli għad-danni finanzjarji li jirriżultaw mill-applikazzjoni tal-kundizzjoni magħrufa bħala tal-“akkwisti mħallsa”, iddikjarata inkompatibbli mad-dritt tal-Unjoni.
13 Fit‑30 ta’ Settembru 2011, Lear Corporation, skont il-Liġi li temenda l-Liġi dwar il-VAT, ressqet talba għall-irkupru tal-VAT fir-rigward tal-perijodu msemmi fil-punt 10 ta’ dan id-digriet. L-amministrazzjoni fiskali Ungeriża rrimborsatha l-ammont tal-VAT mitlub, mingħajr madankollu ma ħallset interessi moratorji.
14 F’digriet tas‑17 ta’ Lulju 2014, fil-kawża Delphi Hungary Autóalkatrész Gyártó (C‑654/13, EU:C:2014:2127, punt 39), il-Qorti tal-Ġustizzja ddeċidiet li d-dritt tal-Unjoni, u b’mod partikolari l-Artikolu 183 tad-Direttiva 2006/112, għandu jiġu interpretati fis-sens li jipprekludi leġiżlazzjoni u prattika ta’ Stat Membru li jeskludu l-ħlas ta’ interessi moratorji fuq l-ammont tal-VAT li ma jistax jiġi rkuprat f’perijodu raġonevoli ta’ żmien minħabba dispożizzjoni nazzjonali kkunsidrata li tikser id-dritt tal-Unjoni.
15 Il-Qorti tal-Ġustizzja speċifikat li, fl-assenza ta’ leġiżlazzjoni tal-Unjoni fil-qasam, huwa l-Istat Membru li għandu jiddetermina, fl-osservanza tal-prinċipji ta’ ekwivalenza u ta’ effettività, il-modalitajiet ta’ ħlas ta’ dawn l-interessi, li ma għandhomx ikunu inqas favorevoli minn dawk applikabbli għar-rikorsi fondati fuq il-ksur tad-dritt intern li għandu għan u kawża simili għal dawk fondati fuq il-ksur tad-dritt tal-Unjoni (prinċipju ta’ ekwivalenza) u lanqas ma għandhom jiġu organizzati b’mod li jrendi fil-prattika impossibbli jew eċċessivament diffiċli l-eżerċizzju tad-drittijiet mogħtija permezz tal-ordinament ġuridiku tal-Unjoni (prinċipju ta’ effettività).
16 Fit‑23 ta’ Diċembru 2014, billi rreferiet għad-digriet tas‑17 ta’ Lulju 2014, Delphi Hungary Autóalkatrész Gyártó (C‑654/13, EU:C:2014:2127), Lear Corporation ippreżentat lin-Nemzeti Adó- és Vámhivatal Kiemelt Adózók Adóigazgatóság (id-Direttorat tat-Taxxi għall-Kontribwenti l-Kbar tal-Amministrazzjoni Nazzjonali tat-Taxxa u tad-Dwana, l-Ungerija) (iktar ’il quddiem l-“awtorità fiskali tal-ewwel grad”) talba għall-ħlas tal-interessi moratorji fl-ammont ta’ HUF 457 916 030 (jiġifieri, fid-data ta’ dik it-talba, madwar EUR 1 458 656) għal rimbors tardiv tal-VAT (iktar ’il quddiem l-“interessi moratorji”). Hija talbet ukoll interessi minħabba l-ħlas tardiv tal-interessi moratorji (iktar ’il quddiem l-“interessi komposti”) għall-perijodu bejn l‑1 ta’ Jannar 2008 u l‑31 ta’ Lulju 2011.
17 Peress li l-awtorità fiskali tal-ewwel grad ċaħdet it-talba tagħha, Lear Corporation adixxiet lid-Direttorat tal-Appelli, li, permezz ta’ deċiżjoni tat‑12 ta’ Ottubru 2015, annulla id-deċiżjoni meħuda minn dik l-awtorità u ordnalha tiddeċiedi mill-ġdid fuq il-fajl.
18 Permezz ta’ deċiżjoni tal‑10 ta’ Novembru 2015, mogħtija wara l-proċedura ta’ eżami mill-ġdid, l-awtorità fiskali tal-ewwel grad laqgħet parzjalment it-talba ta’ Lear Corporation. Permezz ta’ talba addizzjonali mressqa fit‑2 ta’ Novembru 2016, din talbet lil dik l-awtorità tikkompleta d-deċiżjoni tagħha billi tallokalha ammont ta’ HUF 122 108 685 (jiġifieri, fid-data ta’ dik it-talba addizzjonali, madwar EUR 396 380), bħala interessi komposti, billi sostniet li l-imsemmija awtorità kellha tagħtiha ex officio.
19 F’sentenza tal‑24 ta’ Novembru 2016, il-Kúria (il-Qorti Suprema) iddeċidiet dwar il-prattika segwita mill-amministrazzjoni fiskali Ungeriża, sabiex tislet il-konsegwenzi tad-digriet tas‑17 ta’ Lulju 2014, Delphi Hungary Autóalkatresz Gyártó (C‑654/13, EU:C:2014:2127). Abbażi ta’ dak id-digriet, hija adottat id-deċiżjoni ta’ prinċipju Nru 18/2017, li fiha hija ppreċiżat il-modalitajiet ta’ kalkolu tal-interessi moratorji fuq l-ammonti tal-VAT li ma setgħux jiġu rkuprati minħabba l-kundizzjoni msejħa tal-“akkwisti mħallsa”, imħasra bil-Liġi li temenda l-Liġi dwar il-VAT.
20 Fid-dawl ta’ dik id-deċiżjoni ta’ prinċipju, id-Direttorat tal-Appelli, permezz ta’ deċiżjoni tas‑7 ta’ Marzu 2017, annulla d-deċiżjoni tal‑10 ta’ Novembru 2015 u ordna lill-awtorità fiskali tal-ewwel grad twettaq eżami ġdid tat-talba għall-ħlas tal-interessi moratorji mressqa minn Lear Corporation. Dik l-awtorità, permezz ta’ deċiżjoni tat‑18 ta’ April 2017, laqgħet parzjalment din it-talba billi tatha interessi moratorji fl-ammont ta’ HUF 225 825 000 (jiġifieri, fid-data tat‑18 ta’ April 2017, madwar EUR 720 585), ikkalkolati skont ir-rata bażika tal-bank ċentrali Ungeriż, għall-perijodu bejn l‑1 ta’ Jannar 2008 u l‑31 ta’ Lulju 2011.
21 Lear Corporation, li ma kinitx issodisfatta b’din id-deċiżjoni, adixxiet lid-Direttorat tal-Appelli billi talbet li jingħatalha wkoll interessi moratorji għall-perijodu bejn ix-xahar ta’ Diċembru 2005 u x-xahar ta’ Diċembru 2007, sabiex tieħu inkunsiderazzjoni l-perijodu kollu li matulu hija ma setgħetx tinvoka d-dritt tagħha għar-rimbors tal-VAT, u dan fid-dawl tad-deċiżjoni ta’ prinċipju Nru 18/2017 tal-Kúria (il-Qorti Suprema).
22 Wara li rrilevat li Lear Corporation kienet ippreżentat it-talba tagħha għall-ħlas ta’ interessi moratorji fit‑23 ta’ Diċembru 2014, jiġifieri fit-terminu impost taħt piena ta’ dekadenza, billi indikat fiha espressament il-perijodu mill‑1 ta’ Jannar 2008 sal‑31 ta’ Lulju 2011 bħala dak li fuqu kienet ibbażata dik it-talba, id-Direttorat tal-Appelli qies li, fid-dawl tal-prinċipju dispożittiv, li l-partijiet jiddefinixxu s-suġġett tat-tilwima, l-awtorità fiskali tal-ewwel grad kienet obbligata tiddeċiedi biss fuq l-imsemmija talba. L-imsemmi direttorat għalhekk qies li t-talba għall-ħlas ta’ interessi moratorji għall-perijodu mill‑1 ta’ Diċembru 2005 sal‑31 ta’ Diċembru 2007 kellha tiġi eżaminata bħala talba ġdida. Konsegwentement, hija rrinvijat il-kawża quddiem dik l-awtorità sabiex tiddeċiedi dwar il-ħlas tal-interessi moratorji msemmija f’dik it-talba.
23 Permezz ta’ deċiżjoni tal‑1 ta’ Settembru 2017, l-awtorità fiskali tal-ewwel grad ċaħdet l-imsemmija talba għar-raġuni li din kienet tardiva, peress li, skont id-deċiżjoni ta’ prinċipju Nru 18/2017, il-ħlas ta’ interessi moratorji kien espressament suġġett għal talba mressqa minn persuna taxxabbli li, fid-dawl tat-terminu ta’ preskrizzjoni, setgħet titressaq biss sal‑31 ta’ Diċembru 2016. Dik id-deċiżjoni ġiet ikkonfermata mid-Direttorat tal-Appelli fl‑1 ta’ Diċembru 2017.
24 Għaldaqstant, Lear Corporation ippreżentat rikors quddiem il-Fővárosi Törvényszék (il-Qorti tal-Belt ta’ Budapest, l-Ungerija) fejn sostniet li hija kellha wkoll dritt li tirċievi l-interessi moratorji li jikkorrispondu għall-perijodu mix-xahar ta’ Diċembru 2005 sax-xahar ta’ Diċembru 2007 inklużi, minħabba, b’mod partikolari, li, bl-introduzzjoni fl‑2011 tat-talba msemmija fil-punt 13 ta’ dan id-digriet, hija kienet invokat id-dritt tagħha għar-rimbors tal-VAT, li kien jikkostitwixxi l-kundizzjoni għall-għoti tal-interessi. Hija fakkret li hija kienet speċifikament ressqet talba għall-ħlas tal-interessi moratorji fit‑23 ta’ Diċembru 2014, jiġifieri fit-terminu ta’ preskrizzjoni, u li, skont id-deċiżjoni ta’ prinċipju Nru 18/2017, l-awtorità fiskali tal-ewwel grad kellha tħallasha tali interessi għall-perijodu kollu kkonċernat mingħajr ma tkun marbuta, f’dan ir-rigward, mill-kliem tat-talba tagħha, peress li l-prinċipju ta’ effettività għandu jipprevali fuq il-prinċipju dispożittiv.
25 F’dawn iċ-ċirkustanzi, il-Fővárosi Törvényszék (il-Qorti tal-Belt ta’ Budapest) iddeċidiet li tissospendi l-proċeduri quddiemha u li tagħmel lill-Qorti tal-Ġustizzja d-domandi preliminari li ġejjin:
“1) L-Artikolu 183 tad-Direttiva [2006/112] kif ukoll il-prinċipji ta’ ekwivalenza u ta’ effettività, għandhom jiġu interpretati fis-sens li, fil-każ fejn il-persuna taxxabbli titlob ir-rimbors ta[l-VAT] li qabel ma kinitx setgħet titlob minħabba l-applikazzjoni ta’ kundizzjoni legali li ġiet iddikjarata kuntrarja għad-dritt tal-Unjoni permezz ta’ sentenza tal-Qorti tal-Ġustizzja, din it-talba għal rimbors tista’, fl-istess ħin, tiġi kkunsidrata bħala talba għall-ħlas ta’ interessi moratorji, fid-dawl tan-natura inċidentali tal-interessi u tal-fatt li l-irkupru tal-interessi moratorji huwa rregolat mill-istess dispożizzjonijiet nazzjonali bħal dawk applikabbli għall-irkupru tal-VAT li r-rimbors tagħha kien tardiv?
2) Il-prinċipji ta’ ekwivalenza u ta’ effettività, kif ukoll, b’mod partikolari, il-prinċipju ta’ newtralità fiskali, jipprekludu prattika nazzjonali li abbażi tagħha, l-amministrazzjoni fiskali, matul il-proċedura amministrattiva fiskali, ċaħdet billi invokat il-prinċipju dispożittiv, talba sussegwenti għal interessi moratorji imressqa mill-persuna taxxabbli peress li l-ewwel talba għal interessi moratorji tagħha, li permezz tagħha kienet inbdiet il-proċedura, ma kinitx issemmi l-perijodu addizzjonali li ġie indikat fit-talba sussegwenti, u kkunsidrat li l-imsemmija talba sussegwenti kienet, konsegwentement, talba ġdida u li din kienet preskritta, minkejja li l-istess amministrazzjoni fiskali, madankollu, ikkunsidrat li l-prinċipju dispożittiv ma kien jorbotha bl-ebda mod f’dak li jirrigwarda l-ewwel talba tal-persuna taxxabbli, iżda invokat l-imsemmi prinċipju esklużivament fir-rigward tal-interessi moratorji mitluba fir-rigward ta’ perijodu li ma kienx għadu magħruf fil-mument tat-tressiq tat-talba li tat lok għall-bidu tal-proċeduri, peress li dan il-perijodu ġie ddefinit mill-ġurisprudenza li oriġinat meta l-imsemmija proċedura kienet għada għaddejja?
3) Fid-dawl tal-prinċipji ta’ ekwivalenza, ta’ effettività u ta’ newtralità fiskali, jista’ jiġi kkunsidrat li talba sussegwenti, imressqa matul il-proċedura amministrattiva fiskali abbażi tal-ġurisprudenza stabbilita mill-qrati, tikkostitwixxi żieda għall-ewwel talba, li permezz tagħha nbdiet l-imsemmija proċedura, jew modifika ta’ din l-ewwel talba, fid-dawl tal-fatt li ż-żewġ talbiet huma differenti minn xulxin biss fir-rigward tal-perijodu ta’ ħlas tal-interessi?
4) Il-prinċipji ta’ ekwivalenza, ta’ effettività u ta’ newtralità fiskali jipprekludu prattika nazzjonali skont liema talba mressqa wara l-iskadenza tat-terminu ta’ preskrizzjoni impost tiġi ddikjarata preskritta mingħajr ma jiġi eżaminat jekk kinux jeżistu ċirkustanzi ammissibbli li setgħu jwasslu għas-sospensjoni jew għall-interruzzjoni tal-preskrizzjoni, fid-dawl, b’mod partikolari, tal-fatt li r-rikorrenti ressqet l-ewwel talba tagħha fl‑2014 u tal-fatt li, għalkemm id-dispożizzjonijiet leġiżlattivi fis-seħħ matul il-perijodu ta’ preskrizzjoni ma ġewx emendati, madankollu, peress li huma jirregolaw biss, skont il-formulazzjoni tagħhom, il-kundizzjonijiet għar-rimbors tal-VAT, [huma l-]Kúria (il-Qorti Suprema, l-Ungerija) u l-Qorti tal-Ġustizzja, billi interpretaw dawn id-dispożizzjonijiet b’mod wiesa’ fil-kuntest tal-applikazzjoni tagħhom tad-dritt, fl-assenza ta’ dispożizzjonijiet leġiżlattivi f’dan ir-rigward, [li] iddefinixxew b’mod ġurisprudenzjali l-kundizzjonijiet li fihom interessi moratorji jistgħu jintalbu, b’mod li, matul parti determinanti tal-perijodu ta’ preskrizzjoni ta’ ħames snin, ir-regoli sabiex jintalbu interessi moratorji mhux biss ma kinux ċari u magħrufa mill-persuni taxxabbli, iżda lanqas biss kienu jeżistu fil-forma ta’ dispożizzjoni leġiżlattiva?”.
Fuq id‑domandi preliminari
26 Skont l-Artikolu 99 tar-Regoli tal-Proċedura tagħha, il-Qorti tal-Ġustizzja tista’, f’kull mument, fuq proposta tal-Imħallef Relatur u wara li jinstema’ l-Avukat Ġenerali, tiddeċiedi permezz ta’ digriet motivat meta r-risposta għal domanda preliminari magħmula tkun tista’ tiġi dedotta b’mod ċar mill-ġurisprudenza.
27 Għandu jitfakkar ukoll li l-kooperazzjoni ġudizzjarja stabbilita mill-Artikolu 267 TFUE hija bbażata fuq separazzjoni netta tal-funzjonijiet bejn il-qrati nazzjonali u l-Qorti tal-Ġustizzja. Minn naħa, il-Qorti tal-Ġustizzja ma tistax tapplika r-regoli tad-dritt tal-Unjoni għal każ partikolari, iżda tista’ biss tagħti deċiżjoni dwar l-interpretazzjoni tat-Trattati u tal-atti mwettqa mill-istituzzjonijiet, il-korpi u l-organi tal-Unjoni (ara, f’dan is-sens, sentenza tat‑18 ta’ Mejju 2021, Asociația “Forumul Judecătorilor din România” et, C‑83/19, C‑127/19, C‑195/19, C‑291/19, C‑355/19 u C‑397/19, EU:C:2021:393, punt 201 kif ukoll l-ġurisprudenza ċċitata). Min-naħa l-oħra, konformement mal-punt 11 tar-Rakkomandazzjonijiet tal-Qorti tal-Ġustizzja tal-Unjoni Ewropea lill-qrati nazzjonali, dwar l-introduzzjoni ta’ talbiet għal deċiżjoni preliminari (ĠU 2019, C 380, p. 1), hija l-qorti nazzjonali li adixxiet lill-Qorti tal-Ġustizzja li għandha tislet il-konsegwenzi konkreti, fil-kawża pendenti quddiemha, tal-elementi ta’ interpretazzjoni pprovduti mill-Qorti tal-Ġustizzja (ara, f’dan is-sens, is-sentenza tal‑25 ta’ Ottubru 2018, Roche Lietuva, C‑413/17, EU:C:2018:865, punt 43).
28 F’dan il-każ, il-Qorti tal-Ġustizzja tqis li l-interpretazzjoni tad-dritt tal-Unjoni mitluba mill-qorti tar-rinviju tista’ tiġi dedotta b’mod ċar mis-sentenzi tat‑12 ta’ Frar 2008, Kempter (C‑2/06, EU:C:2008:78), tat‑23 ta’ April 2020, Sole-Mizo u Dalmandi Mezőgazdasági (C‑13/18 u C‑126/18, EU:C:2020:292), kif ukoll mid-digriet tal‑20 ta’ Ġunju 2023, Sole-Mizo (C‑426/22, EU:C:2023:517). Għaldaqstant hemm lok li jiġi applikat l-Artikolu 99 tar-Regoli tal-Proċedura f’din il-kawża.
29 Kif jirriżulta mill-punt 27 ta’ dan id-digriet, hija l-qorti tar-rinviju li għandha tislet il-konsegwenzi konkreti, fil-kawża prinċipali, tal-elementi ta’ interpretazzjoni li jirriżultaw minn dik il-ġurisprudenza tal-Qorti tal-Ġustizzja.
Fuq l‑ewwel domanda
30 Permezz tal-ewwel domanda tagħha, il-qorti tar-rinviju tistaqsi, essenzjalment, jekk l-Artikolu 183 tad-Direttiva 2006/112 għandux jiġi interpretat, fid-dawl tal-prinċipji ta’ ekwivalenza u ta’ effettività, fis-sens li, fil-każ fejn il-persuna taxxabbli titlob ir-rimbors tal-VAT li qabel ma setgħetx tinġabar lura minħabba l-applikazzjoni ta’ kundizzjoni legali li l-Qorti tal-Ġustizzja ddeċidiet li tikser dak l-artikolu, huwa jipprekludi li din it-talba għal rimbors tista’ titqies li tinkludi wkoll talba għall-ħlas ta’ interessi moratorji, fid-dawl tan-natura inċidentali ta’ dawn tal-aħħar u tal-fatt li l-ħlas tagħhom huwa rregolat mill-istess dispożizzjonijiet nazzjonali bħal dawk applikabbli għall-irkupru tal-VAT li r-rimbors tagħha kien tardiv.
31 F’dan ir-rigward, il-Qorti tal-Ġustizzja ddeċidiet b’mod partikolari fid-digriet tal‑20 ta’ Ġunju 2023, SOLE-MiZo (C‑426/22, EU:C:2023:517):
“40 [M]eta Stat Membru jkun ġabar taxxi bi ksur tar-regoli tad-dritt tal-Unjoni, il-partijiet fil-kawża għandhom id-dritt għar-rimbors mhux biss tat-taxxa miġbura indebitament iżda wkoll tal-ammonti mħallsa lil dan l-Istat jew miżmuma minnu b’relazzjoni diretta ma’ din it-taxxa. Dan jinkludi wkoll it-telf ikkostitwit mill-indisponibbiltà ta’ somom ta’ flus wara l-eżiġibbiltà prematura tat-taxxa. Għalhekk, il-prinċipju ta’ obbligu tal-Istati Membri li jħallsu lura bl-interessi l-ammonti tat-taxxi miġbura bi ksur tad-dritt tal-Unjoni jirriżulta minn dan id-dritt tal-aħħar [...]
41 Fin-nuqqas ta’ leġiżlazzjoni tal-Unjoni, huwa l-ordinament ġuridiku intern ta’ kull Stat Membru li għandu jipprovdi għall-kundizzjonijiet li fihom jistgħu jitħallsu tali interessi, b’mod partikolari r-rata u l-metodu tal-kalkolu ta’ dawn l-interessi (interessi sempliċi u interessi komposti). Dawn il-kundizzjonijiet għandhom iħarsu l-prinċipji ta’ ekwivalenza u ta’ effettività, jiġifieri, huma la għandhom ikunu inqas favorevoli minn dawk li jirrigwardaw talbiet simili li huma bbażati fuq dispożizzjonijiet tad-dritt intern u lanqas għandhom ikunu implementati b’mod li jagħmlu prattikament impossibbli l-eżerċizzju tad-drittijiet mogħtija mill-ordinament ġuridiku tal-Unjoni. L-imsemmija kundizzjonijiet għandhom, barra minn hekk, josservaw il-prinċipju ta’ newtralità fiskali [...]
42 Għal dak li jikkonċerna l-prinċipju ta’ ekwivalenza, jirriżulta mill-ġurisprudenza tal-Qorti tal-Ġustizzja li l-osservanza tiegħu tippresupponi li r-regola nazzjonali inkwistjoni tapplika bl-istess mod għal azzjonijiet ibbażati fuq id-drittijiet li għandhom il-partijiet fil-kawża bis-saħħa tad-dritt tal-Unjoni u għal dawk ibbażati fuq il-ksur tad-dritt nazzjonali li jkollhom suġġett u kawża simili [...]
43 Fir-rigward tal-prinċipju ta’ effettività, [...] dan tal-aħħar jeżiġi li r-regoli nazzjonali dwar il-kalkolu tal-interessi eventwalment dovuti fil-każ ta’ talba għar-rimbors tal-eċċess ta’ VAT li tista’ titnaqqas miżmum bi ksur tad-dritt tal-Unjoni ma jwasslux sabiex iċaħħdu lill-persuna taxxabbli minn kumpens xieraq għat-telf ikkawżat mill-indisponibbiltà tas-somom ikkonċernati [...]
44 Għandu jitfakkar li, fir-rigward tal-prinċipju ta’ newtralità fiskali, fid-dawl tal-għan tal-ħlas tal-interessi fuq l-eċċess tal-VAT miżmuma minn Stat Membru bi ksur tar-regoli tad-dritt tal-Unjoni li huma intiżi li jikkumpensaw it-telf finanzjarju ġġenerat, bi ħsara għall-persuna taxxabbli, mill-indisponibbiltà tas-somom ikkonċernati, l-prinċipju jeżiġi li l-modalitajiet tal-ħlas tal-interessi għandhom jiġu stabbiliti b’tali mod li l-piż ekonomiku tal-ammonti ta’ taxxa miżmuma indebitament jista’ jiġi kkumpensat [...]”.
32 F’dawn iċ-ċirkustanzi, r-risposta għall-ewwel domanda għandha tkun li l-Artikolu 183 tad-Direttiva 2006/112 għandu jiġi interpretat, fid-dawl tal-prinċipji ta’ ekwivalenza, ta’ effettività u ta’ newtralità fiskali, fis-sens li, fil-każ fejn il-persuna taxxabbli titlob ir-rimbors tal-VAT li qabel ma kinitx tista’ tinġabar lura minħabba l-applikazzjoni ta’ kundizzjoni legali li l-Qorti tal-Ġustizzja ddeċidiet li kienet tikser dak l-artikolu, huwa ma jipprekludix li, fil-kundizzjonijiet previsti mid-dritt tal-Istat Membru kkonċernat, dik it-talba għal rimbors tista’ titqies li tinkludi wkoll talba għall-ħlas ta’ interessi moratorji, fid-dawl tal-għan tal-ħlas ta’ interessi fuq l-eċċessi tal-VAT miżmuma minn Stat Membru bi ksur tar-regoli tad-dritt tal-Unjoni, li huma intiżi li jikkumpensaw t-telf finanzjarju ġġenerat, bi ħsara għall-persuna taxxabbli, mill-indisponibbiltà tas-somom ikkonċernati.
Fuq it‑tieni domanda
33 Permezz tat-tieni domanda tagħha, il-qorti tar-rinviju tistaqsi, essenzjalment, jekk il-prinċipji ta’ ekwivalenza, ta’ effettività u ta’ newtralità fiskali għandhomx jiġu interpretati fis-sens li jipprekludu prattika ta’ Stat Membru li tikkonsisti f’li tikklassifika bħala ġdida, bil-konsegwenza tal-preskrizzjoni tagħha, talba għall-ħlas ta’ interessi moratorji li ssemmi perijodu li ma kienx is-suġġett tal-ewwel talba għal ħlas ta’ tali interessi u fl-esklużjoni ta’ kull obbligu għall-amministrazzjoni fiskali ta’ dan l-Istat li talloka, minħabba l-prinċipju dispożittiv, fl-istadju ta’ din l-ewwel talba, interessi mhux koperti minnha, meta l-persuna taxxabbli kienet fl-impossibbiltà, fid-data tal-imsemmija l-ewwel talba, li tkun taf li kienet f’pożizzjoni li testendi l-kamp ratione temporis tagħha.
34 Qabel kollox, għandu jiġi rrilevat li din il-kwistjoni timplika neċessarjament li l-possibbiltà msemmija fil-punt 32 ta’ dan id-digriet ma teżistix. L-imsemmija domanda tippreżumi fil-fatt, per definizzjoni, li d-dritt tal-Istat Membru kkonċernat ma jinkludix dispożizzjoni li skontha talba għar-rimbors tat-taxxa miżmuma illegalment mill-amministrazzjoni fiskali ta’ dan l-Istat timplika, ipso jure, li din it-talba tirrigwarda wkoll il-ħlas ta’ interessi moratorji.
35 Sabiex tingħata risposta għall-istess domanda, għandu, qabelxejn, jitfakkar li l-Qorti tal-Ġustizzja, fis-sentenza tagħha tat‑12 ta’ Frar 2008, Kempter (C‑2/06, EU:C:2008:78), iddeċidiet li:
“35 [...] l-interpretazzjoni li l-Qorti tal-Ġustizzja tagħti ta’ regola tad-dritt [tal-Unjoni], fl-eżerċizzju tal-kompetenza tagħha mogħtija lilha mill-Artikolu [267 TFUE], tikkjarifika u tispeċifika, meta jkun neċessarju, is-sinjifikat u l-portata ta’ din ir-regola, kif għandha jew kellha tinftiehem u tiġi applikata mill-mument li daħlet fis-seħħ [...]. Fi kliem ieħor, deċiżjoni preliminari m’għandhiex valur kostituttiv, iżda purament dikjarattiv, bil‑konsegwenza li l‑effetti tagħha, bħala prinċipju, imorru lura għad‑data tad‑dħul fis‑seħħ tar‑regola interpretata [...]
36 Minn dan jirriżulta, li [...] regola tad‑dritt [tal-Unjoni] hekk interpretata għandha tiġi applikata minn korp amministrattiv fil‑kuntest tal-komptenzi tiegħu anki għal relazzjonijiet ġuridiċi li jkunu qamu u ġew ikkostitwiti qabel l‑intervent tas‑sentenza tal‑Qorti tal‑Ġustizzja li tiddeċiedi fuq it‑talba għal interpretazzjoni [...]”.
36 Sussegwentement, il-Qorti tal-Ġustizzja ddeċidiet b’mod partikolari, fis-sentenza tagħha tat‑23 ta’ April 2020, Sole-Mizo u Dalmandi Mezőgazdasági (C‑13/18 u C‑126/18, EU:C:2020:292), li:
“49 [...] prattika nazzjonali li tipprovdi li, fil-każ ta’ rimbors fuq talba tal-persuna taxxabbli ta’ ammont ta’ eċċess ta’ VAT deduċibbli applikat bi ksur tad-dritt tal-Unjoni, l-interessi applikati fuq dan l-ammont [...] jiddekorru matul perijodu ta’ rappurtar partikolari, mingħajr applikazzjoni ta’ interess sabiex tiġi kkumpensata l-persuna taxxabbli għall-erożjoni monetarja kkawżata mid-dekors taż-żmien wara dan il-perijodu ta’ rappurtar sal-ħlas effettiv ta’ dawn l-interessi, jista’ jċaħħad lill-persuna taxxabbli minn kumpens adegwat għat-telf ikkawżat mill-indisponibbiltà tas-somom ikkonċernati u, għalhekk, ma tosservax il-prinċipju tal-effettività. Barra minn hekk, tali prattika ma hijiex ta’ natura li tikkumpensa l-piż ekonomiku tal-ammonti ta’ taxxa miżmuma indebitament, kuntrarjament għall-prinċipju ta’ newtralità fiskali.
[...]
64 [...] meta [...] id-dejn ikollu bħala kawża l-ksur minn Stat Membru tad-dritt tal-Unjoni, il-prinċipju ta’ effettività jeżiġih li jħallas interessi moratorji fil-każ ta’ ħlas tardiv ta’ dan il-kreditu mill-amministrazzjoni, li fin-nuqqas ta’ dan l-Istati Membri ma jkunux imħeġġa jikkumpensaw fl-iqsar żmien l-effetti ta’ dan il-ksur subit mill-persuni taxxabbli.
65 Fir-rigward tal-kundizzjonijiet li fihom tali interessi jitħallsu, [...] fl-assenza ta’ leġiżlazzjoni tal-Unjoni, huwa l-ordinament ġuridiku intern ta’ kull Stat Membru li għandu jipprevedi dawn il-kundizzjonijiet, bla ħsara għall-osservanza b’mod partikolari tal-prinċipji ta’ ekwivalenza u ta’ effettività.
[...]
67 Fid-dawl tal-awtonomija proċedurali li għandhom l-Istati Membri sabiex jipprevedu, fid-dritt nazzjonali tagħhom, il-kundizzjonijiet proċedurali tal-ħlas ta’ interessi fuq l-ammonti tat-taxxi miġbura bi ksur tad-dritt tal-Unjoni, ir-rekwiżit dwar it-tressiq mill-persuna taxxabbli ta’ talba għall-ħlas tal-interessi moratorji dovuti f’każ ta’ dewmien fil-ħlas mill-amministrazzjoni ta’ kreditu li jirriżulta mill-ksur mill-Istat tad-dritt tal-Unjoni ma jmurx kontra l-prinċipju ta’ effettività”.
37 F’dan il-każ, mid-deċiżjoni tar-rinviju jirriżulta li Lear Corporation, minn naħa, ressqet talba għall-ħlas ta’ interessi moratorji, fit‑23 ta’ Diċembru 2014, u, min-naħa l-oħra, li din it-talba kienet tirrigwarda perijodu preċiż ħafna, jiġifieri l-perijodu mill‑1 ta’ Jannar 2008 sal‑31 ta’ Lulju 2011. Konsegwentement, sa fejn hawnhekk ma hijiex aċċettata l-ipoteżi prevista fir-risposta għall-ewwel domanda, jiġifieri li t-talba għar-rimbors tas-somma prinċipali fiha nnifisha tinkludi, skont id-dritt nazzjonali, talba għal interessi moratorji, l-amministrazzjoni fiskali tal-Istat Membru kkonċernat hija fondata, fid-dawl tad-dritt tal-Unjoni, li żżomm mal-petitum ta’ tali talba, jiġifieri, f’dan il-każ, mal-interessi li jikkorrispondu għall-perijodu ratione temporis iddefinit mill-persuna taxxabbli nnifisha.
38 Madankollu, kif ġie ppreċiżat fid-deċiżjoni tar-rinviju, kien biss wara li saret taf bid-deċiżjoni ta’ prinċipju Nru 18/2017 tal-Kúria (il-Qorti Suprema) li Lear Corporation talbet, fil-kuntest tal-kontenzjuż bejnha u l-amministrazzjoni fiskali Ungeriża, li din l-aħħar deċiżjoni tittieħed inkunsiderazzjoni għall-perijodu kollu ddeterminat minn dik il-qorti f’dik id-deċiżjoni fir-rigward tad-dritt għall-ħlas ta’ interessi moratorji.
39 F’dan ir-rigward, għandu jiġi indikat li prattika bħal dik tal-amministrazzjoni fiskali tal-Istat Membru kkonċernat, li tikkonsisti fil-kunsiderazzjoni ta’ tali talba bħala talba ġdida, bil-konsegwenza tal-assenza ta’ rimbors ta’ parti mill-interessi moratorji minħabba l-preskrizzjoni ta’ din it-talba, tmur kontra l-prinċipji stabbiliti b’mod ċar kemm mis-sentenza tat‑12 ta’ Frar 2008, Kempter (C‑2/06, EU:C:2008:78), kif ukoll mis-sentenza tat‑23 ta’ April 2020, Sole-Mizo u Dalmandi Mezőgazdasági (C‑13/18 u C‑126/18, EU:C:2020:292).
40 Fil-fatt, minn naħa, f’dan il-każ, Lear Corporation ippreżentat, fit-terminu ta’ preskrizzjoni, l-ewwel talba għall-ħlas ta’ interessi moratorji relatati mal-ammont tal-VAT li ma setgħetx tinġabar lura minħabba l-kundizzjoni msejħa tal-“akkwisti mħallsa”, billi rreferiet għad-digriet tas‑17 ta’ Lulju 2014, Delphi Hungary Autóalkatresz Gyártó (C‑654/13, EU:C:2014:2127), u t-talba sussegwenti mressqa minn Lear Corporation għandha titqies bħala li tifforma parti integrali mill-konsegwenzi li l-persuni taxxabbli siltu, fuq livell nazzjonali, minn dan id-digriet, li miegħu huwa marbut effett ex tunc.
41 Min-naħa l-oħra, billi rrendiet effettivament impossibbli r-rimbors tal-interessi moratorji relatati mal-perijodu kopert minn din it-talba sussegwenti, filwaqt li hija biss deċiżjoni tal-Qorti Suprema tal-Istat Membru kkonċernat, wara t-talba inizjali għal ħlas ta’ interessi moratorji, li ppermettiet lill-persuna taxxabbli li tiġi informata bid-drittijiet tagħha fl-intier tagħhom, l-amministrazzjoni fiskali tal-Istat Membru kkonċernat iċċaħħad “lill-persuna taxxabbli minn kumpens adegwat għat-telf ikkawżat mill-indisponibbiltà tas-somom ikkonċernati u, għalhekk, ma tosservax il-prinċipju tal-effettività” (sentenza tat‑23 ta’ April 2020, Sole-Mizo u Dalmandi Mezőgazdasági, C‑13/18 u C‑126/18, EU:C:2020:292, punt 49).
42 F’dawn iċ-ċirkustanzi, ir-risposta għat-tieni domanda għandha tkun li l-prinċipji ta’ effettività u ta’ newtralità fiskali għandhom jiġu interpretati fis-sens li ma jipprekludux prattika ta’ Stat Membru li tikkonsisti fl-esklużjoni ta’ kull obbligu għall-amministrazzjoni fiskali ta’ dan l-Istat li talloka, fl-istadju ta’ talba għall-ħlas ta’ interessi moratorji, imressqa fit-terminu ta’ preskrizzjoni, relatati ma’ ammonti ta’ VAT miżmuma mill-imsemmi Stat bi ksur tad-dritt tal-Unjoni, interessi mhux koperti minn din it-talba, iżda jipprekludu, min-naħa l-oħra, li dik l-amministrazzjoni tikklassifika bħala ġdida, bil-konsegwenza tal-preskrizzjoni tagħha, it-tieni talba għall-ħlas ta’ interessi moratorji li ssemmi perijodu li ma kienx is-suġġett ta’ din l-ewwel talba, meta t-tieni talba tirrigwarda interessi moratorji relatati ma’ ammonti ta’ VAT miżmuma minħabba l-istess ksur tad-dritt tal-Unjoni bħal dak li mmotiva l-ewwel talba u li l-possibbiltà li jiġi estiż il-kamp ratione temporis tagħha kienet magħrufa mill-persuna taxxabbli biss wara l-adozzjoni ta’ deċiżjoni ġudizzjarja nazzjonali wara deċiżjoni tal-Qorti tal-Ġustizzja mogħtija fl-eżerċizzju tal-ġurisdizzjoni mogħtija lilha mill-Artikolu 267 TFUE.
Fuq it‑tielet domanda
43 Permezz tat-tielet domanda tagħha, il-qorti tar-rinviju tistaqsi, essenzjalment, jekk il-prinċipji ta’ ekwivalenza, ta’ effettività u ta’ newtralità fiskali għandhomx jiġu interpretati fis-sens li jippermettu li t-tieni talba għall-ħlas ta’ interessi moratorji, ippreżentata minħabba żvilupp fil-ġurisprudenza, tiġi kkunsidrata bħala suppliment għall-ewwel talba għall-ħlas ta’ tali interessi, jew inkella bħala emenda tagħha, fid-dawl tal-fatt li ż-żewġ talbiet huma differenti bejniethom biss mill-perspettiva tal-perijodu li fir-rigward tiegħu jintalbu interessi moratorji.
44 Fid-dawl tar-risposta mogħtija għat-tieni domanda fil-punt 42 ta’ dan id-digriet, li skontha dawn il-prinċipji jipprekludu, f’każ bħal dan, li l-amministrazzjoni fiskali tal-Istat Membru kkonċernat tikklassifika bħala ġdida t-tieni talba għal ħlas ta’ interessi moratorji, għandu loġikament jiġi dedott li l-imsemmija prinċipji jimplikaw, għall-kuntrarju, li din tal-aħħar tiġi kklassifikata, skont il-modalitajiet li huwa dan l-Istat Membru li għandu jiddetermina fid-dawl tad-dritt nazzjonali tiegħu, bħala suppliment għall-ewwel talba għal ħlas ta’ tali interessi.
45 F’dawn iċ-ċirkustanzi, ir-risposta għat-tielet domanda għandha tkun li l-prinċipji ta’ effettività u ta’ newtralità fiskali għandhom jiġu interpretati fis-sens li jimplikaw li għandha tiġi kkunsidrata, skont il-modalitajiet li huwa kull Stat Membru li għandu jiddetermina fid-dawl tad-dritt nazzjonali tiegħu, it-tieni talba għall-ħlas ta’ interessi moratorji li ssemmi perijodu li ma kienx is-suġġett tal-ewwel talba għall-ħlas ta’ tali interessi bħala suppliment għal din l-ewwel talba, meta din it-tieni talba tirrigwarda interessi moratorji relatati ma’ ammonti ta’ VAT miżmuma minħabba l-istess ksur tad-dritt tal-Unjoni bħal dak li mmotiva l-ewwel talba u li l-possibbiltà li jiġi estiż il-kamp ratione temporis ta’ din tal-aħħar ma kinitx magħrufa mill-persuna taxxabbli ħlief wara l-adozzjoni ta’ deċiżjoni ġudizzjarja nazzjonali wara deċiżjoni tal-Qorti tal-Ġustizzja mogħtija fl-eżerċizzju tal-ġurisdizzjoni mogħtija lilha mill-Artikolu 267 TFUE.
Fuq ir‑raba’ domanda
46 Ir-raba’ domanda magħmula mill-qorti tar-rinviju hija bbażata fuq il-premessa li t-tieni talba għall-ħlas ta’ interessi moratorji tista’ tiġi preskritta f’ċirkustanzi bħal dawk fil-kawża prinċipali. Issa, mir-risposta għat-tieni domanda, li tinsab fil-punt 42 ta’ dan id-digriet, jirriżulta li l-prinċipji ta’ ekwivalenza, ta’ effettività u ta’ newtralità fiskali jipprekludu li tali talba tkun tista’ tiġi kklassifikata bħala talba ġdida u, konsegwentement, suġġetta għal preskrizzjoni. Għall-kuntrarju, mir-risposta mogħtija għat-tielet domanda fil-punt 45 ta’ dan id-digriet jirriżulta li l-imsemmija talba għandha titqies, skont il-modalitajiet li kull Stat Membru għandu jiddetermina fid-dawl tad-dritt nazzjonali tiegħu, bħala suppliment għall-ewwel talba għal ħlas ta’ interessi moratorji.
47 Għalhekk mhemmx lok li tingħata risposta għar-raba’ domanda.
Fuq l‑ispejjeż
48 Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija dik il-qorti li tiddeċiedi fuq l-ispejjeż.
Għal dawn il-motivi, Il-Qorti tal-Ġustizzja (Is-Seba’ Awla) taqta’ u tiddeċiedi:
1) L-Artikolu 183 tad-Direttiva tal-Kunsill 2006/112/KE ta’ 28 ta’ Novembru 2006 dwar is-sistema komuni ta’ taxxa fuq il-valur miżjud,
għandu jiġi interpretat, fid-dawl tal-prinċipji ta’ ekwivalenza, ta’ effettività u ta’ newtralità fiskali, fis-sens li:
fil-każ fejn il-persuna taxxabbli titlob ir-rimbors tat-taxxa fuq il-valur miżjud (VAT) li qabel ma kinitx tista’ tinġabar lura minħabba l-applikazzjoni ta’ kundizzjoni legali li l-Qorti tal-Ġustizzja ddeċidiet li kienet tikser dak l-artikolu, huwa ma jipprekludix li, fil-kundizzjonijiet previsti mid-dritt tal-Istat Membru kkonċernat, dik it-talba għal rimbors tista’ titqies li tinkludi wkoll talba għall-ħlas ta’ interessi moratorji, fid-dawl tal-għan tal-ħlas ta’ interessi fuq l-eċċessi tal-VAT miżmuma minn Stat Membru bi ksur tar-regoli tad-dritt tal-Unjoni, li huma intiżi li jikkumpensaw t-telf finanzjarju ġġenerat, bi ħsara għall-persuna taxxabbli, mill-indisponibbiltà tas-somom ikkonċernati.
2) Il-prinċipji ta’ effettività u ta’ newtralità fiskali
għandhom jiġu interpretati fis-sens li:
ma jipprekludux prattika ta’ Stat Membru li tikkonsisti fl-esklużjoni ta’ kull obbligu għall-amministrazzjoni fiskali ta’ dan l-Istat li talloka, fl-istadju ta’ talba għall-ħlas ta’ interessi moratorji, imressqa fit-terminu ta’ preskrizzjoni, relatati ma’ ammonti ta’ VAT miżmuma mill-imsemmi Stat bi ksur tad-dritt tal-Unjoni, interessi mhux koperti minn din it-talba, iżda jipprekludu, min-naħa l-oħra, li dik l-amministrazzjoni tikklassifika bħala ġdida, bil-konsegwenza tal-preskrizzjoni tagħha, it-tieni talba għall-ħlas ta’ interessi moratorji li ssemmi perijodu li ma kienx is-suġġett ta’ din l-ewwel talba, meta t-tieni talba tirrigwarda interessi moratorji relatati ma’ ammonti ta’ VAT miżmuma minħabba l-istess ksur tad-dritt tal-Unjoni bħal dak li mmotiva l-ewwel talba u li l-possibbiltà li jiġi estiż il-kamp ratione temporis tagħha kienet magħrufa mill-persuna taxxabbli biss wara l-adozzjoni ta’ deċiżjoni ġudizzjarja nazzjonali wara deċiżjoni tal-Qorti tal-Ġustizzja mogħtija fl-eżerċizzju tal-ġurisdizzjoni mogħtija lilha mill-Artikolu 267 TFUE.
3) Il-prinċipji ta’ effettività u ta’ newtralità fiskali
għandhom jiġu interpretati fis-sens li:
jimplikaw li għandha tiġi kkunsidrata, skont il-modalitajiet li huwa kull Stat Membru li għandu jiddetermina fid-dawl tad-dritt nazzjonali tiegħu, it-tieni talba għall-ħlas ta’ interessi moratorji li ssemmi perijodu li ma kienx is-suġġett tal-ewwel talba għall-ħlas ta’ tali interessi bħala suppliment għal din l-ewwel talba, meta din it-tieni talba tirrigwarda interessi moratorji relatati ma’ ammonti ta’ VAT miżmuma minħabba l-istess ksur tad-dritt tal-Unjoni bħal dak li mmotiva l-ewwel talba u li l-possibbiltà li jiġi estiż il-kamp ratione temporis ta’ din tal-aħħar ma kinitx magħrufa mill-persuna taxxabbli ħlief wara l-adozzjoni ta’ deċiżjoni ġudizzjarja nazzjonali wara deċiżjoni tal-Qorti tal-Ġustizzja mogħtija fl-eżerċizzju tal-ġurisdizzjoni mogħtija lilha mill-Artikolu 267 TFUE.
Firem