Rikors ippreżentat fl-14 ta' Ottubru 2011 - European Dynamics Luxembourg vs BĊE
(Kawża T-553/11)
Lingwa tal-kawża: l-Ingliż
Partijiet
Rikorrenti: European Dynamics Luxembourg SA (Ettelbrück, il-Lussemburgu) (rappreżentanti: N. Korogiannakis u M. Dermitzakis, avukati)
Konvenut: Il-Bank Ċentrali Ewropew
Talbiet
Ir-rikorrenti titlob lill-Qorti Ġenerali jogħġobha:
tannulla d-deċiżjoni tal-konvenut li jiċħad il-kandidatura kollettiva tal-grupp temporanju, immexxi u rrappreżentat mir-rikorrenti, ippreżentata b'risposta għal sejħa għal kandidaturi għal parteċipazzjoni fis-sejħa għal offerti bir-referenza Nru 14159/IS/2010 (ĠU 2011/S 75-121894), b'mod partikolari għas-servizzi koperti bil-lot nru 1 tal-imsemmija offerta;
tannulla d-deċiżjoni tal-konvenut li jiċħad l-appell tar-rikorrenti ppreżentat skont il-proċedura ta' appell hekk kif iddefinita fit-Taqsima IV.2.1 tal-imsemmija sejħa għal offerti u taħt il-kundizzjonijiet previsti fl-Artikolu 33 tad-Deċiżjoni BĊE/2007/5 ;
tannulla d-deċiżjonijiet kollha konnessi adottati mill-konvenut;
tikkundanna lill-konvenut iħallas lir-rikorrenti, skont l-Artikoli 256, 268 u 340 TFUE, id-danni għal telf ta' opportunità u danni għar-reputazzjoni u l-kredibbiltà tagħha fir-rigward tal-proċedura ta' sejħa għal offerti inkwistjoni li jammontaw għal EUR 2 000 000.
tikkundanna lill-konvenut għall-ispejjeż tal-kawża u għal spejjeż oħra tar-rikorrenti marbuta ma' dan ir-rikors.
Motivi u argumenti prinċipali
Insostenn tar-rikors tagħha, ir-rikorrenti tinvoka erba' motivi.
1. Permezz tal-ewwel motiv tagħha, ir-rikorrenti tinvoka ksur tal-obbligu ta' motivazzjoni min-naħa tal-konvenut u nuqqas ta' żvelar tal-merti tal-kandidati magħżula. Barra minn hekk, ir-rikorrenti tallega li l-konvenut għamel użu minn kriterji ta' selezzjoni vagi, introduċa kriterji ġodda waqt l-evalwazzjoni u naqas milli jikkonforma ruħu mal-Artikolu 28(3) tad-Deċiżjoni BĊE/2007/5. Fl-aħħar nett, ir-rikorrenti ssostni li l-konvenut kiser id-drittijiet tad-difiża u l-prinċipju ta' trasparenza u amministrazzjoni tajba.
2. Permezz tat-tieni motiv tagħha, ir-rikorrenti tinvoka żbalji manifesti ta' evalwazzjoni min-naħa tal-konvenut billi naqas milli jikkonforma ruħu mal-Artikolu 25 tad-Deċiżjoni BĊE/2007/5 u mal-ispeċifikazzjonijiet tas-sejħa għal offerti.
3. Permezz tat-tielet motiv tagħha, ir-rikorrenti tinvoka ksur min-naħa tal-konvenut tal-Artikolu 20 tad-Deċiżjoni BĊE/2007/5 u tal-prinċipju ta' amministrazzjoni tajba.
4. Permezz tar-raba' motiv tagħha, ir-rikorrenti tinvoka ksur min-naħa tal-konvenut tal-Artikolu 28(3) tad-Deċiżjoni BĊE/2007/5, billi ċaħad l-appell tagħha bħala inammissibbli.
____________1 - Deċiżjoni tal-Bank Ċentrali Ewropew, tat-3 ta' Lulju 2007, li tistabbilixxi r-Regoli dwar l-Akkwisti (ĠU L 184, p. 34)